1 Kɨro kɨgʉma Yesʉ agenda ashabɨra handʉ halebe. Abere amamala ɨshaba, mʉgʉma w'oko bɨga bʉwe mwamʉbwɨra athɨ: «Yoani Mubatisya mwakangɨrɨtsya abɨga bʉwe ng'oko banashaba Gongo. Aho Nyinya-kowethʉ, nawe kuthyo thʉkangɨrɨtsye nga ko banashaba Gongo.»

2 Yesʉ mwabwɨrabo athɨ: «Mʉlɨ omʉshaba Gongo mʉgende omʉnegena mʉthɨ:

"Thatha,

erɨtsɨna lyawe lisingibwe!

Obuthegeki bwawe buhike!

3 Ʉgende ʉthʉha akalyo kethʉ k'ebɨro byoshi.

4 Ʉthʉganyɨre ebɨtsɨbʉ byethʉ,

kʉshangwa nethwe othʉnaganyɨra abo banathʉkolera obʉbɨ.

Ʉthagenda uthumika thwɨngɨre mw'ɨlengwako."»

5 Yesʉ mwashʉba bwɨra abɨga bʉwe athɨ: «Thʉlolere ko mushinga oyu: mʉndʉ mʉgʉma wa kw'imwe angayɨra mwira. Omwɨra oyo niamuhikira mo kathi k'ekɨro n'ɨmʉbwɨra athɨ: "Mwiraye, nyɨbweke mikati ishathu, 6 kʉshangwa mʉgʉma w'oko bira baye amanyihikira nɨathoka mo lʉgendo nangye nyithawithe kalyo k'ɨmʉha." 7 Oyo ʉlɨ mo nyʉmba nɨamʉshʉbɨtsya athɨ: "Ʉthanyɨkendetsyaga, nyamalire ɨkɨnga oluyi, ingye n'abana baye thwamalire ɨgonzera. Nyɨthangashʉba hangana bʉshana n'ɨkʉha mikati." 8 Enyɨbabwɨra nyɨthɨ mwangathɨnda imana n'ɨmʉha emikati bʉshana n'obwira, he angimana n'ɨmʉha ebyoshi ashashire bʉshana n'obuhathikani bʉwe.

9 «Nangye enyɨbabwɨra nyɨthɨ: mʉgende omʉshaba nemwe mwandahabwa, mʉgende omushondya nemwe mwandabona, mʉgende omʉkongotha ko luyi nemwe mwandakɨngʉlɨrwa. 10 Kʉshangwa bʉlɨ mʉndʉ yo ʉshaba anahabwa, n'oyo ushondya anabona. N'oyo ʉkongotha ko luyi anakɨngʉlɨrwa. 11 Ishe ndɨ wa mwana mo kathi kenyu, yo mʉgala ʉwe angamʉshaba ihere nɨamʉha nzoka? Hathalɨ! 12 Kʉtse kandɨ ɨndɨ yo mʉgala ʉwe angamʉshaba ɨyɨ nɨamʉha nge? Hathalɨ! 13 Na mo mʉnalɨ babɨ, he mwetsi ɨha abana benyu bw'ebɨndʉ bikwirire. Aho Ɨsho wenyu yo ʉlɨ mo lʉbʉla athɨndagende aha oMʉthɨma Mwerʉ w'abo banagenda abamʉshabawo!»

14 Kɨro kɨgʉma Yesʉ agenda abɨnga mʉtsɨmʉ mʉbɨ yo wayɨraga mʉndʉ mʉgʉma mo kɨtsɨrʉ. Omʉtsɨmʉ mʉbɨ oyo abere athoka ko mʉndʉ oyo, aho n'aho mwathanga ɨnegena. Mo muhindano, abandʉ mobashweka kʉtsɨbʉ. 15 He bagʉma mo bandʉ abo mobagenda ababwɨrana bathɨ: «Omʉndʉ oyu nɨ Belisebuli, mʉkʉlʉ w'emɨtsɨmʉ mɨbɨ nɨ ɨro yo yɨnagenda eyɨmʉha amaka w'ɨbɨngaro.» 16 Abandɨ babyaga niabashondya ɨmʉlengako. Mobamʉshaba akolerebo kɨthɨko-thɨko kɨgʉma kyo kɨthoka elʉbʉla.

17 Hewethuwe Yesʉ abyaga nɨamamala ɨmɨnya ebɨrɨ mo mɨthɨma yabo. Mwabwɨrabo athɨ: «Abandʉ b'omo bwamɨ bʉgʉma bamalwa ɨbo kw'ɨbo, obwamɨ obo nɨbwamathera. N'abandʉ b'omo lʉganda lʉgʉma bamalwa ɨbo kw'ɨbo, olʉganda olo nɨlwamashambʉkala. 18 Aho, Sitani amabya angayɨlwɨsa yowene, obwamɨ bʉwe nibwimana bʉthɨ? Enyɨnegena ebyo kʉshangwa omʉnegena mʉthɨ: enyɨbɨnga emɨtsɨmʉ mɨbɨ ko maka wa Belisebuli. 19 Nyamabya nɨenyɨbɨnga emɨtsɨmʉ mɨbɨ kʉ maka wa Belisebuli, aho abɨga benyu nabo abanagenda ababɨngaro kʉ maka wa ndɨ? Nɨ Bʉshana n'ekyo abɨga benyu abo bo bandabasoha. 20 He ingye, alɨ mo maka wa Gongo wonyɨbɨngamo emɨtsɨmʉ mɨbɨ, n'ɨnegena mbʉ oBwamɨ bwa Gongo bwamalire ibahikira.

