1 Yesʉ abere ashʉnga ko muhindano w'abandʉ, mwɨrʉkɨra ko kɨthwa n'ikala. Abɨga bʉwe mobayɨfʉnda hofɨ naye. 2 Na mwathanga ɨkangɨrɨtsyabo athɨ:

3 «Bagashanɨrwe abatsene mo mʉthɨma,

kʉshangwa oBwamɨ bw'elʉbʉla nɨ bwabo!

4 Bagashanɨrwe abo abalɨra,

kʉshangwa Gongo andakiraniabo.

5 Bagashanɨrwe abalonvʉ,

kʉshangwa bandahabwa ekɨhʉgo mo mwandʉ.

6 Bagashanɨrwe abo bawirire n'ɨfwa nyotha y'erɨkola ebɨthʉnganene,

kʉshangwa Gongo anduguthyabo.

7 Bagashanɨrwe ab'eshashi,

kʉshangwa nabo bandashashɨrwa!

8 Bagashanɨrwe abo mʉthɨma erire,

kʉshangwa bandashʉnga Gongo.

9 Bagashanɨrwe abarongani,

kʉshangwa bandahʉlwamo bana ba Gongo.

10 Bagashanɨrwe abo bagalwa bʉshana n'ɨkola ebɨthʉnganene,

kʉshangwa oBwamɨ bw'elʉbʉla nɨ bwabo.

11 Mʉgashanɨrwe imwe mo ndambi abandʉ ababahangya, n'ɨbagatsya, n'ɨbahambɨka obʉlɨ bʉbɨ boshi bʉshana nangye. 12 Mʉmoge na mʉyɨbware kʉshangwa olʉhembo lwenyu lwandabya lʉnene mo lʉbʉla. Ni kuthyo ko banubyaga abamɨnyeretsɨ bo babyagaho embere kw'imwe.»

13 Imwe mʉlɨ munyu w'ekɨhʉgo. Ewo omunyu amahetsya obʉshɨ bwawo, ni ki kyo kyangakotsya ishubya mʉwo mw'obʉshɨ? Omunyu ow'athakikwirire na hake, nɨ w'erɨgʉshwa embʉga n'ilyathangwa n'abandʉ.

14 Mʉlɨ kyakakala ky'ekɨhʉgo. Omuyi owalɨ ko kɨthwa athangabishama. 15 Na bathalɨ abananokya etara n'ɨshwɨkaro kɨthonga, he eyinahirwa okw'ihango bʉshana ɨkoletsye aboshi bo balɨ mo nyʉmba. 16 Na kuthyo ekyakakala kyenyu kɨkoletsye embere s'abandʉ, kʉbʉshɨ mw'ɨshʉnga ebɨbʉya omʉkola abandʉ basingye Thatha wenyu yo ʉlɨ mo lʉbʉla.

17 Mʉthagenda omʉganɨtsya mʉthɨ nyahikaga bʉshana n'ithokyaho oMʉgomba wa Mʉsa n'amakangɨrɨtsya w'abamɨnyeretsɨ. Nyithahikaga bʉshana n'ithokyabyo, hewethuwe bʉshana n'ɨbereretsyabyo. 18 Kʉshangwa enyɨbabwɨra kwenene, olʉbʉla n'ekɨhʉgo byandatsʉka, hewethuwe oMʉgomba athɨndathokeko lʉshako n'olʉgʉma kʉtse kʉthɨndathoke kakorotsi n'akagʉma ko byo bishakirwemo ihika kw'ɨbererera ly'ebyoshi. 19 Na bʉshana n'ekyo, omʉndʉ yo wandathengʉha akake kʉtsɨbʉ k'oko mathegeko, n'ɨkangɨrɨtsya abandɨ bandʉ bathengʉhe ng'ɨye, andahʉlwamo mʉke mo Bwamɨ bw'elʉbʉla. Hewethuwe oyo wandashikya n'ɨkangɨrɨtsyawo abandɨ bashikyewo ng'ɨye, oyo andahʉlwamo mʉkʉlʉ mo Bwamɨ bw'elʉbʉla*. 20 Aho enyɨbabwɨra, mwamabya mʉthalɨ bathʉnganene kʉlenga aBakangɨrɨtsya b'oMʉgomba n'aBafarisayo, mʉthɨndɨngɨre mo Bwamɨ bw'elʉbʉla.

21 «Momwonvwa nga ko bo sho-kʉlʉ babwɨrawa mbʉ: "Uthithaga, oyo wanditha atholere ɨsohwa." 22 Hewethuwe ingye enyɨbabwɨra nyɨthɨ, bʉlɨ mʉndʉ yo wandatsɨbʉkɨra mʉgalabo, atholere ɨsohwa. Na yo wandabwɨra mʉgalabo athɨ uthawithe bwenge, atholere ɨsohwa mo bʉshenge bʉkʉlʉ, na yo wandalʉka mʉgalabo mo mʉsɨre, atholere ɨʉshwa mo mʉtsanwa wa okw'ɨrʉnga. 23 Aho wamaletha ebɨhembo byawe ko bʉtara bw'erɨhererako n'aho wamɨbʉka ko ʉlɨ na kiniga na mʉgala enyu,Bʉtara bw'ɨhererako 24 mika ebɨhembo byawe by'embere y'obʉtara na ʉthange ɨyarongana na mʉgala enyu, honyuma kw'aho hika ʉherere Gongo.

