1 Honyuma kw'aho, Yesʉ mwathimba mo miyi n'omo mɨrongo, bʉshana n'ɨkangɨrɨtsya n'ɨfʉlɨra abandʉ bw'eNgʉlʉ Mbʉya y'oBwamɨ bwa Gongo. Abyaga hagʉma n'abathʉmwa bʉwe ikumi na babɨrɨ. 2 Kandɨ abyaga hagʉma na bakatsɨ bagʉma, abo athokayako emɨtsɨmʉ mɨbɨ n'ilamyabo makoni. Mo bakatsɨ abo mwabyaga: Marɨa w'omo muyi w'ɨMangandala, Marɨa oyo, Yesʉ mwamuthokyako mɨtsɨmʉ ɨrɨnda, 3 na Yane mʉka Kusa. Ye Kʉsa oyo yo wabyaga imanire obushoki bwa Herote. Na mo bakatsɨ abo mwabyaga Sʉsana, na bandɨ bakatsɨ bangɨ. Nɨabakatsɨ abo bo bagenda abahana ko bushoki bwabo mw'iwathikya Yesʉ n'abathʉmwa bʉwe.

4 Bandʉ bangɨ bagenda abathoka mo bʉlɨ muyi, bʉshana bayahindane na Yesʉ. Yesʉ mwatsɨrabo mushinga athɨ: 5 «Muheri mʉgʉma mwayabɨba mbʉtho mw'ɨshwa lɨwe. Mo ndambi agenda abɨba esombʉtho sɨwe, mbʉtho ngʉma mosathogera emʉsɨke w'enzɨra. Abandʉ mobalyathangatho, n'emɨronge moyalyatho. 6 Esɨndɨ mosathogera ko mabwe. Sabere salasha, mosʉma bʉshana n'erɨbʉsha metsi mo kɨthaka. 7 Sɨndɨ mbʉtho mosathogongera mo mɨshakɨ. Emɨshakɨ eyo moyalasha hagʉma n'esombʉtho, na moyayɨndɨrɨtsyatho. 8 Esɨndɨ ɨtho, mosathogera ko kɨthaka kikwirire. Sabere sakʉla mosaheka bɨkʉmba. Bʉlɨ kɨkʉmba mokyaheka mbulu igana-igana.» Yesʉ abere amala ɨbwɨrabo ebyo, mwanegena athɨ: «Yo uwithe mathwi w'ɨonvwa, onvwe!»

9 Abɨga ba Yesʉ mobamʉbʉtsya ng'omushinga oyu ashondya ɨnegena athɨ ki. 10 Yesʉ mwashʉbɨtsyabo athɨ: «Imwe momwahabwa ɨmɨnya bɨnwa bibishire by'omo Bwamɨ bwa Gongo. He abandɨ ɨbo, lɨtholere nɨnyabwɨrabo mo mishinga, bʉshana

"bagende abalola, he nɨbathɨshʉnge.

Bagende abonvwa, he nɨbathɨonvwe.*"»

11 Kandɨ Yesʉ mwanegena athɨ: «Athya k'omushinga ono anegenire: Embʉtho nɨ eKɨnwa kya Gongo. 12 Esombʉtho so sathogeraga emʉsɨke w'enzɨra, sishoshekanibwe n'abandʉ bo banonvwa eKɨnwa kya Gongo. Honyuma kw'aho Sitani niahika niathokyakyo mo mɨthɨma yabo, bʉshana bathɨkɨrɨtsyaga n'ɨshabʉlwa. 13 N'esombʉtho so sathogeraga ko mabwe, sishoshekanibwe n'abandʉ bobanahʉlɨkɨrɨtsya eKɨnwa kya Gongo n'ikokyakyo mo lʉmogo. Hewethuwe eKɨnwa ekyo kithashika kʉbʉya mo mɨthɨma yabo. Abanɨkɨrɨtsyakyo mʉ kathambi kake kuroshi, erɨlengwako erinabya lyahikirabo nibamikakyo. 14 N'esɨndɨ mbʉtho so sathogeraga mo mɨshakɨ, sishoshekanibwe n'abandʉ bobanonvwa eKɨnwa kya Gongo. Hewethuwe emɨnʉbo n'obushoki n'erɨtsɨɨra ebɨndʉ by'omo kɨhʉgo kɨno, ebɨnayɨndɨgɨrɨtsya eKɨnwa ekyo mo mɨthɨma yabo. Bʉshana n'ekyo, bathaheka biguma byerire. 15 N'esombʉtho so sathogeraga mo kɨthaka kikwirire, ɨtho sishoshekanibwe n'abandʉ bo banonvwa eKɨnwa kya Gongo n'omʉthɨma akwirire, na ow'athʉnganene. Abo bo banabɨka eKɨnwa ekyo mw'itsitsinia ihika ko kɨka ky'ɨheka biguma.»

