1 Yesʉ mwashʉba tsɨra abɨga bʉwe omushinga oyu, bʉshana n'ikangyabo bagende abashaba Gongo ko bɨro byoshi bʉthalʉha. 2 Mwanegena athɨ: «Mʉ muyi mʉgʉma mwabyaga musohi. Omusohi oyo abyaga niathubahire Gongo, na kandɨ niathashikitsye na bʉlɨ mʉndʉ woshi. 3 Na mo muyi oyo mwabyaga mʉshʉmbakatsɨ mʉgʉma. Omʉshʉmbakatsɨ oyo agenda amuhikira n'ɨmʉbwɨra athɨ: "Nyɨtsɨre kʉbʉya olʉbanza lwaye n'enzigu aye."

4 «Hewethuwe mʉ bɨro bɨngɨ, omusohi oyo mwathɨnda ɨmʉtsɨralo. Honyuma kw'aho mwayinegenia emwishi sɨwe athɨ: "Ingye nyithubahire Gongo na kandɨ nyithashikitsye bʉlɨ mʉndʉ. 5 Hewethuwe omʉshʉmbakatsɨ oyu kw'amanyiluhya, nyamʉtsɨra olʉbanza lʉwe lo kʉbʉya. Nɨmo athɨgende anyihikira ko ndambi soshi ɨnyɨkendetsya."»

6 Aho Nyinya-kowethʉ mwanegena athɨ: «Mwonvwe ebyo anegena omusohi oyu yo ʉthathʉnganene. 7 Na Gongo, abandʉ bw'ashombolaga bo banagenda abamʉlɨrɨra kɨro na mwɨshɨ andasohabo kʉbʉya na kandɨ athɨndathɨndɨre iwathikyabo. 8 Enyɨbabwɨra kw'andatsɨrabo olʉbanza tsʉba. Hewethuwe ingye Mʉgala w'oMʉndʉ nyandabya nyashʉbʉla nyanandeya mo kɨhʉgo mo bandʉ banyɨkɨrɨtsye?»

9 Kwabyaga bandʉ bo bagenda abayɨheka bathɨ ɨbo bobathʉnganene embere sa Gongo bo bagenda abasʉnzʉgʉra abandɨ. Aho Yesʉ mwatsɨrabo omushinga ono athɨ: 10 «Kɨro kɨgʉma bandʉ babɨrɨ mobayashaba mo Nyʉmba ya Gongo. Mʉgʉma abyaga Mufarisayo n'ogʉndɨ mukarani wa koli. 11 oMufarisayo oyo mwimana, n'ɨshaba bʉthɨmathɨma athɨ: "Oo Gongo, enyɨkʉsɨma kʉshangwa ingye nyɨthalɨ ng'abandɨ bandʉ. Ɨbo nɨ bɨtsɨ, bathathʉnganene na nɨ bashɨngɨtsɨ. Kandɨ enyɨkʉsɨma kʉshangwa ingye nyɨthalɨ ng'omukarani w'esokoli oyu. 12 Enyɨnɨngɨra mo mʉshabe wa buthalya kabɨrɨ ko yenga. Kandɨ enyɨnahana ekɨgʉma ky'ikumi ky'ebyoshi byo nyɨnabona."

13 «Omukarani w'ekoli ɨye, mwimana hale, kandɨ mwathanalinda ashʉmbɨra amesho ʉwe w'elʉbʉla. Mwabandanga ko kɨfʉba kɨwe bʉshana n'ɨhononokala nɨashaba buganyiri athɨ: "Oo Gongo, nyishashire ingye omukoli w'ebɨtsɨbʉ!"»

14 Aho Yesʉ mwanegena athɨ: «Enyɨbabwɨra, omukarani w'ekoli oyo mwashʉba ewe, Gongo nɨamamʉganzamo mʉthʉnganene. He oMufarisayo oyo ɨye ɨhɨ. Kʉshangwa obʉlɨ mʉndʉ yo wandagenda ayɨheka andakimibwa, he yo wandagenda ayihohya andahamibwa.»

15 Bandʉ bagʉma kuthyo bagenda abalethera Yesʉ yo abana balere bʉshana ahire kʉbo kw'eminwe. Abɨga babere balola kw'ebyo, mobakemera abandʉ abo. 16 Hewethuwe Yesʉ mwahamʉla bamʉlethere abana abo. Mwanegena athɨ: «Mulike abana balere bahike yo nyɨrɨ! Mʉthahangɨragabo, kʉshangwa abandʉ abalɨ ng'abo bo benye oBwamɨ bwa Gongo.Yesʉ agashanɨra abana balere 17 Kwenene enyɨbabwɨra nyɨthɨ, obʉlɨ mʉndʉ yo ʉthɨndɨangɨrɨre oBwamɨ bwa Gongo ng'omwana mʉlere, athɨndɨngɨre mʉbo na hake.»

