1 Aho aBafarisayo hagʉma n'aBakangɨrɨtsya b'oMʉgomba bagenda abathoka ɨYerʉsalemʉ. Mobahikira Yesʉ n'ɨmʉbʉtsya bathɨ: 2 «Bʉshana na ki abɨga bawe abahaba ko mɨbere ya bo thatha-kʉlʉ? Kʉshangwa bathalɨ abananaba ko minwe embere balye.*» 3 Yesʉ mwashʉbɨtsyabo athɨ: «Nemwe bʉshana na ki omʉnahaba ko Mʉgomba wa Gongo mw'ɨkwama emɨbere enyu? 4 Kʉshangwa Gongo mwanegena athɨ: "Shikya sho na nyoko," na kandɨ yo ʉthakɨra ishe na nyinya lɨtholere n'ithwa.* 5 Hewethuwe imwe omʉnanegena mʉthɨ: "Omʉndʉ amabwɨra ishe kʉtse nyinya athɨ: Obuwathikya bo nyangakʉhere bʉshana n'ikuwathikya, nɨ bʉhere bo nyamalire ithegekania bʉshana n'ɨhabo Gongo." 6 Aho nɨomʉnegena mʉthɨ bɨthakɨtholere ishikya ishe kʉtse nyinya mo buwathikya obo. N'aho mwamalire ibihya eKɨnwa kya Gongo bʉshana n'erishikya emɨbere enyu. 7 Imwe bayimbya! Isaya mwamɨnyerera kʉbʉya bʉshana nemwe, abere anegena athɨ:

8 "Abandʉ aba banyishikitsye mo bʉnʉ

hewethuwe emɨthɨma yabo yɨrɨ hale nangye kʉtsɨbʉ.

9 Erinyiramya lyo banyiramya nɨ lya bʉsha-bʉsha.

Kʉshangwa amakangɨrɨtsya awo abakangɨrɨtsya nɨ mathegeko wa bandʉ."*»

10 Honyuma kw'aho Yesʉ mwashʉba bɨrɨkɨra omuhindano n'ɨnegena athɨ: «Mʉhʉlɨkɨrɨtsye na mʉmɨnye kʉbʉya. 11 Kɨthalɨ ekyo ekɨnɨngɨra mo bʉnʉ bw'omʉndʉ kyo kinamubihya. Hewethuwe nɨ ekyo kɨthoka mo bʉnʉ bʉwe, kyo kinamubihya.»

12 Aho abɨga mobayɨfʉnda hofɨ naye n'ɨmʉbwɨra bathɨ: «Wetsi ko aBafarisayo bathabere bonvwa ekɨnwa ekyo mobagalɨrwa kʉtsɨbʉ?» 13 Yesʉ mwashubya athɨ: «Omwaka woshi wo Thatha w'omo lʉbʉla athaheraga andakʉlwa. 14 Mulikebo, abo nɨ mbumi bobashondolere esombumi! N'embumi yamashondolera eyɨndɨ mbumi, ababɨrɨ boshi nɨbathogera mo kyuna.»

15 Aho Petero mwashubya n'ɨmʉbwɨra athɨ: «Thʉsonzomolere omushinga oyu.» 16 Yesʉ mwashubya athɨ: «Nemwe kuthyo muthetsi mwamɨnya kʉbʉya? 17 Muthetsi kw'ebyoshi byo bɨnɨngɨra mo bʉnʉ bw'omʉndʉ ebɨnatsʉka mo nda, na honyuma kw'aho nɨbyagʉshwa mo bwɨga? 18 Hewethuwe ebyo bɨthoka mo bʉnʉ ebɨnathoka mo mʉthɨma. N'ebyo byo binabihya omʉndʉ. 19 Kʉshangwa mo mʉthɨma momʉnathoka emɨganɨtsye mɨbɨ, obwithi, orʉsɨngɨ, erɨgenda na muyira wa bene kʉtse erɨgenda na mʉkatsɨ wa bene, bwɨtsɨ, erɨrega abandɨ, n'erihangya. 20 Ebyo, byo binabihya omʉndʉ! Hewethuwe erirya bʉthanaba ko minwe lithabihya mʉndʉ.»