16 Yesʉ mwashʉba negena kandɨ athɨ: «Hathalɨ mʉndʉ yo wanganokya etara n'ɨshwɨkaro kɨthonga kʉtse ihiraro omw'ishangɨngo. Hewethuwe anagenda ahiraro kw'ihango, bʉshana abo bɨngɨra mo nyʉmba bashʉnge ekyakakala. 17 Bʉlɨ kɨndʉ kibishire kyandabishulwa kʉbʉya-kʉbʉya. N'obʉlɨ kɨndʉ kyo kɨkoleka mo bubisho-bisho kyandamɨnyɨkala kʉbʉya-kʉbʉya. 18 Bʉshana n'ekyo muyitheye ko bɨnwa byo mwonvwa! Kʉshangwa nɨ omʉndʉ yo uwithe kɨndʉ yo ʉnahabwa kɨndɨ. He oyo uthawithe kɨndʉ andanyagʉlwa n'ekyo aganɨtsya kw'awitheko.»

19 Kɨro kɨgʉma bagala babo Yesʉ na nyinya ʉwe mobayamushondya. Hewethuwe mobathakotsya imuhikako bʉshana n'omuhindano w'abandʉ. 20 Abandʉ mobabwɨra Yesʉ bathɨ: «Bagala benyu na nyoko bimene embʉga abashondya ɨkʉshʉnga.» 21 He Yesʉ mwabwɨrabo athɨ: «Bagala bethʉ na malɨ nɨ bo banonvwa eKɨnwa kya Gongo n'ɨkola nga ko kinegenire.»

22 Kɨro kɨgʉma Yesʉ mwashambɨra mʉ bwatho bʉgʉma hagʉma n'abɨga bʉwe. Mwabwɨrabo athɨ: «Thʉshabʉkɨre ko ʉndɨ mwishirya w'engetsɨ.» Nabo mobagenda.

23 Babere banalɨ abatsa engetsɨ, Yesʉ mwayatho. Aho n'aho, mbeho nzɨbʉ moyayihuma ko ngetsɨ. Ametsi mwathanga ɨngɨra mo bwatho, nabo mobabya hofɨ n'ɨshenda. 24 Mobayɨfʉnda ahalɨ Yesʉ mobamubukya n'ɨnegena bathɨ: «Mʉkangɨrɨtsya, Mʉkangɨrɨtsya, thwahwa!»

Yesʉ mwabʉka mwakemera kʉtsɨbʉ embeho n'emibimbi, nabyo mobyabombera, mokwabya shereri. 25 Aho, Yesʉ mwabʉtsyabo athɨ: «Olwɨkɨrɨtsyo lwenyu lʉlɨ hayi?» Nabo mobʉbaha n'ɨshweka kʉtsɨbʉ nɨababwɨrana bathɨ: «Oyu nɨ mʉndʉ mʉhanda ki? Yo ʉthegeka embeho n'emibimbi nabyo nibyamushikya!»

