1 «Ekɨro ekyo, oBwamɨ bw'elʉbʉla bwandashosha nga banyere ikumi bo batsɨmbaga esotara sabo bʉshana bayalɨndɨrɨre omuherukya. 2 Bathano ba mʉbo babyaga thʉhʉmo n'abandɨ bathano babyaga benge. 3 Abo babyaga thʉhʉmo mobaheka so tara sabo bʉthaheka bitoroli by'ongerera mʉtho. 4 Hewethuwe, abenge ɨbo, mobaheka na mirangi ɨrɨmo bitoroli b'ihira mo tara sabo. 5 Hewethuwe, kʉshangwa omuherukya mwathahika tsʉba, abanyere boshi mobalʉha na mobayatho. 6 Mo kathi k'ekɨro, omʉlenge mw'onvwɨka athɨ: "oMuherukya yoyo! Muyamukokye!" 7 Aho, abanyere boshi abo, mobabʉka na mobathegekania eso tara sabo. 8 Othʉhʉmo mothwabwɨra abenge thʉthɨ: "Mʉthʉhe ko bitoroli byenyu, kʉshangwa so tara sethʉ sɨhera esɨtsɨma." 9 Abenge mobashubya bathɨ: "Ɨhɨ, ebitoroli thuwitheko nɨ bɨke kw'ithwe nemwe. Mʉgende eyɨrɨ abahingania mʉyɨgʉlɨre." 10 Othʉhʉmo mothwayagʉla bitoroli. Mo ndambi eyo, omuherukya mwahika. Abanyere bathano bo babyaga bawithe bitoroli mobɨngɨra naye mo kɨshenge ky'elinye ly'endwa, n'oluyi molwakɨngwa. 11 Honyuma kw'aho, abandɨ banyere mobahika nɨabanegena bathɨ: "Nyinya-kowethʉ, Nyinya-kowethʉ, thʉkɨngʉlɨre!" 12 Hewethuwe omuherukya mwashubya athɨ: "Kwenene enyɨbabwɨra, nyithabwetsi."»

13 «Yesʉ mwashʉba negena athɨ: "Muyitheye kʉshangwa muthetsi ekɨro kʉtse endambi nyandashʉbʉla."»

14 «oBwamɨ bw'elʉbʉla bwandabya nga ko muyira mʉgʉma yo walalɨtsyaga lʉgendo. Mwabɨrɨkɨra abakoli bʉwe n'iwathyabo obushoki bʉwe. 15 Mwaha mʉgʉma yo bɨtsere* magana athano bya horo, na ʉndɨ magana abɨrɨ, n'owa kashathʉ igana. Mwagabɨra ebɨtsere by'ehoro ko bʉlɨ mʉndʉ ɨkwamana n'akagala kʉwe. Honyuma kw'aho mwagenda. 16 Omukoli yo wahabawa ebɨtsere magana athano by'ehoro mwagenda ɨyakola buhingania mo faranga etho na mwathʉnda bɨndɨ bɨtsere magana athano bya horo. 17 Na kuthyo, yo wahabawa ebɨtsere magana abɨrɨ mwathʉnda bɨndɨ bɨtsere magana abɨrɨ. 18 Hewethuwe yo wahabawa bɨtsere igana mwayathima kyuna mo kɨthaka n'ibisha mʉkyo mw'esofaranga sa nyinya-kowabo. 19 Honyuma wa bɨro bɨngɨ, nyinya-kowabo abakoli abo mwashʉbʉla na mwathanga ɨkola nabo emɨganzo y'obushoki bʉwe. 20 Oyo wahabawa ebɨtsere magana athano by'ehoro mwayɨfʉnda embere n'ikangya nyinya-kowabo yo bɨndɨ bɨtsere magana athano n'ɨnegena athɨ: "Nyinya-kowethʉ, mowanyɨha bɨtsere magana athano bya horo. Monyathundire bɨndɨ magana athano, bye bɨno." 21 Nyinya-kowabo mwamʉbwɨra athɨ: "Wamakola kʉbʉya, ʉlɨ mukoli mʉbʉya na w'iyinihirwa. Mowabere w'iyinihirwa mʉ bɨndʉ bɨke, nyakʉyɨramo mwimanitsi wa bɨndʉ bɨngɨ. Hika ʉmoge hagʉma na nyinya-kowenyu." 22 Omukoli yo wahabawa ebɨtsere magana abɨrɨ bya horo mwayɨfʉnda embere, mwanegena athɨ: "Nyinya-kowethʉ, mowanyɨha bɨtsere magana abɨrɨ bya horo. Monyathundire bɨndɨ magana abɨrɨ, nabyo bye bɨno." 23 Nyinya-kowabo mwamʉbwɨra athɨ: "Wamakola kʉbʉya, ʉlɨ mukoli mʉbʉya na w'iyinihirwa. Mowabere w'iyinihirwa mʉ bɨndʉ bɨke, nyakʉyɨramo mwimanitsi wa bɨndʉ bɨngɨ. Hika ʉmoge hagʉma na nyinya-kowenyu." 24 Omukoli yo wahabawa ebɨtsere igana naye mwayɨfʉnda embere n'ɨnegena athɨ: "Nyinya-kowethʉ, nyikwetsi mo mʉndʉ mʉtsɨbʉ, ʉnagesha ho ʉthabɨbaga, ʉnakʉma-kʉma ho ʉthasanzaga. 25 Monyʉbaha na monyayabisha ebɨtsere byawe mo kɨthaka. Ewo, tsɨmba ebɨwawe." 26 Nyinya-kowabo mwamʉshʉbɨtsya athɨ: "Ʉlɨ mukoli mʉbɨ, mʉgatha! Wabyaga niwetsi kw'enyɨnagesha ho nyɨthabɨbaga na enyɨnakʉma-kʉma ho nyɨthasanzaga kɨndʉ! 27 Ewo, uthangahirire esofaranga saye mo bangɨ, na mw'ɨshʉbʉla lyaye, nyangathokitsyetho hagʉma n'endundi yatho. 28 Mʉmʉnyage ebɨtsere igana by'ehoro ebyo na mʉhebyo yo uwithe kʉ kɨhʉmbɨ. 29 Kʉshangwa obʉlɨ mʉndʉ yo uwithe kɨndʉ andahabwa kalengyo na andabya mʉ mʉkene, hewethuwe yo uthawithe kɨndʉ, andanyagʉlwa n'akake awitheko. 30 N'omukoli wa bʉsha-bʉsha oyu, mʉmʉgʉshe embʉga, mo mwitsimya, eyo alɨra n'ishya ameno."»

