1 Kɨro kɨgʉma ky'eSabato, Yesʉ agenda atsʉka mo mashwa w'engano. Abɨga bʉwe bagenda abatsa ebɨkʉmba by'engano, mobahonolabyo mo minwe na mobalyaro.*

2 Bafarisayo bagʉma mobabwɨrabo bathɨ: «Imwe! Bʉshana na ki omʉkola ebyo oMʉgomba ethʉ ahangire ɨkola ekɨro ky'eSabato?»

3 Yesʉ mwashʉbɨtsyabo athɨ: «Mʉthahera mwathasoma ebyo omwamɨ Tawiti akolaga mo ndambi ɨye n'abandʉ abyaga nabo babere bawɨra? 4 Mwathɨngɨra mo Nyʉmba ya Gongo, n'ɨthola emikati yo bandʉ bahembaga Gongo? Ndɨ mwalyaro n'ɨha abandʉ abyaga nabo, naho, abaheri basha n'ɨbo bahamulirwe irya emikati yɨrɨ ng'eyo!*»

5 Honyuma kw'aho Yesʉ mwabwɨrabo athɨ: «Mʉgala w'oMʉndʉ yo Mʉkʉlʉ w'eSabato.»

6 Kɨndɨ kɨro ky'eSabato Yesʉ mwɨngɨra mo sinakoki mwakangɨrɨtysa abandʉ. N'omo sinakoki eyo mwabyaga mʉndʉ mʉgʉma ekɨganza kɨwe ky'amalyo nɨ kikonongokire. 7 Abakangɨrɨtsya b'oMʉgomba n'aBafarisayo bagenda abayɨthegeretsya nga Yesʉ alamya omʉndʉ oyo mo kɨro ky'eSabato. Bakolaga bathyo bʉshana babone kɨnwa bangamʉsɨtakɨra. 8 Hewethuwe Yesʉ mwamɨnya emɨganɨtsye yabo. Mwabwɨra omʉndʉ w'ekɨganza kikonongokire athɨ: «Hangana, wimane mo kathi-kathi k'abandʉ.» Mwahangana amaya imana mo kathi kabo.

9 Honyuma kw'aho Yesʉ mwabwɨrabo athɨ: «Enyɨbabʉtsya nyɨthɨ: oMʉgomba ethʉ ahamulire ɨkola ki ekɨro ky'eSabato? Ɨkola bɨbʉya kʉtse ɨkola bɨbɨ? Ilamya mʉndʉ kʉtse imwitha?»

10 Yesʉ mwathimbya ko boshi kw'amesho, mwabwɨra omʉndʉ oyo athɨ: «Lambʉla okʉboko kwawe.» Naye mwalambʉlakyo, n'ekɨganza kɨwe mokyalama. 11 Hewethuwe abakangɨrɨtsya b'oMʉgomba abo, n'aBafarisayo mobakapɨkɨra. Mobathanga ibutsania nga kʉno bayɨre Yesʉ yo bathɨ.

12 Mo bɨro ebyo Yesʉ mwɨrʉkɨra ko kɨthwa bʉshana n'ɨyashaba Gongo. Mobwamukyerayo nɨanemʉshaba. 13 Bwabere bwakya Yesʉ mwabɨrɨkɨra abɨga bʉwe, mwashombola mʉbo mo ikumi na babɨrɨ mwalʉkabo mo bathʉmwa. 14 N'abathʉmwa abo babano: Simoni, yo Yesʉ ahaga erɨtsɨna lya Petero, na Ndereya mʉgala wabo, na Yakobo na Yoani, na Filipo na Barɨtolomayo, 15 na Matayo na Tomasɨ, Yakobo mʉgala wa Alʉfayo na Simoni w'omo kɨkembe ky'aBaselote, 16 na Yuta mʉgala wa Yakobo na Yuta Isikariote, yo wahotheraga Yesʉ.

17 Yesʉ mwandagala ɨthoka ko kɨthwa hagʉma n'abathʉmwa bʉwe abo. Abere ahika habothe-bothe mwimana. Mweyaho kɨkembe ky'abɨga bʉwe na bandɨ bandʉ bangɨ nɨabahʉlʉka mo kɨhʉgo kyoshi ky'iYuteya n'ɨYerʉsalemʉ, n'omo bɨhande by'emiyi y'eTiro n'eSitona emʉsɨke w'engetsɨ. 18 Abandʉ abo bahikaga bʉshana n'ɨhʉlɨkɨrɨtsya Yesʉ, n'ilamibwa amakoni wabo. N'abo bagenda abanubibwa n'emɨtsɨmʉ nabo kuthyo mobalamibwa. 19 Abandʉ boshi bagenda abashondya ɨmʉkolako, kʉshangwa akagala kagenda akamʉthokamo n'ilamyabo.

