1 «Mʉthagenda omʉsoha abandɨ, nemwe kutyo nɨmo Gongo athɨndabasohe. 2 Kʉshangwa Gongo andabasoha nga k'omʉsoha abandɨ, na kandɨ andabalengera mo lʉlengo lo mʉlengeramo abandɨ. 3 Bʉshana na ki oʉshʉnga ko kathɨ kalɨ mo lisho lya mʉgala enyu, he uthashungire ko kithika kɨrɨ mo lisho lyawe? 4 Ʉthɨ ko wangabwɨra mʉgala enyu ʉthɨ: "Lika nyithokye akathɨ ko kalɨ mo lisho lyawe" mo ndambi mo lisho lyawe nɨmʉnalɨ ekithika? 5 Ɨwe muyimbya, thanga wathokya ekithika kɨrɨ mo lisho lyawe, aho nɨmo walola kʉbʉya nɨmo wakotsya ithokya ekɨthɨ kɨrɨ mo lisho lya mʉgala enyu.

6 «Mʉthahaga esombwa s'ebɨndʉ bibuyirire, kʉshangwa sɨthababɨndʉkɨraga n'ɨbabʉlɨranga na mʉthagʉshaga obʉlema bwenyu bwa kɨtsɨro bw'embere y'esongʉlʉbe bʉshana sithalyathangagabo.»

7 «Mʉgende omʉshaba nɨmo mwahabwa, mʉgende omushondya nɨmo mwabona, mʉgende omʉkongotha ko luyi nɨmo mwakɨngʉlɨrwa. 8 Kʉshangwa bʉlɨ mʉndʉ yo ʉshaba anahabwa, n'oyo ushondya yo ʉnabona. N'oyo ʉkongotha ko luyi anakɨngʉlɨrwa. 9 Nɨ ndɨ mo kathi kenyu y'omwana ʉwe angamʉshaba mukati nɨamʉha ibwe? 10 Kʉtse amamʉshaba ihere nɨamʉha nzoka? 11 Imwe bandʉ babɨ mwetsi ɨha abana benyu bw'ebɨndʉ bikwirire. Ɨsho wenyu yo ʉlɨ mo lʉbʉla andagenda aha abo bamʉshaba bo bɨndʉ bikwirire kalengyo!

12 «Mʉgende omʉkolera abandɨ bw'ebyoshi omushondya babakolere. Nɨ ebyo byo bɨkangɨrɨtsɨbwa mo bɨtabo by'oMʉgomba wa Mʉsa na mo by'abamɨnyeretsɨ.»*

13 «Mʉgende omwɨngɨra mo lukyo lʉfʉnda! Kʉshangwa olukyo lo lʉlotsya kw'ibihibwa nɨ lʉgalɨ, n'enzɨra yo yɨlotsyayo nɨ nene, n'abandʉ bo batsʉka mo nzɨra eyo nɨ bangɨ. 14 Hewethuwe olukyo lo lulolitsye ko bʉyɨngo nɨ lʉfʉnda, n'enzɨra y'erɨngɨra mo bʉyɨngo obo nɨ nge. N'abandʉ bo bakwama enzɨra eyo nɨ bake kʉtsɨbʉ.»

15 Mʉgende omuyitheya ko bamɨnyeretsɨ b'amabesɨ. Kʉshangwa abanabahikira ni bambithe ngobi sa mbuli, hewethuwe emwishi sabo nɨ nyambwe nzɨbʉ. 16 Mwandamɨnyɨrabo ko mɨbere yabo. Abandʉ bathatsa ebiguma by'emisabibu by'oko mɨthɨ y'emɨgando, kʉtse ebiguma by'omutini by'oko mɨshakɨ-shakɨ. 17 Omʉthɨ mʉbʉya anaheka biguma bɨbʉya, na kuthyo omʉthɨ mʉbɨ anaheka biguma bɨbɨ. 18 Omʉthɨ akwirire athangaheka biguma bɨbɨ, kʉtse omʉthɨ mʉbɨ athangaheka biguma bikwirire. 19 Obʉlɨ mʉthɨ ow'athahekire biguma bikwirire anatsɨbwa n'ɨgʉshwa mo mʉtsanwa. 20 Aho mwandamɨnyɨra abamɨnyeretsɨ b'amabesɨ ko byo banakola.

21 «Athalɨ bʉlɨ mʉndʉ yo ʉnyahʉlamo "Nyinya-kowethʉ, Nyinya-kowethʉ!" yo wandɨngɨra mo Bwamɨ bw'elʉbʉla, hewethuwe nɨ yo ʉkola erishondya lya Thatha yo ʉlɨ elʉbʉla. 22 Bandʉ bangɨ bandanyɨbwɨra ekɨro ekyo bathɨ: "Nyinya-kowethʉ, Nyinya-kowethʉ, ndɨ unetsi ko mothwakola bʉmɨnyeretsɨ kw'ɨtsɨna lyawe, kandɨ mothwabɨnga emɨtsɨmʉ mɨbɨ kw'ɨtsɨna lyawe, na kandɨ mw'ɨtsɨna lyawe mothwakola bɨthɨko-thɨko bɨngɨ!" 23 Aho nyandabwɨrabo nyɨthɨ: "Ingye nyɨthahera nyathabamɨnya na hake, mʉthoke hofɨ nangye imwe bakoli b'ebɨbɨ."»

24 «Aho obʉlɨ mʉndʉ yo wonvwa ebɨnwa byaye n'ɨkolabyo, angashoshekanibwa na mʉndʉ mwenge yo wahimbaga enyʉmba yɨwe yo kw'ibwe. 25 Envʉla moyawa, emibimbi y'esonyitsi moyahika, n'ekɨhʉnga mokyabya, mokyayihuma ko nyʉmba eyo he moyɨthathera, kʉshangwa omʉsɨngɨ waro abyaga kw'ibwe. 26 Hewethuwe obʉlɨ mʉndʉ yo onvwa ebɨnwa ebyo nyɨthoka ɨnegena bʉthakolabyo, ashoshekanibwe n'omʉndʉ kahʉmo yo wahimbaga enyʉmba yɨwe y'oko mʉshege. 27 Envʉla moyawa, emibimbi y'esonyitsi moyahika, ekɨhʉnga mokyabya, mokyayihuma ko nyʉmba eyo naro moyathera na moyashambʉkala kʉtsɨbʉ.»

28 Yesʉ abere amamala ɨnegena ebɨnwa ebyo, aboshi mobashwekera kʉtsɨbʉ Makangɨrɨtsya ʉwe, 29 kʉshangwa mwathakangɨrɨtsyabo ng'abakangɨrɨtsya babo b'oMʉgomba. Hewetuwe ɨye agenda akangɨrɨtsyabo nga mʉndʉ wa maka.