1 Yesʉ abere andagala ko kɨthwa, bandʉ bangɨ kʉtsɨbʉ mobamʉkwama. 2 Aho mʉbenzɨ mʉgʉma mwayɨfʉnda hofɨ naye n'ɨfʉkama embere sɨwe n'ɨmʉbwɨra athɨ: «Nyinya-kowethʉ, wamashasha, wanganyetsya.» 3 Yesʉ mwalambʉla okʉboko n'ɨmʉkolako, n'ɨnegena athɨ: «Nyishashire, ʉlame!» Aho n'aho omʉndʉ oyo Yesʉ mwetsya ebɨbenzɨ bɨwe. 4 Honyuma kw'aho Yesʉ mwamʉbwɨra athɨ: «Hʉlɨkɨrɨtsya kʉbʉya, uthanalinda wabwɨraga mʉndʉ woshi-woshi y'ekɨnwa eki. Hewethuwe uyayikangye ko muheri, honyuma kw'aho ʉlethe ebɨhembo nga ko Mʉsa ahamʉlaga, kw'ikangania ko bandʉ boshi ko wamalama.»*

5 Mo ndambi Yesʉ agendaga ɨngɨra mo muyi w'ɨKaperenaʉmʉ, mʉkʉlʉ mʉgʉma w'abashirikani b'aBaroma mwayɨfʉnda hofɨ naye n'ɨmʉshaba kʉtsɨbʉ amuwathikye, 6 n'ɨnegena athɨ: «Nyinya-kowethʉ, omukoli aye ayilambikire ko ngɨngo mw'eka, alwere makonongola na agalwa kʉtsɨbʉ.» 7 Yesʉ mwamʉbwɨra athɨ: «Ingye, nyayamulamya.» 8 Hewethuwe omʉkʉlʉ w'abashirikani* oyo mwamʉshʉbɨtsya athɨ: «Nyinya-kowethʉ, Nyɨthatholere wɨngɨre omwaye. Hewethuwe, negena kɨnwa kɨgʉma kuroshi omʉgombe aye alama. 9 Nangye enyɨnathegekwa n'abakʉlʉ baye, na kuthyo nyiwithe bashirikani bo nyɨnathegeka. Nyamabwɨra mʉgʉma nyɨthɨ: "Genda" nɨagenda, na nyamabwɨra ogʉndɨ nyɨthɨ: "Hika" niahika, na nyamabwɨra omʉgombe aye nyɨthɨ: "Kola kɨrebe" naye nɨakolakyo.» 10 Yesʉ abere onvwa ebɨnwa ebyo, mwashweka kʉtsɨbʉ na mwabwɨra aboshi bo babyaga bamukwamire athɨ: «Enyɨbabwɨra ekwenene, nyɨthahera nyathashʉnga mʉndʉ uwithe lwɨkɨrɨtsyo lʉngana n'olu mo Isiraeli yoshi. 11 Kandɨ enyɨbabwɨra, bandʉ bangɨ bandathoka ko bʉbʉkɨra ɨtsʉba n'abandɨ ko bʉlengera ɨtsʉba nabo bandalya linye mo Bwamɨ bw'elʉbʉla hagʉma na Abʉrahamʉ na Isaka na Yakobo. 12 Hewethuwe abo babɨkɨrawa oBwamɨ bandagʉshwa embʉga mo mwitsimya, eyo bandalɨra n'ishya ameno.»

13 Honyuma kw'aho Yesʉ mwabwɨra omʉkʉlʉ w'abashirikani oyo athɨ: «Shʉba ewawe, ʉkolerwe nga ko ʉthɨkɨrɨtsya!» Aho n'aho omukoli w'omʉkʉlʉ w'abashirikani mwalama.

14 Yesʉ mwɨngɨra omwa Petero. Mweyamo nyatsala wa Petero nɨalɨ mo ngɨngo, bʉshana n'akapururu. 15 Mwamʉkolako ko kʉboko n'akapururu mokamulika, mwimana n'ɨthanga ɨkolera Yesʉ. 16 Bwabere bwagoroba, mobalethera Yesʉ yo bandʉ bangɨ bo babyagako mɨtsɨmʉ mɨbɨ. Mʉ kɨnwa kɨgʉma, Yesʉ mwabɨnga emɨtsɨmʉ eyo, na mwalamya abakoni boshi. 17 Mwakola ebyo bʉshana kɨbererere ekɨnwa ky'omʉmɨnyeretsɨ Isaya ekinegenire kɨthɨ: «Mwatsɨmba obʉthethera bwethʉ na mwaheka amakoni ethʉ.»*