21 «Mo ndambi omʉndʉ wa kagala awithe kʉ bɨmano bya malwa atheya rʉba lʉwe, obushoki bʉwe obunabya nibutheyibwe kʉbʉya. 22 He ʉndɨ mʉndʉ yo uwithe kagala kw'imulengya amahika iyihuma kw'ɨye n'imukinda, aho angashamʉla omwenye enyʉmba y'ebɨmano by'amalwa ebyo athayinihire, n'ɨgaba ebɨndʉ byoshi athamʉnyaga.

23 «Oyo ʉthalɨ ko lʉhande lwaye, nɨ nzigu aye. N'oyo ʉthalɨ anyiwathikya kw'ɨkʉmakʉma nɨapanza.»

24 Yesʉ mwashʉba negena athɨ: «Mo ndambi omʉtsɨmʉ mʉbɨ anabya amathoka ko mʉndʉ anagenda athimba-thimba mo mbwarara niashondya aho angalʉhʉkɨra. Amabʉshaho nɨanegena athɨ: "Nyashʉba mo nyʉmba aye nyɨthathokamo." 25 Anabya ashʉbamo, ameyaro nɨyamalire ɨbɨtsɨbwa n'ikomibwa kʉbʉya, 26 ahoomʉtsɨmʉ mʉbɨ oyo anayenda yɨndɨ mɨtsɨmʉ ɨrɨnda mɨbɨ kʉlengya ɨye. Eyoshi nɨyɨngɨra mo nyʉmba eyo n'iyikaliramo. Aho omʉndʉ oyo emɨbere yɨwe nɨ yabya mɨbɨ kʉtsɨbʉ kʉlenga emɨbere yɨwe mɨmbere.»

27 Mo ndambi Yesʉ abere anemʉnegena ebɨnwa ebyo, mʉkatsɨ mʉgʉma mo muhindano mwahambala athɨ: «Omʉkatsɨ yo wakʉbʉthaga n'ikwongya agashanɨrwe!» 28 He Yesʉ mwashubya athɨ: «He abo bagashanɨrwe kundu kundu, nɨ bo banagenda abonvwa eKɨnwa kya Gongo n'ɨkola nga ko kinegenire.»

29 Bandʉ bangɨ bagenda abongereka ho Yesʉ abyaga, mwabwɨrabo athɨ: «Abandʉ b'omo mʉgʉlʉ ono nɨ babɨ! Abashaba kɨmɨnyɨkalo. Hewethuwe hathalɨ kɨmɨnyɨkalo bandakangibwa kɨthalɨ eky'omʉmɨnyeretsɨ Yona. 30 Yona abyaga kɨmɨnyɨkalo ko bandʉ b'eNinawi.* oMʉgala w'oMʉndʉ, kuthyo andabya kɨmɨnyɨkalo ko bandʉ ba munobwire.

31 «Mo kɨro ky'esohi omʉgole yo wathokaga ko Lʉnda Kihya* andalubukira hagʉma nemwe bandʉ ba munobwire bʉshana n'ibasitaka. Kʉshangwa ɨye athokaga hale kʉtsɨbʉ bʉshana n'ɨyonvwa ebɨnwa by'obuthegekania bw'omwamɨ Solomona. Mwonvwe! Hano halɨ mʉkʉlʉ kʉlenga Solomona!

32 «Ekɨro ky'esohi kyandabya kyahika, abandʉ b'eNinawi nabo bandalubukira hagʉma nemwe, imwe bandʉ ba munobwire n'ibasitaka. He abo ɨbo babere bonvwa ebɨnwa by'omʉmɨnyeretsɨ Yona akangɨrɨtsyagabo mobabɨndʉka ɨthoka mo bɨtsɨbʉ byabo. Mwonvwe! Hano halɨ mʉkʉlʉ kʉlenga omʉmɨnyeretsɨ Yona.»

33 Yesʉ mwashʉba negena athɨ: «Hathalɨ mʉndʉ yo ʉnagenda anokya etara n'ibisharo, kʉtse n'ɨshwɨkaro kɨthonga. Hewethuwe niahiraro kw'ihango, nɨmo abandʉ bo bɨngɨra mo nyʉmba balole ko kyakakala. 34 Elisho lyo tara y'omʉbɨrɨ. Elisho lyawe lyamabya lɨthalwere, omʉbɨrɨ woshi nɨalɨ mo kyakakala. He elisho lyawe lyamabya lɨlwere, omʉbɨrɨ awe nawo niabya mo mwitsimya. 35 Bʉshana n'ekyo uyitheye kʉshangwa ekyakakala kɨrɨ mw'ɨwe kɨthahɨndʉkaga mwitsimya. 36 Omʉbɨrɨ awe woshi amabya alɨ mo kyakakala, amabya athalɨko kɨthambo kɨrɨ mo mwitsimya, omʉbɨrɨ awe woshi andabya mo kyakakala ky'ekwenene ng'etara yo yɨnagenda eyɨkʉkoletsya mo kyakakala kyaro.»

