1 Habere hahwa bɨro ndathʉ, Yesʉ mwatsɨmba Petero, Yakobo na Yoani mʉgala abo, mwathwalabo ko kɨthwa kɨre, babyagako ɨbo bene. 2 Yesʉ mwahɨndʉlwa embere sabo, n'obʉsʉ bʉwe mobwathanga ɨngenga-ngenga* nga lɨshɨ, n'esongɨmba sɨwe mosasana nga kyakakala. 3 Aho n'aho Mʉsa na Elia mobahʉlʉkɨrabo nɨabasɨmola na Yesʉ. 4 Aho Petero mwabwɨra Yesʉ athɨ: «Nyinya-kowethʉ, likwirire kw'ithwe eribya hano. Wamashasha, nyahimba hano ho hema ishathu, ngʉma yɨwawe, ngʉma ya Mʉsa na ngʉma ya Elia.» 5 Abere anemʉnegena, ekɨfʉ ekyo ekɨkoletsya mokyashwɨkabo. N'omo kɨfʉ ekyo momwonvwɨka mʉlenge nɨanegena athɨ: «Ono nɨ Mʉgala aye mʉtsɨɨrwa, nyimoyibwe naye kʉtsɨbʉ. Mʉmʉhʉlɨkɨrɨtsye!»* 6 Abɨga babere bonvwa omʉlenge oyo, mobʉbaha kʉtsɨbʉ, mobawa n'ihuma obʉsʉ ko kɨthaka. 7 Yesʉ mwayɨfʉnda aho babyaga, mwakola kʉbo n'ɨbwɨrabo athɨ: «Mwimane, mʉthʉbahaga.» 8 Nabo babere bashʉmba amesho wabo, mobathashʉnga ʉndɨ mʉndʉ athalɨ Yesʉ mʉsha. 9 Babere banemukima ko kɨthwa, Yesʉ mwahamʉlabo athɨ: «Mʉthabwɨraga mʉndʉ ebyo mwamashʉngako, ihika ko kɨro oMʉgala w'oMʉndʉ andalubuka mo baholi.»

10 Aho abɨga mobabʉtsya Yesʉ bathɨ: «Bʉshana na ki aBakangɨrɨtsya b'oMʉgomba abanegena bathɨ lɨtholere Elia nɨathanga ihika?»* 11 Mwashʉbɨtsyabo athɨ: «Kwenene lɨtholere Elia nɨathanga ihika athondeke ebɨndʉ byoshi. 12 Hewethuwe enyɨbabwɨra nyɨthɨ Elia amalire ihika, abandʉ mobathamʉmɨnya he mobamʉkolera nga ko bashashire.* Ni kuthyo ko bandagatsya oMʉgala w'oMʉndʉ yowene-wene.» 13 Aho abɨga mobamɨnya ko agenda ahʉla Yoani mubatisya.

14 Yesʉ n'abɨga bʉwe babere bahika aho habyaga omuhindano, mʉndʉ mʉgʉma mwahikira Yesʉ, mwafʉkama embere sɨwe, 15 mwanegena athɨ: «Nyinya-kowethʉ, shashɨra mʉgala aye. Alɨko bithutsa* na agalwa kʉtsɨbʉ. Ko ndambi soshi, anayihuma mo mʉtsanwa kʉtse mo metsi. 16 Monyamuthwalire abɨga bawe, hewethuwe mobalemirwe imulamya.» 17 Yesʉ mwanegena athɨ: «Imwe kɨgenyero kɨthɨkɨrɨtsye* na kya bo baheraga! Nyandabya nemwe ihika ku ndambi ehɨ? Nyandabaheka kʉ bɨro bɨngahɨ? Mʉnyɨlethere omwana oyo yo hano.» 18 Yesʉ mwabɨnga omʉtsɨmʉ oyo, mwathoka ko mwana, na ko ndambi eyo mwalama. 19 Aho abɨga mobahikira Yesʉ ɨbo bene n'ɨmʉbʉtsya bathɨ: «Bʉshana na ki ithwe mothwalemirwe ɨbɨnga omʉtsɨmʉ oyo?» 20 Yesʉ mwashʉbɨtsyabo athɨ: «Kʉshangwa olwɨkɨrɨtsyo lwenyu nɨ lʉke. Nɨ kwenene enyɨbabwɨra, mwamabya na lwɨkɨrɨtsyo lʉngana na kambulu k'eharatali, mwangabwire ekɨthwa eki mʉthɨ: "Uyithokye hano ʉye halira," nakyo nɨkyagenda. Hathalɨ kɨnwa kyo mwangalemwa ɨkola. [21 Hewethuwe nɨ mo mɨshabe n'iyima akalyo kuroshi byo byangathokya mɨtsɨmʉ mɨbɨ ng'eyi.»]*

22 Kɨro kɨgʉma, Yesʉ n'abɨga bʉwe babyaga ni bahindene hagʉma iNgalilaya. Yesʉ mwabwɨrabo athɨ: «oMʉgala w'oMʉndʉ ahirwa mo minwe y'abandʉ. 23 Bandamwitha, he ekɨro kya kashathʉ andalubuka.» Aho abɨga mobafwa buliye bʉnene.

24 Yesʉ n'abɨga bʉwe babere bahika ɨKaperenaʉmʉ, abakarani b'ekoli b'omo nyʉmba ya Gongo mobahikira Petero n'ɨmʉbʉtsya bathɨ: «Omʉkangɨrɨtsya enyu athafʉha ekoli y' eNyʉmba ya Gongo?»* 25 «Petero mwashubya athɨ: anafʉharo.» Petero abere ɨngɨra mo nyʉmba, embere anegene Yesʉ mwamʉbwɨra athɨ: «Ʉganɨtsya ki no Simoni? Abamɨ b'ekɨhʉgo kɨno abanafuhya ekoli yo bahɨ? Nɨ esombʉthɨrwa kʉtse abageni?» 26 Petero mwashubya athɨ: «Abageni.» Yesʉ mwamʉbwɨra athɨ: «Byamabya nɨ ko bɨrɨ bithyo, sombʉthɨrwa s'ekɨhʉgo sɨthangafʉha. 27 Hewethuwe, thuthatsiire itsibukya abandʉ aba. Bʉshana n'ekyo ʉgende ko ngetsɨ, ʉsha obʉrobo mo metsi. Ʉkʉre erihere limbere wabona, ʉkɨngʉle obʉnʉ bwalyo, washʉngamo kɨtsere kya faranga. Ʉtsɨmbekyo ʉfʉhe Ekoli aye n'eyɨwawe.»