25 «Kandɨ mʉndʉ amakusitaka, hʉlɨkɨrɨrana naye tsʉba mʉkɨnalɨ mo nzɨra y'etɨrɨbɨnalɨ. Bɨthalɨ bithyo, yo uthakusitaka nɨakʉheretsya omusohi, n'omusohi nɨakʉthwala eyɨrɨ abashirikani, n'abashirikani nɨbakʉgʉsha mo muliki. 26 Kwenene enyɨkʉbwɨra, ʉthɨndathoke mo muliki omo uthetsi wafʉha esengi nyɨtsɨndʉ-tsɨndʉ.»

27 «Momwonvwa ko mokwanegenwa kʉthɨ: Ʉthandasɨngɨra.* 28 Hewethuwe ingye enyɨbabwɨra nyɨthɨ, obʉlɨ mʉndʉ amayɨthegeretsya mʉkatsɨ n'imushumira nɨamamala ɨsɨngɨra naye mo mʉthɨma ʉwe. 29 He elisho lyawe ly'amalyo lyamaleka nɨwakola kɨtsɨbʉ, kʉlalyo na ʉgʉshelyo hale nawe, kʉshangwa bikwirire kɨthambo kɨgʉma ky'oko mʉbɨrɨ awe kɨhere kʉlenga omʉbɨrɨ awe woshi ɨgʉshwa kw'ɨrʉnga. 30 N'okʉboko kwawe kw'amalyo kwamaleka nɨwakola kɨtsɨbʉ, tsako na ʉshako hale nawe, kʉshangwa bikwirire kw'ɨwe ɨhetsya ekɨthambo kɨgʉma ky'oko mʉbɨrɨ awe, kʉlenga omʉbɨrɨ awe woshi ɨgʉshwa kw'ɨrʉnga.»

31 «Na kandɨ mokwanegenwa kʉthɨ: "Yo wamakamba mʉkatsɨwe nɨamʉha marʉba w'erɨkamba."* 32 H'ingye enyɨbabwɨra nyɨthɨ: "Omuyira amakamba mʉkatsɨwe lɨthalɨ bʉshana na rʉsɨngɨ, nɨamamʉyɨramo mʉshɨngɨtsɨ, n'omuyira amahikya yo ʉthakambwa, naye nɨamasɨngɨra."»

33 Kandɨ momwonvwa ko bo sho-kʉlʉ mobabwɨrwa mbʉ: «Nɨ ʉthalahɨtsya bya mabesɨ, hewethuwe ʉkole nga ko walahɨtsyaga embere ya Nyinya-kowethʉ*. 34 H'ingye enyɨbabwɨra nyɨthɨ, muthanalinda mwalahɨtsya ibye ko lʉbʉla kʉshangwa kyo kifumbi kya Gongo. 35 Mʉthalahɨtsyaga na ko kɨthaka kʉshangwa kyo kiryathiro kya Gongo. Mʉthalahɨtsyaga ibye ko muyi w'ɨYerʉsalemʉ kʉshangwa wo muyi w'oMwamɨ mʉkʉlʉ. 36 Ʉthalahɨtsyaga n'oko muthwe awe, kʉshangwa uthangakotsya ɨyɨra mo lʉtswɨrɨ lwawe lʉgʉma mo lʉfwɨ kʉtse mo lwirafulu. 37 Mʉlɨ omʉnegena, mʉnegene mʉthɨ: "Ega" kʉtse "Ɨhɨ" n'ebɨndɨ byoshi kʉlenga ebyo, ebɨthoka ewa mubihya Sitani.»

38 «Momwonvwa ko mokwanegenwa kʉthɨ: "Lisho ku lisho, na lino ku lino."* 39 Hewethuwe, ingye enyɨbabwɨra nyɨthɨ, muthakubisaniaga na mʉndʉ mʉbɨ. Hewethuwe omʉndʉ amakʉbanda ikofi kw'ithema ly'amalyo, mʉthege na ery'amalembe. 40 Na mʉndʉ mʉlebe amakusitaka bʉshana akʉnyagʉle esimisi awe, umulikire n'ekoti. 41 Mʉndʉ amakuhathikania athɨ ʉheke butikaki kʉ lʉgendo lwa kilometere kɨgʉma, nɨwahekabo kʉ bilometere bɨbɨrɨ. 42 Mʉndʉ amakʉshaba nɨwamʉha, na mʉndʉ amashondya ɨyɨbweka kw'ɨwe uthamukangaya omʉgongo.»

43 «Momwonvwa ko mokwanegenwa kʉthɨ: "Tsɨɨra omuhimbani awe, na ʉbage enzigu awe."* 44 Hewethuwe ingye enyɨbabwɨra nyɨthɨ, mʉtsɨɨre esonzigu senyu, na mʉshabɨre bo babanubya. 45 Mwamayɨwatha muthyo nimwabya kwenene bana ba Thatha wenyu yo ʉlɨ mo lʉbʉla. Kʉshangwa anakoletsya erɨtsʉba lɨwe ly'oko babʉya n'oko babɨ, n'ɨwɨsa envʉla ko bo bathʉnganene na bo bathathʉnganene. 46 Kʉshangwa mwamatsɨɨra bo babatsiire kuroshi, lʉhembo lʉhe lo mwangabona? N'abakarani b'ekoli bathalɨ abana kola bathyo? 47 Na mwamaketsya bagala benyu basha, nɨmwamakola kɨhe ekɨthahera kyathakolwa? Bo bathɨkɨrɨtsye nabo bathalɨ abanakola bathyo? 48 Aho, imwe mubye bathʉnganene nga Thatha wenyu w'elʉbʉla kw'athʉnganene*.»