37 Yesʉ abere amamala ɨnegena ebɨnwa ebyo, Mufarisayo mʉgʉma mwamʉbɨrɨkɨra ayalye ko kalyo k'omwe. Yesʉ mwɨngɨra mo nyʉmba na mwathanga irya. 38 oMufarisayo oyo mwashweka abere ashʉnga Yesʉ ko mwalya bʉthanaba ko minwe.*

39 Aho, Nyinya-kowethʉ mwamʉbwɨra athɨ: «Imwe Bafarisayo, omʉnagenda omʉshʉga enyuma y'olwatha na y'embale. Hewethuwe mo mɨthɨma enyu mwotswire ngʉmbʉ y'obwɨtsɨ n'ebɨndɨ bɨbɨ. 40 Imwe mʉlɨ thʉhʉmo! Muthetsi kw'oyo wakomaya enyuma y'olwatha na y'embale n'ɨye yo wanakomaya n'emwishi watho? 41 Aho, mʉgende omʉwathɨkya abatsene mo bɨndʉ byo muwitheko. Aho n'ebɨndɨ byoshi nɨbyetsɨbwa bʉshana nemwe.

42 «Mʉlɨ balɨgo, imwe Bafarisayo! Omʉnahana ekɨgʉma ky'ikumi ky'akandambʉka, n'esoshogo, n'esɨndɨ nyinyi, he omʉnagenda omʉsʉnzʉgʉra ɨkola ebɨthʉnganene n'olwanzo lwa Gongo. Naho nɨ ebyo byo mwangagendire omʉkola, buthalika ɨhana kɨgʉma ky'ikumi ky'ebɨndɨ bɨndʉ byoshi ebyo.

43 «Mʉlɨ balɨgo, imwe Bafarisayo! Mutsiire ikala ko bifumbi by'embere mo sosinakoki. Na kandɨ mutsiire abandʉ bagende ababaketsya n'olushikyo mo mihindano. 44 Mʉlɨ balɨgo! Omunabya ng'amasɨnda w'athalɨko kɨmɨnyɨkalo, w'abandʉ abanalyathanga kʉwo bʉthamɨnya.*»

45 Mʉkangɨrɨtsya mʉgʉma w'oMʉgomba mwabwɨra Yesʉ athɨ: «Mʉkangɨrɨtsya, ʉlɨ oʉnegena uthyo nɨoʉthʉkamba nethwe.»

46 Na Yesʉ mwashubya athɨ: «Bʉlɨgo kw'imwe bakangɨrɨtsya b'oMʉgomba! Kʉshangwa omuhekya abandʉ bw'emɨtsɨgo itsithohire, kandɨ nɨmʉthangathakola na kʉro ko mo minwe enyu.

47 «Bʉlɨgo kw'imwe! Kʉshangwa omuhimba amasɨnda w'abamɨnyeretsɨ bo bithawa na bo sho. 48 Aho omwɨmɨrana n'abo sho ko byo bakolaga, kʉshangwa mobitha abamɨnyeretsɨ, nemwe omuhimba amasɨnda wabo! 49 Bʉshana n'ekyo, Gongo mwithegekania lɨwe mwanegena athɨ: "Nyandathʉmɨrabo abamɨnyeretsɨ n'abathʉmwa. He bandagenda abitha bagʉma ba mʉbo, n'inubya abandɨ." 50 Nɨ bʉshana n'ekyo, omʉsasɨ w'abamɨnyeretsɨ boshi bithawa ɨthoka kw'ɨbʉmbwa ly'ekɨhʉgo, andabya ko muthwe w'abandʉ ba munobwire. 51 Obwithi obo bwathangaga kʉ Abeli ihika kʉ Sakarɨa* yo bithiraga mo Nyʉmba ya Gongo mo kathi-kathi k'obʉtara bw'erɨhererako n'ahandʉ habuyirire. Ega, enyɨbabwɨra nyɨthɨ omʉsasɨ w'abandʉ boshi aba andabya ko mithwe enyu imwe bandʉ ba munobwire.

52 «Mʉlɨ balɨgo bakangɨrɨtsya b'oMʉgomba! Omunabisha abandɨ bandʉ b'olʉfʉngʉro bʉshana bathɨngɨraga aho bangɨyɨra ɨmɨnya Gongo. Imwe bene mʉthalɨ omushondya ɨngɨraho, na bo bashondya ɨngɨraho omʉnakɨkɨrabo.»

53 Yesʉ abere athoka mo nyʉmba eyo, abakangɨrɨtsya b'oMʉgomba n'aBafarisayo mobakapɨkɨra bʉshana naye n'ɨmʉbʉlɨrɨtsya bɨngɨ. 54 Bagenda abashondya ɨmʉlengako nɨmo babona kyo bangimanirako kw'imusitaka.