1 Kɨro kɨgʉma Yesʉ abyaga mo Nyʉmba ya Gongo, agenda akangɨrɨtsya abandʉ, n'ɨfʉlɨrabo eNgʉlʉ Mbʉya. Abakʉlʉ b'abaheri n'abakangɨrɨtsya b'oMʉgomba hagʉma n'abakʉlʉ b'aBayuta, mobafʉmba. 2 Mobamʉbʉtsya bathɨ: «Thʉbwɨre nga oʉnagenda ʉkola ebɨndʉ byoshi ebi byo kʉ hamuli ki, na ndɨ yo wakʉhaga amaka w'ɨkola ebyo?» 3 Yesʉ mwashʉbɨtsyabo athɨ: «Nangye kuthyo nyababʉtsya kɨnwa kɨgʉma. Mʉnyɨbwɨre: 4 Hayi ho Yoani athokaya amaka w'ɨgenda abatisya abandʉ? Ewa Gongo kʉtse kʉ bandʉ?»

5 Mobathanga ibutsania bathɨ: «Thwamamʉshʉbɨtsya thʉthɨ amaka ʉwe athokaga ewa Gongo, athʉbʉtsya athɨ: "Bʉshana na ki momʉthɨkɨrɨtsya Yoani oyo?" 6 Kandɨ thwamamʉshʉbɨtsya thʉthɨ nɨ kʉ bandʉ, abandʉ boshi balɨ hano bathʉgʉshangako mabwe, kʉshangwa betsi kʉbʉya ko Yoani abyaga mʉmɨnyeretsɨ.» 7 Aho, mobamʉshʉbɨtsya bathɨ: «Thuthetsi aho amaka wa Yoani athokaga.» 8 Yesʉ naye mwashʉbɨtsyabo athɨ: «Nangye kuthyo nyɨthɨbabwɨre nga enyɨkola ebɨndʉ ebi byo kʉ maka wa ndɨ.»

9 Honyuma kw'aho, Yesʉ mwatsɨra abandʉ omushinga ono athɨ: «Kwabyaga mʉndʉ mʉgʉma yo waheraga ɨshwa lɨwe lya misabibu. Omʉndʉ oyo mwakondesalyo bahingi bagʉma. Honyuma kw'aho mwagenda lʉgendo lwa bɨro bɨngɨ. 10 Ebɨro by'erɨhʉlʉla byabere byahika, mwathʉma mukoli ʉwe mʉgʉma ko bahingi kʉshangwa bamʉhe engemo yɨwe. Hewethuwe abahingi abo mobahumba omukoli oyo n'ɨmʉshʉbʉtsya minwe mɨsha. 11 Omwenye erɨshwa ly'emisabibu mwashʉba thʉmɨrabo ʉndɨ mukoli, oyo naye mobamuhumba, mobamuhangya n'ɨmʉshʉbʉtsya minwe mɨsha. 12 Mwashʉba thʉma mukoli wa kashathʉ. Oyo naye, mobamʉbabatsya n'ɨmʉgʉsha emʉsɨke w'erɨshwa. 13 Aho omwenye erɨshwa mwayɨbʉtsya athɨ: "Nyɨyɨre nyɨthɨ? Nyathʉma mʉgala aye mʉtsɨɨrwa, oyo ɨye kʉthɨ bamushikya." 14 Hewethuwe abahingi babere bashʉnga mʉgala ʉwe, mobabwɨrana ɨbo kw'ɨbo bathɨ: "Oyu yo mʉlɨ w'omwandʉ. Thumwithe nɨmo thwandashiba nalyo." 15 Aho mobamʉkʉrɨra emʉsɨke w'erɨshwa n'imwitha.»

Yesʉ mwabʉtsya abandʉ athɨ: «Aho abahingi abo omwenye erɨshwa andayɨrabo athɨ? 16 Andahika n'ithisabo, na andaha erɨshwa eryo lyo bandɨ bahingi.» Abandʉ babere bonvwa ebɨnwa ebyo, mobanegena bathɨ: «Ebɨndʉ ebɨrɨ ng'ebi bithanalinda byathuhikira!»

17 He Yesʉ mwahanda kʉbo kw'amesho n'ɨnegena athɨ: «aMashako Abuyirire ano anegenire athɨ ki?

"Eribwe lya thɨndawa n'abahimbi,

nɨ lyo lyo lyabere ibwe ly'ekoni.*"

18 Bʉlɨ mʉndʉ yo wandayihinda kw'ibwe eryo andakonongoka, n'oyo lyandathogerako, lyandamuthundula.»

19 Kona kathambi ako abakangɨrɨtsya b'oMʉgomba n'abakʉlʉ b'abaheri babere bonvwa ebyo, mobamɨnya ko Yesʉ mwatsa omushinga oyu bʉshana nabo. Bʉshana n'ekyo mobashondya ɨmʉmɨna, he mobʉbaha abandʉ.

20 Abakangɨrɨtsya b'oMʉgomba n'abakʉlʉ b'abaheri abo, mobathanga ɨgenda abalɨnga Yesʉ. Aho, mobamʉthʉmɨra bandʉ bo bayɨyɨragamo bandʉ bathʉnganene. Mobakola ebyo bʉshana n'ɨmʉtsɨmba mo bɨnwa bɨwe n'imuhira mo minwe y'abakʉlʉ b'ekɨhʉgo. 21 Abandʉ abo mobamʉbʉtsya bathɨ: «Mʉkangɨrɨtsya, thwetsi ko ʉnagenda ʉnegena n'ɨkangɨrɨtsya ebɨthʉnganene. Kandɨ ʉthalɨ ʉnatsomana bʉkʉlʉ bwa mʉndʉ, hewethuwe ʉnagenda ʉkangɨrɨtsya abandʉ bw'enzɨra y'ekwenene yo Gongo anamogera. 22 Ewono thathʉbwɨra! oMʉgomba ethʉ anahamulire ɨrɨha Ekoli ya Kaisari kʉtse ɨhɨ?»