20 Yesʉ mwathimbya ko bɨga bʉwe kw'amesho n'ɨbwɨrabo athɨ:

«Mwamagashanɨrwa imwe batsene,

kʉshangwa oBwamɨ bwa Gongo nɨ buwenyu.

21 Mwamagashanɨrwa imwe muwirire lɨno,

kʉshangwa mwandugutha.

Mwamagashanɨrwa imwe omʉlɨra munobwire,

kʉshangwa mwandasheka.

22 «Mwamagashanɨrwa imwe, omʉgʉlʉ abandʉ bababayire, babathindire, ababahangya, ababathonga, bʉshana na ngye Mʉgala w'oMʉndʉ. 23 Omʉgʉlʉ ebyo byandagenda ebibahikira, mʉgende omʉyɨbwɨra mo lʉmogo, kʉshangwa lʉhembo lʉnene lubalindire mo lʉbʉla. Nɨ kuthyo kw'obwishe-kʉlʉ wabo bagenda abanubya abamɨnyeretsɨ.

24 He imwe bashoki mʉlɨ bahanya,

kʉshangwa mwamalire ɨbona obʉtseme bwenyu.

25 Nemwe momuguthire lɨno, mʉlɨ bahanya,

kʉshangwa mwandafwa nzala.

Nemwe momʉsheka lɨno, mʉlɨ bahanya,

kʉshangwa mwandabya mo kɨrɨro na mwandalɨra.

26 Mʉlɨ bahanya mo ndambi abandʉ boshi ababahalamba, kʉshangwa nɨ bathyo ko bw'ishe-kʉlʉ wabo bagenda abahalamba abamɨnyeretsɨ b'amabesɨ.»

27 Yesʉ mwashʉba negena athɨ: «Hewethuwe imwe momunyihulikiritsye, bɨno byo nyɨbabwɨra: so nzigu senyu, mʉgende omʉtsɨgɨratho. N'abo bobanababaga mʉgende omʉkolerabo bɨbʉya, 28 abo banabathakɨra mʉgende omʉshabɨrabo Gongo agashanɨrebo. N'abo babanubya, mʉgende omʉshabɨrabo Gongo. 29 Omʉndʉ amakʉbanda ikofi kw'ithema ɨgʉma, ʉmʉthege n'erɨndɨ. N'omʉndʉ amakʉnyaga ekoti umushigire n'esimisi awe. 30 Omʉndʉ amakʉshaba kɨndʉ uthamwimagakyo, kʉtse amakʉnyaga kɨndʉ kyawe ʉthashʉba mʉshabakyo ʉthɨ akʉshʉbʉlɨtsyekyo. 31 Ebyo omushondya abandʉ babakolere, nemwe kuthyo mʉkolerebyo bo.

32 «Mwamagenda omʉtsɨɨra bobanabatsɨɨra kuroshi, mwangabona ɨsɨmwa lɨhɨ? Hathalɨ! Ndɨ n'abakoli b'ebɨtsɨbʉ nabo abanatsɨɨra bobatsiirebo! 33 Kandɨ mwamagenda omʉkolera ebɨbʉya bo banagenda ababakolerabyo basha, ɨsɨmwa lɨhɨ lyo mwangabona? Ndɨ n'abakoli b'ebɨtsɨbʉ nabo abanakolerana bathyo! 34 Kandɨ mwamagenda omʉbweka bo mwetsi ko babafʉha ɨsɨmwa lɨhɨ lyo mwangahabwa? Ndɨ n'abakoli b'ebɨtsɨbʉ nabo abanabweka bo bangafʉhabo!

35 «Hewethuwe imwe mʉgende omʉtsɨɨra esonzigu senyu. Mʉgende omʉkoleratho bɨbʉya. Kandɨ mʉgende omʉbweka buthahirayo maha w'ɨshʉbʉlɨtsɨbwa. Aho nɨmwabona lʉhembo lʉnene, kandɨ nimwabya kundu-kundu bana ba Gongo ow'elʉgʉlʉ w'ebyoshi. Kʉshangwa ɨye anakolera ebɨbʉya kw'abo bathasɨma n'abakoli b'ebɨtsɨbʉ. 36 Mʉgende omʉshashɨrana nga Thatha wenyu kw'anabashashɨra.»

