11 Abandʉ babyaga nɨbane mwonvwa ebɨnwa byo Yesʉ agenda anegena, kʉshangwa abyaga nɨalɨ hofɨ n’ɨYerʉsalemʉ. Aho abandʉ bagenda abaganɨtsya ng’oBwamɨ bwa Gongo bʉlɨ hofɨ n’ihika. Bʉshana n’ekyo Yesʉ mwatsɨrabo ʉndɨ mushinga athɨ: 12 «Kwabyaga mʉndʉ mʉgʉma w’omo kɨhanda ky’elyamɨ abyaga niashondya ɨgenda mʉ kɨhʉgo kya hale bʉshana n’iyasingibwayo. Enyuma y’erisingibwa lɨwe angashubwire ayathegeke ekɨhʉgo kɨwe. 13 Embere agende ɨyasɨnga, mwabɨrɨkɨra bandʉ ikumi mo bakoli bʉwe. Mwaha bʉlɨ mʉndʉ yo kɨtsere kɨgʉma kya faranga,19:13 Kɨtsere kɨgʉma kya faranga: Ekɨtsere ekyo kyabyaga n’ɨkɨrɨngene n’olʉhembo lwa mɨbɨtsɨ igana. mwabwɨrabo athɨ: "Mʉkole buhingania mo bɨtsere ebyo ihika ko kɨro nyandashʉbʉla." 14 Hewethuwe abandʉ b’omo kɨhʉgo kɨwe nibamubayire. Bʉshana n’ekyo, mobamʉthʉmɨra bagendi enyuma kw’ɨye bamʉbwɨre ko bathalɨ abashondya abye mwamɨ wabo. 15 Hewethuwe omʉkʉlʉ oyo mwanasɨnga. Mwashʉba mo kɨhʉgo kɨwe. Abere ahika mwanegena athɨ bamʉbɨrɨkɨrɨre abakoli ikumi abo amikiraga ebɨtsere, kʉshangwa abyaga niashondya ɨmɨnya endundi yo bathabona mo buhingania bakolaga.
16 «Omukoli mʉmbere mwahika mwanegena athɨ: "Nyinya-kowethʉ, ekɨtsere wambaga mokyathʉndire bɨndɨ bɨtsere ikumi." 17 Nyinya-kowabo mwamʉbwɨra athɨ: "Wamakola! Ʉlɨ mukoli mʉbʉya. Kʉshangwa mowabya w’iyinihirwa kʉ bɨndʉ bɨke nyamakʉha maka w’ɨthegeka miyi ikumi."
18 «Omukoli wa kabɨrɨ naye mwahika n’ɨnegena athɨ: "Nyinya-kowethʉ, ekɨtsere wambaga mokyathundire bɨndɨ bɨthano." 19 Nyinya-kowabo mwamʉbwɨra athɨ: "Nawe kuthyo nyamakʉha maka w’ɨthegeka miyi ithano." 20 Honyuma kw’aho ogʉndɨ mukoli naye mwahika n’ɨnegena athɨ: "Nyinya-kowethʉ, shʉnga! Nyamakʉlethera ekɨtsere kyo wanyɨhaga. Ekɨtsere kɨno monyabɨkakyo kʉbʉya mʉ kakɨmba. 21 Monyakʉbaha kʉshangwa unabya muyira mʉtsɨbʉ. Ɨwe ʉnagenda ʉthola ekyo ʉthabɨkaga, na kandɨ ʉnagenda ʉhʉlʉla ebyo ʉthaheraga." 22 Nyinya-kowabo mwamʉbwɨra athɨ: "Ɨwe ʉlɨ mukoli mʉbɨ! Nyakʉsoha ɨkwamana n’emɨnegenere awe. Wabyaga niwetsi ko nyɨrɨ mʉtsɨbʉ, enyɨnagenda enyɨthola ebyo nyɨthathabɨka na kandɨ enyɨnahʉlʉla ebyo nyɨthaheraga. 23 Aho bʉshana na ki mogʉthabɨka ekɨtsere kyaye ky’omo nyʉmba yo banagenda ababɨkamo esofaranga? Na omw’ɨshʉbʉla lyaye, nyangathokitsye ky’omo n’endundi yakyo!" 24 Aho nyinya-kowabo mwabwɨra abandʉ bobabyagaho athɨ: "Omukoli oyo mʉmʉnyage ekɨtsere ekyo na mʉhekyo oyo uwithe kw’ikumi." 25 Mobamʉbwɨra bathɨ: "Nyinya-kowethʉ, oyo ahera awithe kʉ bɨtsere ikumi!" 26 Nyinya-kowabo oyo mwashubya athɨ: "Nɨ kwenene enyɨbabwɨra nyɨthɨ, nɨ yo uwithe kɨndʉ yo andahabwa kɨndɨ. He oyo uthawithe kɨndʉ andanyagʉlwa n’akake awitheko. 27 Hewethuwe esonzigu saye bobathashashaga nyibye mwamɨ wabo mʉlethebo hano na mʉkererebo mo mesho aye."»
Yesʉ ɨngɨra mo muyi w’ɨYerʉsalemʉ n’olʉkengerwa
(Mat 21:11; Mar 11:1-11; Yoa 12:12-19)