1 Ko ndambi eyo, abɨga mobayɨfʉnda hofɨ na Yesʉ n'ɨmʉbʉtsya bathɨ: «Nɨ ndɨ yo mʉkʉlʉ mo Bwamɨ bw'elʉbʉla?» 2 Yesʉ mwabɨrɨkɨra mwana mʉlere, mwamuhira mo kathi-kathi kabo, 3 n'ɨnegena athɨ: «Kwenene enyɨbabwɨra, muthabindukire n'ibya nga bana balere, mʉthɨndɨngɨre mo Bwamɨ bw'elʉbʉla. 4 Yo wandayɨyɨra ng'omwana mʉlere oyu, oyo yo mʉkʉlʉ mo Bwamɨ bw'elʉbʉla. 5 Omʉndʉ yo ukokya omwana mʉlere ng'ono mw'ɨtsɨna lyaye, n'ingye amakokya.

6 «Hewethuwe yo wandaleka mʉgʉma w'oko bana bo banyɨkɨrɨtsye aba nɨathera, kyangabere kɨbʉya kw'ɨye ɨmɨnɨrwako lushyo lʉnene mw'igosi n'ɨgʉshwa mw'iriba ly'engetsɨ. 7 Bʉhanya ko bandʉ b'ekɨhʉgo bʉshana n'ebyo ebɨreka abandʉ nɨbakola bɨtsɨbʉ! Kʉshangwa ebyo bɨnaleka abandʉ nɨbakola ebɨtsɨbʉ bɨthangabʉsha ihika, hewethuwe bʉhanya ko mʉndʉ yo wandaleka nɨbyabya! 8 Aho okʉboko kwawe kʉtse ekɨshando kyawe byamabya nɨbyangaleka nɨwakola ekɨtsɨbʉ, tsabyo na ʉgʉshebyo hale nawe, kʉshangwa bikwirire kw'ɨwe ɨngɨra mo bʉyɨngo bw'ekera n'ekera na kʉboko kʉgʉma kʉtse kʉgʉlʉ kʉgʉma, kʉlenga erɨgʉshwa mo mʉtsanwa wa kera n'ekera na maboko abɨrɨ kʉtse na magʉlʉ abɨrɨ. 9 N'erisho lyawe lyamabya nɨlyangaleka nɨwakola kɨtsɨbʉ, ʉkʉlelyo na ʉgʉsheryo hale nawe! Likwirire kw'ɨwe ɨngɨra mo bʉyɨngo bwa kera n'ekera na lisho ɨgʉma kʉlenga kw'ɨgʉshwa mo mʉtsanwa w'okwɨrʉnga* na mesho abɨrɨ.

10 «Muyitheye mʉthasʉnzʉgʉraga mʉgʉma w'oko balere aba, kʉshangwa enyɨbabwɨra mo lʉbʉla abamalaɨka babo bimene bʉthalʉha embere sa Thatha yo ʉlɨ mo lʉbʉla. [11 Kʉshangwa oMwana w'oMʉndʉ ahikaga bʉshana n'ɨshabʉla bo baherire.*]

12 «Omʉganɨtsya kw'ebi ko muthi ki? Omʉndʉ amabya niawithe ku mbuli sɨwe igana, n'engʉma ya kʉtho yamahera, athangamika esɨndɨ makumi mwenda na mwenda ko kɨthwa bʉshana n'ɨya shondya yo yɨthahera? 13 Na amahika kw'ɨbonaro, kwenene enyɨbabwɨra, anamogeraro kʉlenga esombuli makumi mwenda na mwenda sosɨthathahera. 14 Na kuthyo Thatha wenyu yo ʉlɨ elʉbʉla athatsiire erɨhera ly'omʉgʉma w'oko balere aba.»

15 «Mʉgala enyu amakʉkolera kɨtsɨbʉ, genda ʉyamʉhane, mubye imwe babɨrɨ kuroshi. Amakw'onvwa, nɨwamabona mʉgala enyu. 16 Hewethuwe amathɨnda ɨkwonvwa, shʉbatsɨmba mʉndʉ mʉgʉma kʉtse babɨrɨ hagʉma nawe, kʉshangwa "obʉlɨ mwatsɨ nɨatsɨwa ko kɨnwa kya batimo babɨrɨ kʉtse bashathʉ."* 17 Hewethuwe amathɨnda ɨbonvwa, nɨwabwɨra akanisa, na amathɨnda ɨonvwa akanisa, ʉmʉtsɨmbe nga mʉndʉ uthetsi Gongo, kʉtse nga mukarani wa koli.