18 Mʉkʉlʉ mʉgʉma mwabʉtsya Yesʉ athɨ: «Mʉkangɨrɨtsya mʉbʉya, nyɨyɨre nyɨthɨ nɨmo nyabona obʉyɨngo bwa kera na kera?» 19 Yesʉ mwamʉbʉtsya athɨ: «Bʉshana na ki ʉnyahʉlamo mʉbʉya? Hathalɨ mʉndʉ mʉbʉya athalɨ Gongo mʉsha. 20 Unetsi kw'oMʉgomba wa Gongo anegenire athɨ: "Ʉthagenda ʉsɨngɨra, ʉthagenda owitha, ʉthagenda owiba, ʉthagenda ʉhambɨka mʉndʉ, ʉgende ushikya sho na nyoko.*"» 21 Omʉndʉ oyo mwashubya athɨ: «Enyɨnakola ng'oko emɨgomba yoshi eyo inegenire ɨthoka ko bwana bwaye.»

22 Yesʉ abere onvwa ebyo mwamʉbwɨra athɨ: «Ukinabushire kɨndʉ kɨgʉma: ʉtsya ebyoshi uwitheko, n'esofaranga sathoka kʉbyo, gabɨratho abatsene. Wamakola uthyo nɨwayɨra bushoki mo lʉbʉla. Honyuma kw'aho hika unyikwame.»

23 Hewethuwe omʉndʉ oyo abere onvwa ebɨnwa ebi, mwafwa buliye bʉnene, kʉshangwa abyaga mushoki kʉtsɨbʉ.

24 Yesʉ abere ashʉnga ko mʉndʉ oyo ko amalire ibya n'obuliye, mwanegena athɨ: «Ega litsibuhire kʉtsɨbʉ ko bashoki ɨngɨra mo Bwamɨ bwa Gongo! 25 Lyolohire engamɨa ɨtsʉke mo kyuna ky'enandi kʉlenga ko mushoki ɨngɨra mo Bwamɨ bwa Gongo.»

26 Abandʉ bo bonvwaga ebɨnwa ebyo mobanegena bathɨ: «Aho, nɨ ndɨ yo wangashabʉlwa?» 27 Yesʉ mwashubya athɨ: «Ebɨthathokekene ko bandʉ bɨthokekene kʉ Gongo.»

28 Aho Petero mwanegena athɨ: «Shʉnga! Ithwe mothwamikire ebyoshi thwabyaga thʉwɨtheko n'ɨkʉkwama.» 29 Yesʉ mwabwɨrabo athɨ: «Kwenene enyɨbabwɨra, omʉndʉ amamika enyʉmba yɨwe kʉtse mʉkatsɨwe, kʉtse bagala babo, kʉtse babuthi bʉwe kʉtse bana bʉwe bʉshana n'oBwamɨ bwa Gongo, 30 andabona bɨndʉ bɨngɨ kʉtsɨbʉ ko mʉgʉlʉ ono. Na mo bɨro byandahika andabona bʉyɨngo bwa kera na kera.»

31 Honyuma kw'aho Yesʉ mwathwala abathʉmwa bʉwe ikumi na babɨrɨ ho mʉsɨke n'ɨbwɨrabo athɨ: «Shʉnga! Othwɨrʉkɨra mo muyi w'ɨYerʉsalemʉ. Nɨ mo muyi oyo mo ebyoshi ebyo abamɨnyeretsɨ bashakaga kʉ Mʉgala w'oMʉndʉ byandabererera. 32 Nyandahotherwa n'ihirwa mo minwe y'abandʉ, abandʉ b'ebɨhanda. Bandanyɨshekeretsya n'ɨnyɨhangya n'ɨnyɨtsɨrako mathandɨ. 33 Bandanyihumba mʉ mbasha na ko nduli bandanyitha. Na mo kɨro kya kashathʉ nyandalubuka.» 34 Hewethuwe abathʉmwa mobathamɨnya ebɨnwa ebi nga binegenire bɨthɨ ki. Kʉshangwa byabyaga nibibishirwe kʉbo. Aho mobathamɨnya Yesʉ ng'anegena ki.

35 Yesʉ abere ahika hofɨ n'omuyi w'iYeriko habyaga mbumi ngʉma niyikere emʉsɨke w'enzɨra nɨeyɨhema. 36 Mo ndambi embumi eyo yabere y'onvwa esongindo s'abandʉ bobagenda abatsʉka, moyabʉtsya yɨthɨ: «Mbe yabere ki?» 37 Abandʉ mobamʉshʉbɨtsya bathɨ: «Nɨ Yesʉ w'iNasareti yo ʉtsʉka.» 38 Aho mwahambala athɨ: «Yesʉ, Mʉgala wa Tawiti, ʉnyɨfwɨre shashi!»

39 Abo babyaga embere mobamʉkemera bathɨ atsɨre. He mwalengya mw'ɨhambala kʉtsɨbʉ athɨ: «Mʉgala wa Tawiti, nyɨfwɨre shashi!»

40 Yesʉ mwimana n'ɨhamʉla athɨ bamʉlethere embumi eyo. Babere bamuhikya hofɨ naye, Yesʉ mwamʉbʉtsya athɨ: 41 «Ushondya nyɨkʉkolere ki?» Mwashubya athɨ: «Nyinya-kowethʉ, enyishondya nyɨshʉbe lola.» 42 Aho Yesʉ mwamʉbwɨra athɨ: «Shʉba lola! Olwɨkɨrɨtsyo lwawe lwamakulamya.» 43 Aho n'aho, mwashʉbalola. Mwakwama Yesʉ nianemusingya Gongo. Abandʉ boshi babere bashʉnga kw'ebyo, nabo kuthyo mobasingya Gongo.