18 Yesʉ abere ashʉnga omuhindano woshi w'abyaga amuthimbireko, mwahamʉla abɨga bʉwe athɨ bashabʉkɨre ko ʉndɨ mwishirya w'engetsɨ. 19 Mʉkangɨrɨtsya mʉgʉma w'oMʉgomba mwayɨfʉnda hofɨ naye n'ɨmʉbwɨra athɨ: «Mʉkangɨrɨtsya, nyandakʉkwama ahoshi wandaya.» 20 Yesʉ mwamʉshʉbɨtsya athɨ: «Emɨtherere yiwithe mashamba n'ebɨronge biwithe nyʉthʉ, he oMʉgala w'oMʉndʉ athawithe ah'erihira omuthwe.»

21 Na ʉndɨ mʉgʉma w'oko bɨga bʉwe mwamʉbwɨra athɨ: «Nyinya-kowethʉ, nyɨtsɨɨre nyathathanga ɨyatha thatha.» 22 Hewethuwe Yesʉ mwamʉshʉbɨtsya athɨ: «Nyɨkwame na lika abaholi bathe abaholi babo.»

23 Yesʉ mwashambɨra mo bwatho n'abɨga bʉwe mobagendania naye. 24 Aho n'aho, mo ngetsɨ mokwahʉlʉka kɨhʉnga kɨnene, n'emibimbi moyagenda eyɨshwɨka obwatho. He Yesʉ abyaga niayiretho. 25 Abɨga bʉwe mobayɨfʉnda hofɨ naye n'imubukya nɨabahambala bathɨ: «Nyinya-kowethʉ, thʉshabʉle! Thwahwa!» 26 Yesʉ mwabwɨrabo athɨ: «Omʉbaha bʉshana na ki? Bandʉ ba lwɨkɨrɨtsyo lʉke!» Aho mwimana, mwakemera ekɨhʉnga n'engetsɨ, na mokwabya shereri nene. 27 Abandʉ boshi mobashweka nɨabanegena bathɨ: «Nɨ mʉndʉ mʉhanda ki oyu yo ekɨhʉnga n'engetsɨ ebimushikya?»* Yesʉ abombetsya engetsɨ

28 Yesʉ abere ahika ko ʉndɨ mwishirya w'engetsɨ, mo kɨhʉgo ky'aBangendari*, bandʉ babɨrɨ mobafʉmba mo masɨnda na mobaya hindana naye. Abandʉ abo babyagako mɨtsɨmʉ mɨbɨ, babyaga manishe ihika ko kɨka hathabyaga mʉndʉ wangatsukire mo nzɨra eyo. 29 Aho mobathanga ɨhambala bathɨ: «Uthushondyako ki Mʉgala wa Gongo? Uthahika hano bʉshana n'ɨthwagatsya embere y'endambi yahirawaho?»

30 Hale hake kʉbo habyaga kihyo kɨnene kya ngʉlʉbe sosagendaga esɨkera bɨthɨ.* 31 Emɨtsɨmʉ mɨbɨ moyashaba Yesʉ yɨthɨ: «Wamathʉbɨnga, thʉthʉme mo kihyo ky'esongʉlʉbe eki.» 32 Yesʉ mwabwɨra emɨtsɨmʉ eyo athɨ: «Mʉgende.» Aho, emɨtsɨmʉ mɨbɨ moyathoka mo bandʉ abo n'ɨya mo so ngʉlʉbe. Aho n'aho ekihyo kyoshi mokyathoka elʉgʉlʉ w'ekɨkʉbo, mokyathogongera mo ngetsɨ n'ɨfwɨra mo metsi. 33 Abalishya b'esongʉlʉbe mobashaga, mobahika mo muyi n'ɨfʉlɨra abandʉ b'omwatsɨ na byo bɨthakoleka ko bandʉ babɨrɨ bo bathalɨko emɨtsɨmʉ mɨbɨ. 34 Aho, abandʉ boshi b'omo muyi oyo mobahʉlʉka n'ɨya hindana na Yesʉ, babere bamʉshʉnga, mobamʉshaba kʉtsɨbʉ athoke mo kɨhʉgo kyabo.