26 Honyuma kw'aho, Yesʉ n'abɨga bʉwe mobashabʉka engetsɨ n'ɨgobeka obwatho mo kɨhʉgo ky'aBangerasi mwishirya na mwishirya w'ekɨhʉgo ky'iNgalilaya. 27 Yesʉ abere akɨnalɨ akima mo bwatho, mʉndʉ mʉgʉma w'omo muyi mwayɨfʉnda ahalɨ Yesʉ. Omʉndʉ oyo abyagako mɨtsɨmʉ mɨbɨ. Mʉ bɨro bɨngɨ niathashubire ɨambala lʉkɨmba, niathashubire ikala mʉ nyʉmba, he kona ko masɨnda. 28 Abere ashʉnga Yesʉ mwahambala, mwawa embere s'ebɨshando bɨwe. Mwahambala kʉtsɨbʉ athɨ: «Yesʉ, Mʉgala wa Gongo yo ʉlɨ elʉgʉlʉ w'ebyoshi, unyishondya ko ki? Enyɨkʉshaba uthanyinubaya!» 29 Mwanegena athyo, kʉshangwa Yesʉ abyaga nɨamahamʉla omʉtsɨmʉ mʉbɨ oyo athoke ko mʉndʉ oyo. Omʉtsɨmʉ oyo agenda amunubya ngendo nyɨngɨ. Bʉshana n'ekyo bagenda abamʉmɨna mʉ bʉhʉlʉla n'omo byʉma nɨmo atharombokaga, he agenda atsabyo. Omʉtsɨmʉ oyo agenda amuhikya ko kɨka ky'ɨmʉthwala ahathalɨ bandʉ.

30 Yesʉ mwamʉbʉtsya athɨ: «Erɨtsɨna lyawe ɨwe ndɨ?» Naye mwashubya athɨ: «Erɨtsɨna lyaye ingye kɨkembe.» Anegenaga ebyo kʉshangwa abyagako mɨtsɨmʉ mɨngɨ. 31 Emɨtsɨmʉ eyo moyashaba Yesʉ yɨthɨ athagʉshagaro mo kyuna kɨre ky'okwɨrʉnga.

32 N'aho habyaga luhyo lwa ngʉlʉbe, sagenda esishondya kalyo ko kathwa. Emɨtsɨmʉ eyo moyashaba Yesʉ yɨthɨ: «Kishi kishi! Thʉhamʉle thwɨngɨre mo so ngʉlʉbe esi.» Naye mwahamʉlaro. 33 Aho n'aho, emɨtsɨmʉ mɨbɨ eyo moyathoka ko mʉndʉ oyo, moyayɨngɨra mo so ngʉlʉbe etho. Oluhyo loshi lw'esongʉlʉbe etho mosahʉrʉmʉka ko kathwa nɨesɨthɨbɨtha eyɨrɨ engetsɨ, aho n'aho, mosathogongera mo ngetsɨ n'esoshi mosashenda.

34 Abalishya b'esongʉlʉbe etho babere bashʉnga kw'ebyo, mobagenda tsʉba mo muyi n'omo thʉnzalɨ n'ɨyafʉlɨra abandʉ b'omwatsɨ oyo. 35 Abandʉ mobayalola ko byo bithabya. Babere bahika ho Yesʉ abyaga, mobeya omʉndʉ yo wathokagako emɨtsɨmʉ mɨbɨ n'ikere hofɨ n'ebɨshando bya Yesʉ. Abyaga nɨahera ambithe, kandɨ nɨahera awithe bwenge bukwirire. Abandʉ mobʉbaha. 36 Abandʉ bo bashʉngaga kw'ebyo byatsʉkaga, mobagambʉlɨra abandɨ ng'oko omʉndʉ yo wabyagako emɨtsɨmʉ mɨbɨ athalamibwa.

37 Aho abandʉ boshi b'omo kɨhʉgo ky'aBangerasi mobabya n'obʉba kʉtsɨbʉ. Bʉshana n'ekyo mobabwɨra Yesʉ bathɨ, athokerebo mo kɨhʉgo kyabo. Aho Yesʉ mwashambɨra mo bwatho mwashʉba eyo athokaga. 38 Omʉndʉ yo wathokagako abatsɨmʉ, mwalemba-lemba Yesʉ athɨ: «Nyangagendire nawe!» He Yesʉ mwamʉshʉbʉtsya n'ɨmʉbwɨra athɨ: 39 «Ʉshʉbe ewawe, ʉyafʉlɨre abandʉ bw'ebyoshi Gongo amakʉkolera.»

Omʉndʉ oyo mwathimba mo muyi woshi nɨane mʉfʉlɨra abandʉ bw'ebyoshi Yesʉ athamʉkolera.