18 «Kwenene enyɨbabwɨra, ebyoshi byo mwandamɨna ko kɨhʉgo, byandamɨnwa n'omo lʉbʉla. N'ebyoshi mwandamɨnʉla mo kɨhʉgo, byandamɨnʉlwa n'omo lʉbʉla.*

19 «Kandɨ enyɨbabwɨra kwenene, bandʉ babɨrɨ mw'imwe ko kɨhʉgo bamalagana bʉshana n'ɨshaba kɨndʉ kyoshi-kyoshi, ekyo bandahabwakyo na Thatha yo ʉlɨ mo lʉbʉla. 20 Kʉshangwa ho bandʉ babɨrɨ kʉtse bashathʉ bahindene bʉshana n'erɨtsɨna lyaye, nagye nɨnyɨrɨ mo kathi-kathi kabo.»

21 Aho Petero mwagendera Yesʉ n'ɨmʉbʉtsya athɨ: «Nyinya-kowethʉ, mʉgala ethʉ amanyɨhabɨra nyangamʉshashɨra ngendo sɨngahɨ? Ihika kʉ ngendo sɨrɨnda?» 22 Yesʉ mwamʉshʉbɨtsya athɨ: «Nyithakubwire nyɨthɨ ngendo sɨrɨnda, hewethuwe kalɨnda ngendo makumi alɨnda*.»

23 «Bʉshana n'eki, oBwamɨ bw'elʉbʉla bushoshire nga mwamɨ mʉgʉma yo washondyaga ɨkola mɨganzo y'eminda yo abakoli bʉwe babyagako. 24 Abere athanga ɨganza, mobamʉlethera mukoli mʉgʉma yo wabyagako mwinda ʉwe wa talanta* bɨhʉmbɨ ikumi. 25 Omʉndʉ oyo kʉshangwa abyaga niathawithe s'erɨmʉfʉha, aho nyinya-kowabo mwahamʉla agʉtsɨbwe ɨye na mʉkatsɨwe n'abana bʉwe n'ebyoshi abyaga awitheko, bʉshana n'ɨfʉha omwinda ʉwe. 26 Omukoli oyo mwafʉkamɨra nyinya-kowabo n'ɨmʉbwɨra athɨ: "Thathʉma, nyandakʉfʉha esoshi!" 27 Nyinya-kowabo mwafwɨra omukoli ʉwe yo shashi, na mwamʉganyɨra omwinda oyo n'imulika agende. 28 Omukoli oyo abere ahʉlʉka, mwahindana na mʉgʉma wa ku balikyabo yo wabyagako mwinda ʉwe wa bɨtsere igana bya tinari*. Mwamʉtsɨmbɨra mw'igosi, n'ɨmʉsɨmatha kʉtsɨbʉ niashondya imuniga, n'ɨmʉbwɨra athɨ: "Nyɨfʉhe omwinda aye!" 29 Mulikyabo oyo mwawa ko bɨshando bɨwe n'ɨmʉgonga-gonga athɨ: "Thalɨnda, nyandakʉfʉha omwinda awe!" 30 Hewethuwe mulikyabo oyo mwathɨnda kʉtsɨbʉ n'ɨyamʉgʉsha mo muliki ihika ko ndambi andafʉha omwinda ʉwe. 31 Abandɨ bakoli balikyabo babere bashʉnga ebyo, mobabya n'obuliye bʉngɨ n'ɨyabwɨra nyinya-kowabo ebyoshi byo byamatsʉka. 32 Aho nyinya-kowabo oyo mwabɨrɨkɨra omukoli oyo n'ɨmʉbwɨra athɨ: "Ɨwe ʉlɨ mukoli mʉbɨ! Monyakushashire omwinda awe woshi, kʉshangwa mowanyishabire nyɨkʉshashɨre. 33 Nawe kuthyo ʉthangabere na shashi ku mulikyenyu nga ko nyakʉshashɨraga?" 34 Nyinya-kowabo mwakapɨkɨra lɨwe, mwamuhira mo minwe y'abatheya b'ebiriso bʉshana bamwagatsye ihika ko kɨka andafʉha omwinda ʉwe woshi.»

35 Ko nduli Yesʉ mwanegena athɨ: «Ni bathyo ko Thatha w'elʉbʉla andakolera bʉlɨ mʉndʉ mw'imwe yo ʉthangashashɨra mʉgalabo n'omʉthɨma ʉwe woshi.*»