37 Yesʉ mwashʉba negena athɨ: «Mʉthagenda omʉsoha abandɨ bandʉ, nemwe kuthyo bathɨndagende abalola ko bɨbɨ byenyu. Mʉthagenda omʉha abandɨ bandʉ bo malipisi, nemwe kuthyo mʉthɨndahabwe malipisi. Hewethuwe mʉgende omʉganyɨrana nemwe kuthyo mwandaganyɨrwa. 38 Mʉgende omʉhana nemwe mwandahabwa. N'ebyo mwandahabwa byandabya nibilengire kʉbʉya, nibishokire, nibithenganibwe, kandɨ nibyotswire kʉbʉya mo bɨthonga byenyu. Nga k'omʉnalengera abandɨ, nemwe kuthyo ko Gongo andabalengera.»

39 Kandɨ Yesʉ mwatsɨrabo omushinga ono athɨ: «Embumi yanganashondolera eyɨndɨ mbumi? Ɨhɨ! Amayɨra athyo ababɨrɨ boshi kundu-kundu nɨbathogera mo kyuna! 40 Omwɨga athalengitsye omʉkangɨrɨtsya ʉwe. Hewethuwe omwɨga yo wamamala ɨkangɨrɨtsɨbwa kʉbʉya n'ɨye yo wangabya ng'omʉkangɨrɨtsya ʉwe.

41 «Bʉshana na ki ʉshʉnga ko kathɨ kalɨ mo lisho lya mʉgala enyu, he niuthashungire ko kithika kɨrɨ mo lisho lyawe? 42 Bʉshana na ki ʉbwɨra mʉgala enyu ʉthɨ: "Lika nyithokye akathɨ ko kalɨ mo lisho lyawe," hewethuwe mo lɨwawe nɨmʉkɨnalɨ mʉthɨ? Ɨwe muyimbya! Thanga wathokya omʉthɨ owalɨ mo lisho lyawe, nɨmo walola kʉbʉya ng'oko wathokya akathɨ akalɨ mo lisho lya mʉgala enyu!»

43 Kandɨ Yesʉ mwanegena athɨ: «Hathalɨ mʉthɨ akwirire w'angaheka biguma bɨbɨ, kʉtse hathalɨ mʉthɨ mʉbɨ w'angaheka biguma bikwirire. 44 Obʉlɨ mʉthɨ anagenda amɨnyɨkala ko biguma byawo. Abandʉ bathoha biguma bya mʉthɨ w'omutini ko mɨgando. Kʉtse by'emisabibu ko mɨshakɨshakɨ. 45 Na kuthyo mʉndʉ mʉbʉya anagenda anegena bɨnwa bɨbʉya byo bɨthoka mo mʉthɨma ʉwe. Hewethuwe omʉndʉ mʉbɨ ɨye, ebɨbɨ anagenda anegena ebɨnathoka mo bɨbɨ byo byotswire mo mʉthɨma ʉwe. Kʉshangwa obʉnʉ bw'omʉndʉ obʉnanegena ebyo byotswire mo mʉthɨma ʉwe.»

46 Yesʉ mwashʉba negena athɨ: «Bʉshana na ki omʉnyahʉla mʉthɨ: "Nyinya-kowethʉ, Nyinya-kowethʉ," kandɨ nɨmʉthalɨ omʉnakola ebyo enyɨbabwɨra? 47 Nyabakangya nga kw'ashoshire omʉndʉ yo unyikwamire na yo ʉhʉlɨkɨrɨtsya ebɨnwa byaye n'ɨkola nga ko binegenire. 48 Ashoshire nga mʉndʉ ahimbaga nyʉmba. Mwathanga ithima kʉtsɨbʉ mo kɨthaka ihika okw'ibwe. Na okw'ibwe eryo kwahiraga omʉsɨngɨ ahimbagako enyʉmba. Envʉla y'ekithi yabere yawa olwitsi molwotsula n'ametsi walo mwayihuma ko nyʉmba eyo hewethuwe mwalemwa ithengania enyʉmba eyo kʉshangwa yabyaga niyishikire. 49 Hewethuwe omʉndʉ yo wonvwa ebɨnwa byaye bʉthakola ng'oko binegenire, ashoshire mʉndʉ yo wahimbaga enyʉmba yɨwe ko kɨthaka buthathima aho ahira omʉsɨngɨ. Olwitsi lwabere lwotsula ametsi walo mwayihuma ko nyʉmba eyo aho n'aho moyathera n'ɨshambʉkala loshi.»