40 Yesʉ abere ashʉbʉla bandʉ bangɨ mobayamukokya, kʉshangwa aboshi babyaga nibamulindirire. 41 Mo ndambi eyo, mʉkʉlʉ mʉgʉma w'esinakoki erɨtsɨna lɨwe nɨ yo Yairo mwahika, mwafʉkama embere sa Yesʉ. Mwalemba-lemba Yesʉ ɨngɨre omwe 42 kʉshangwa omʉthasha ʉwe abyaga niathohire. Abyaga mʉthasha kyʉsha, niawithe mɨaka hofɨ ikumi n'ibiri.

Yesʉ abere anemʉya ewa Yayiro, muhindano mʉnene wa bandʉ agenda amʉyɨndɨrɨtsya. 43 Mo muhindano oyo mwabyaga mʉkatsɨ mʉgʉma yo wabyaga nɨamamala mɨaka ikumi n'ibiri anemʉnʉba mo bukoni bw'ɨthokwamo mʉsasɨ. Abyaga nɨamamala obushoki bʉwe boshi ko bashake hewethuwe mohathabya n'omʉgʉma wa kʉbo yo wamulamyaga. 44 Omʉkatsɨ oyo mwahʉlʉkɨra Yesʉ y'enyuma na mwakola ko pindo y'olʉkɨmba lʉwe. Kona kathambi ako obukoni bw'erɨthokamo mʉsasɨ mobwalama.

45 Yesʉ mwabʉtsya athɨ: «Nɨ ndɨ yo wamanyɨkolako?» Abandʉ boshi mobayɨgana ko hathalɨ yo wamamʉkolako. Aho Petero mwamʉbwɨra athɨ: «Mʉkangɨrɨtsya, uthashungire ko muhindano woshi oyu ow'akuthimbireko n'ɨkʉyɨndɨrɨtsya?» 46 Hewethuwe Yesʉ mwanegena athɨ: «Mʉndʉ mʉgʉma mwanyɨkolako, kʉshangwa nyamwonvwa ko kʉlɨ kagala kamanyɨthokamo.»

47 Omʉkatsɨ oyo abere ashʉnga ko bamamʉmɨnya, mwayɨfʉnda ho Yesʉ abyaga niathithimana bʉshana n'obʉba. Mwafʉkama embere sɨwe. Mwaganʉlɨra mo kathi k'abandʉ boshi kyo kɨthaleka nɨamʉkolako na ko mwalama aho n'aho. 48 Aho Yesʉ mwamʉbwɨra athɨ: «Mwalɨ waye, olwɨkɨrɨtsyo lwawe lwamakulamya. Yɨgendere n'obʉholo.»

49 Yesʉ abere akɨnalɨ anegena mokwahika mʉndʉ mʉgʉma nɨathoka ewa Yayiro, mʉkʉlʉ w'esinakoki. Mwamʉbwɨra athɨ: «Oh mʉkengwa! Mwalɨ wawe athakɨrɨho. Ʉthashʉba luhya oMʉkangɨrɨtsya!» 50 Yesʉ abere onvwa ebyo, mwabwɨra Yayiro athɨ: «Ʉthʉbahaga, wɨkɨrɨtsye kuroshi naye alama.»

51 Yesʉ mwahika ewa Yayiro. Mwathatsɨga ɨngɨra mo nyʉmba na bandɨ bandʉ athalɨ Petero, na Yoani, na Yakobo n'ababuthi b'omwana. 52 Abandʉ boshi bagenda abalɨra n'ɨhononokala bʉshana n'olʉholo lw'omʉthasha oyo. Hewethuwe Yesʉ mwabwɨrabo athɨ: «Mʉthalɨraga, kʉshangwa omʉthasha oyu athafwire, he alɨ thʉlo!» 53 Babere bonvwa ebyo, mobamʉsheka, kʉshangwa ɨbo babyaga nibetsi ko omʉthasha oyo amalire ɨfwa. 54 Hewethuwe Yesʉ mwatsɨmba omʉthasha y'oko kʉboko, mwahambala kʉtsɨbʉ n'ɨnegena athɨ: «Ɨwe mʉthasha, bʉka!» 55 Omʉthasha oyo mwashʉba. Aho n'aho, mwimana. Yesʉ mwabwɨra abandʉ athɨ bahe omʉthasha oyo yo kalyo. 56 Ababuthi b'omʉthasha oyo, mobashweka kʉtsɨbʉ. Yesʉ mwahangɨrabo athɨ bathanalinda babwɨra mʉndʉ byo bɨthakoleka.