21 Yesʉ mwathoka aho mwaya mo kɨhʉgo ky'iTiro na ky'iSitona. 22 Aho, mʉkatsɨ mʉgʉma Mʉkanana yo wabyaga ikere mo kɨhʉgo ekyo, mwamuhikira nɨahambala athɨ: «Nyinya-kowethʉ, Mʉgala wa Tawiti, nyɨshashɨre! Omʉthasha aye alɨko mɨtsɨmʉ mɨbɨ, eyɨmwagatsya kʉtsɨbʉ!» 23 Hewethuwe Yesʉ mwathamʉshʉbɨtsya kɨnwa n'ekɨgʉma. Abɨga bʉwe mobayɨfʉnda hofɨ naye n'ɨmʉshaba bathɨ: «Mʉshʉbʉtsye, kʉshangwa athukwamire n'ɨthʉkendetsya mw'ɨhambala lɨwe.» 24 Yesʉ mwashubya athɨ: «Nyɨthathʉmawa lɨthalɨ ko bana b'iIsiraeli bo balɨ nga mbuli siherire.» 25 Hewethuwe omʉkatsɨ oyo mwahika n'ɨfʉkama embere sɨwe n'ɨnegena athɨ: «Nyinya-kowethʉ, nyiwathikye!» 26 Yesʉ mwashubya athɨ: «Lithakwirire ɨtsɨmba akalyo k'abana n'ɨgʉshɨrako esombwa.» 27 Omʉkatsɨ oyo mwamʉbwɨra athɨ: «Nɨ kwenene mbe Nyinya-kowethʉ, ndɨ n'esombwa natho esinalya ebɨshakɨtsya byo bɨnathogonga ko lʉwalɨ lwa bo nyinya-kowabo.» 28 Aho Yesʉ mwamʉshʉbɨtsya athɨ: «Mʉkatsɨ, olwɨkɨrɨtsyo lwawe nɨ lʉnene! Bibye kw'ɨwe nga ko ushashire.» N'omʉthasha ʉwe mwalama kona kathambi ako.

29 Yesʉ mwathoka eyo, mwatsʉka emʉsɨke w'engetsɨ y'iNgalilaya. Mwɨrʉkɨra ko kɨthwa na mwikalako. 30 Bandʉ bangɨ mobamuhikira, nɨabamʉlethera ebɨrema, esombumi, bo bashyonogera, ebirumbu na bandɨ bakoni bangɨ. Mobahirabo embere sa Yesʉ, naye mwalamyabo. 31 Abandʉ mobashweka babere bashʉnga ebirumbu byanegena, na bo bashyonogera bayɨsɨngɨka kʉbʉya, n'ebɨrema byagenda n'esombumi salola. Na mobasingya Gongo w'iIsiraeli.

32 Yesʉ mwabɨrɨkɨra abɨga bʉwe n'ɨbwɨrabo athɨ: «Nyamafwɨra abandʉ aba bo shashi, kʉshangwa byahera bɨro bɨshathʉ banalɨ nangye, na bathawithe kalyo. Kandɨ nyɨthalɨ enyishondya ɨshʉbʉtsyabo nɨ banawirire, bathangalekʉlɨra mo nzɨra.» 33 Abɨga bʉwe mobamʉbwɨra bathɨ: «Thwabona mikati yo hayi mo mbwarara eno y'eryuguthya omuhindano mʉngana n'oyu?» 34 Yesʉ mwabwɨrabo athɨ: «Muwithe ku mikati ɨngahɨ?» Mobamʉshʉbɨtsya bathɨ: «Thuwithe ku mikati ɨrɨnda na thʉhere thʉlɨ bʉlebe.» 35 Aho mwahamʉla omuhindano bikale ahishi. 36 Mwatsɨmba emikati ɨrɨnda eyo n'amahere, mwasɨma Gongo, mwatsitsangabyo n'ɨhabyo abɨga bʉwe, n'abɨga bʉwe mobagabɨrabyo abandʉ. 37 N'aboshi mobalya n'iugutha. Abɨga mobaheka bɨthonga bɨrɨnda byotswiremo ebɨshakɨtsya. 38 Bo balyaga babyaga bayira bɨhʉmbɨ bɨne, bʉthaganza abakatsɨ n'abana.

39 Honyuma kw'aho Yesʉ abere amamala ɨlaga omuhindano, mwashambɨra mo bwatho, mwaya mo kɨhʉgo ky'iMangandani.