23 Hewethuwe Yesʉ mwamɨnya ko abashondya ɨmʉthega kɨnwa. Aho mwabwɨrabo athɨ: 24 «Munyikangye kɨtsere kɨgʉma kya faranga.» Aho mwabʉtsyabo athɨ: «Eshoshani n'erɨtsɨna byo bɨrɨ ko kɨtsere kɨno nɨ bya ndɨ?» Mobashʉbya bathɨ: «Nɨ bya Kaisari.» 25 Aho Yesʉ mwabwɨrabo athɨ: «Mʉgende omʉha Kaisari y'ebɨwe na Gongo y'ebɨwe.» 26 Abandʉ abo mobathabona kɨnwa kyo bangamʉthega embere s'abandʉ. He mobashweka kʉtsɨbʉ kw'ishubya lɨwe, mo bayɨhʉlɨkɨrɨtsya.

27 Kɨro kɨgʉma Basandukayo bagʉma mobahikira Yesʉ. Nɨ aBasandukayo bo banagenda abanegena bathɨ abaholi bathindalubuke. aBasandukayo bo bahikiraga Yesʉ abo, mobamʉbʉtsya bathɨ: 28 «Mʉkangɨrɨtsya, Mʉsa mwathʉthegeka athɨ omuyira amafwa bʉthabʉtha, mʉgala wabo n'ɨngɨrɨra omʉshʉmbakatsɨ yo uthashiba bʉshana abʉthɨre walɨ mʉgala abo yo bana.* 29 Aho, kwabyaga basole balɨnda ba mʉ nda ngʉma. Kambere mwahikya he mwafwa bʉthabʉtha. 30 Owa kabɨrɨ mw'ɨngɨrɨra omʉshʉmbakatsɨ, he naye mwafwa bʉtha mʉbʉthako. 31 Honyuma kw'aho mobyabya bithyo ko wa kashathʉ, na kuthyo ko balɨnda boshi. Mobafwa bʉthabʉtha kiro na mwana. 32 Ko nduli, omʉshʉmbakatsɨ naye mwafwa. 33 Ewono, ekɨro abaholi bandalubuka, omʉshʉmbakatsɨ oyo andabya mʉka ndɨ? Kʉshangwa abalɨnda boshi mobamuhikya.»

34 Yesʉ mwashʉbɨtsyabo athɨ: «Abandʉ b'omo kɨhʉgo kɨno abanahikya n'ihikibwa. 35 Hewethuwe abandʉ bo Gongo andashʉnga ko batholere ilubuka bʉshana bɨngɨre mo Bwamɨ bo buhika, bathɨndahikye kʉtse ihikibwa. 36 Bathɨndashʉbafwe, bandalɨngana n'abamalaɨka. Nɨ abo bo bana ba Gongo, kʉshangwa mwalubukyabo. 37 Mʉsa mwakangania kʉbʉya-kʉbʉya ko abaholi bandalubuka. Ebɨnwa ebyo anegena kʉbyo aho ashakire bʉshana n'ekɨkala kyo kyagenda ekɨgʉlʉmɨra. Aho ahʉla Nyinya-kowethʉ athɨ: "Gongo wa Abʉrahamʉ, yo Gongo wa Isaka na yo Gongo wa Yakobo.*"» 38 Yesʉ mwashʉba negena athɨ: «Gongo nɨ Gongo w'abalɨho he athalɨ w'abaholi, kʉshangwa aboshi balɨho kw'ɨye.»

39 Aho bagʉma b'omo bakangɨrɨtsya b'oMʉgomba mobanegena bathɨ: «Mʉkangɨrɨtsya, moʉnegena kʉbʉya.» 40 Mobathanalinda bashʉbabʉtsya Yesʉ yo kɨndɨ kɨndʉ.

41 Yesʉ mwabʉtsya abandʉ athɨ: «Bʉshana na ki abandʉ banganegena bathɨ Kirisito nɨ mʉgala w'omwamɨ Tawiti? 42 Ndɨ mwamɨ Tawiti yowene-wene yo ʉnegena mo kɨtabo ky'eSaburi athɨ:

"Nyinya-kowethʉ Gongo mwabwɨra Nyinya-kowethʉ athɨ:

‘Wikala ko malyo aye,

43 ihika ko kɨro nyandayɨra so nzigu sawe

mo kɨndʉ kyawe k'iryathirako.*’"

44 Aho omwamɨ Tawiti amahʉla Kirisito mo Nyinya-kowabo, Kirisito oyo angashʉbabya athɨ mʉgala w'omwamɨ Tawiti?»

45 Mo mʉgʉlʉ abandʉ boshi babyaga nɨbakɨnalɨ abahʉlɨkɨrɨtsya Yesʉ, mwabwɨra abɨga bʉwe athɨ: 46 «Mʉthagenda omʉyɨtsɨmba ng'abakangɨrɨtsya b'oMʉgomba. Bo banagenda abayɨgendya-gendya nibambithe soropo nyɨre-nyɨre. Kandɨ abanatsɨɨra abandʉ bagende abaketsyabo mw'ishikibwa mo mihindano. Na kandɨ abanagenda abatsɨɨra ikala ko bifumbi by'embere mo sosinakoki na mo solinye. 47 Abananyaga abashʉmbakatsɨ bw'ebyo bawitheko, kandɨ abanagenda abashaba mɨshabe mɨre bʉshana bayikanganie embere s'abandʉ. Abandʉ abo, Gongo andasohabo kʉtsɨbʉ kʉlenga abandɨ.»