31 «Mo mʉgʉlʉ oMʉgala w'oMʉndʉ andabya ahika mo lʉkengerwa lʉwe hagʉma n'abamalaɨka boshi, andikala ko lʉthebe lʉwe lubuyirire lw'elyamɨ. 32 Ebɨhanda byoshi bya hano ishi byandahindana embere sɨwe na andagabania abandʉ bɨkembe bɨbɨrɨ nga k'omulishya anagabania sombuli n'esombene. 33 Andahira esombuli ko malyo ʉwe n'esombene ko malembe ʉwe. 34 Aho omwamɨ andabwɨra bo balɨ ko malyo ʉwe athɨ: "Muhike, momugashanirwe na Thatha, na mwɨngɨre mo Bwamɨ bo bwathegekanibawa bʉshana nemwe, ɨthoka ko kɨro ekɨhʉgo kyahangɨkawa. 35 Kʉshangwa monyafwa nzala momwanyɨha kalyo, monyafwa nyotha momwanyɨha metsi w'ɨshoma, nyabyaga mugeni momwanyikokya. 36 Nyabyaga ndumbu momwanyambikya, nyabyaga mukoni momwaya nyilungula, nyabyaga mo muliki momwitsa nyɨlolako." 37 Aho abathʉnganene bandamʉshʉbɨtsya bathɨ: "Nyinya-kowethʉ, kɨro ki kyo thwakʉshʉngaga uwirire mothwakʉha kalyo, kʉtse ufwire nyotha mothwakʉha metsi w'ɨshoma? 38 Kɨro ki kyo thwakʉshʉngagamo mugeni na mothwakukokya, ndumbu na mothwakwambikya? 39 Kɨro ki kyo thwakʉshʉngaga ʉlɨ mukoni kʉtse uminirwe mothwayakulungula?" 40 Omwamɨ andashʉbɨtsyabo athɨ: "Kwenene enyɨbabwɨra, obʉlɨ kɨndʉ mwakoleraga mʉgʉma w'oko bagala bethʉ balere kʉtsɨbʉ aba, n'ingye mwakoleragakyo."»

41 «Honyuma kw'aho, omwamɨ andabwɨra bo bandabya ko malembe ʉwe athɨ: "Mʉye hale nangye, imwe muthakirwe! Mʉye mo mʉtsanwa w'ekera n'ekera owanokibawa bʉshana na Sitani n'abamalaɨka bʉwe! 42 Kʉshangwa monyafwa nzala momʉthanyɨha kalyo, monyafwa nyotha momʉthanyɨha metsi w'ɨshoma. 43 Nyabyaga mugeni, momuthanyikokya. Nyabyaga ndumbu, momuthanyambikya. Nyabyaga mukoni na mʉndʉ wa muliki, momuthanyilungula." 44 Aho, bandashubya bathɨ: "Nyinya-kowethʉ, kɨro ki kyo thwakʉshʉngaga uwirire, kʉtse ufwire nyotha, kʉtse ʉlɨ mugeni, kʉtse ʉlɨ ndumbu, kʉtse ʉlɨ mukoni, kʉtse ʉlɨ mʉ muliki na mothʉthakʉlwako?" 45 Omwamɨ andashʉbɨtsyabo athɨ: "Kwenene enyɨbabwɨra, ko bʉlɨ kɨndʉ mʉthakoleraga mʉgʉma w'oko balere aba, ni ingye mʉthakolerakyo."» 46 Bandahabwa malipisi w'ekera n'ekera, he bo bakolaga ebɨthʉnganene, bandabya na bʉyɨngo bw'ekera n'ekera.*