1 eSabato yabere yahwa, mo mʉhʉgʉtho w'ekɨro kɨmbere ky'eyenga, Marɨa w'ɨMangɨndala n'ogʉndɨ Marɨa* mobayalola kw'ɨsɨnda. 2 Aho n'aho, mokwabya kalingiti katsɨbʉ, malaɨka wa Nyinya-kowethʉ mwakima ɨthoka mo lʉbʉla, mwahika ɨkʉmbagatsya eribwe eryo n'ikala kʉlyo. 3 Abyaga niashoshire nga mulabyo n'esongɨmba sɨwe sabyaga nisisanire nga nzʉrʉrʉ. 4 Abatheya b'erɨsɨnda mobʉbaha kʉtsɨbʉ ihika ko kɨka mobathithimana na mobabya nga bafwire. 5 Malaɨka oyo mwabwɨra abakatsɨ abo athɨ: «Mʉthʉbahaga! Nyetsi kw'omushondya Yesʉ, yo wabambawa ko mʉsalaba. 6 Athalɨ hano, kʉshangwa alubukire nga kw'anegenaga. Mwitse mʉlole ahabyaga alambikire. 7 Aho, mʉgende tsʉba mʉyabwɨre abɨga bʉwe mʉthɨ: "Alubukire ɨthoka mo baholi, amalire ɨbathanga iNgalilaya*, eyo yo mwamʉshʉngako." Ebyo byo nyithashondya ɨbabwɨra.»

8 Mobathoka kw'ɨsɨnda ko tsʉba n'obʉba na ngoga nene, mobathɨbɨtha nɨyafʉlɨra abɨga bʉwe bw'omwatsɨ. 9 Aho n'aho, Yesʉ mwayahindana n'abakatsɨ abo n'ɨbwɨrabo athɨ: «Mwabukirehe!» Mobayɨfʉnda hofɨ naye na mobatsɨmba ko bɨshando bɨwe n'imuramya. 10 Aho Yesʉ mwabwɨrabo athɨ: «Mʉthʉbahaga. Mʉgende mʉyabwɨre bagala bethʉ ko batholere ɨya iNgalilaya, eyo yo banyɨshʉngako.»

11 Abakatsɨ abo babere bakɨnalɨ mo nzɨra, bagʉma ba mo batheya b'erɨsɨnda mobaya mo muyi bʉshana n'ɨyafʉlɨra abaheri bakʉlʉ bw'ebyoshi bɨthatsʉka. 12 Abaheri bakʉlʉ mobahindana hagʉma n'abangʉmwa b'aBayuta, na mobahʉlɨkɨrɨrana n'ɨha abashirikani bo faranga nyɨngɨ, 13 n'ɨbwɨrabo bathɨ: «Mwanegena mʉthɨ: "Abɨga bʉwe mobahika mo kɨro n'imwiba, mo ndambi thuthabya nɨthwamayatho."* 14 N'omwatsɨ amahika kʉ kafʉrʉnalɨ, n'ithwe thwothwamolohya, bʉshana ebɨnwa ebyo bithabaletheraga bʉrʉnga.» 15 Abatheya abo mobathola esofaranga etho na mobakola ɨkwamana na ko bathahamʉlwa. N'omwatsɨ oyo mwaya-ngʉlʉ ko Bayuta boshi, ihika ko kɨro kya munobwire.

16 Abɨga ikumi n'omʉgʉma mobaya iNgalilaya, ko kɨthwa Yesʉ akangayabo.* 17 Babere bamʉshʉngako mobamuramya, hewethuwe bagʉma mʉbo mobathɨka-thɨka. 18 Yesʉ mwayɨfʉnda hofɨ nabo n'ɨbwɨrabo athɨ: «Nyamahabwa amaka woshi mo lʉbʉla n'oko kɨthaka. 19 Mʉgende ko bɨhanda byoshi mʉyɨre abandʉ mo bɨga*, mubatisyebo kw'ɨtsɨna lya Thatha, na lya Mʉgala na ely'oMʉthɨma Mwerʉ. 20 Na mʉkangɨrɨtsyebo ishikya ebyoshi nyabahamʉlaga. Nangye nyɨrɨ hagʉma nemwe ebɨro byoshi ihika ko nduli y'ekɨhʉgo.»