1 Oko ndambi eyo, bandʉ bagʉma mobaya ahalɨ Yesʉ nɨabayamʉbwɨra ng'oko Pilato mwithisa bandʉ bagʉma omo kɨhʉgo ky'iNgalilaya, mo ndambi bagenda abakera so nyama s'ɨherera Gongo. 2 Yesʉ mwabʉtsyabo athɨ: «Omʉganɨtsya mʉthɨ abandʉ b'iNgalilaya abo bithawa bathyo, n'ɨnegena mbʉ babyaga bakoli b'ebɨtsɨbʉ kʉlenga abandɨ abandʉ b'iNgalilaya boshi? 3 Ɨhɨ! Enyɨbabwɨra nyɨthɨ nemwe muthabindukire, nemwe boshi kuthyo mwandafwa nga ko bafwaga. 4 N'omo muyi w'iSiloamu, omʉnara mwatherera kʉ bandʉ ikumi na mʉnanɨ, nabo mobafwa. Omʉganɨtsya mʉthɨ babyaga bakoli b'ebɨbɨ kʉlenga abahimbani boshi b'ɨYerʉsalemʉ? 5 Ɨhɨ! He enyɨbabwɨra nemwe nyɨthɨ, muthabindukire ɨthoka mo bɨtsɨbʉ byenyu, nemwe boshi mwandafwa nga abandʉ abo ko bafwaga.»

6 Honyuma kw'aho, Yesʉ mwatsɨrabo ogʉndɨ mushinga ono athɨ: «Habyaga mʉndʉ mʉgʉma abyaga niaherire mʉthɨ wa mutini mw'ɨshwa lɨwe ly'emisabibu. Kɨro kɨgʉma mwayashondya kʉwo ko biguma he mwathabonabyo kʉwo. 7 Bʉshana n'ekyo, mwabwɨra omukoli yo wagenda amʉkolera mw'ɨshwa lɨwe athɨ: "Shʉnga! Eno nɨ mɨaka ishathu yamatsʉka nienyinashondya biguma ko mʉthɨ w'omutini oyu, he nyɨthalɨ enyɨnabonako nethe. Bʉshana n'ekyo tsawo! Kʉshangwa abihya ekɨthaka kyo bʉsha." 8 Hewethuwe omukoli oyo mwashubya athɨ: "Nyinya-kowethʉ, thashʉba likawo kandɨ ko mwaka ono. Nyashʉba shekererawo n'ihiramo bʉyɨnʉ. 9 Omw'ɨkola ebyo kʉthɨ anganaheka biguma mo mwaka owahika. Bɨthabere bithyo aho nɨmo wandatsawo."»

10 Kɨro kɨgʉma ky'eSabato Yesʉ agenda akangɨrɨtsya bandʉ mo sinakoki. 11 Mo sinakoki eyo mwabyaga mʉkatsɨ mʉgʉma mukoni. Omʉkatsɨ oyo abyaga nɨamamala mɨaka ikumi na mʉnanɨ nianemunubibwa n'omʉtsɨmʉ mʉbɨ. Omʉtsɨmʉ oyo abyaga niafunyire omʉgongo ʉwe ihika ko kɨka k'ɨremwa ɨyɨsɨngɨka. 12 Yesʉ abere amʉshʉngako mwamʉbɨrɨkɨra n'ɨmʉbwɨra athɨ: «Koyo, wamalamibwa obʉlema bwawe.» 13 Yesʉ mwamuhirako eminwe, aho n'aho, omʉkatsɨ oyo mwashʉba yɨsɨngɨka n'ɨthanga isingya Gongo.

14 Hewethuwe omʉkʉlʉ w'esinakoki eyo, mwatsɨbʉka bʉshana na Yesʉ kw'amalamya omukoni ekɨro ky'eSabato. Bʉshana n'ekyo, mwabwɨra omuhindano w'abandʉ athɨ: «Kʉlɨ bɨro ndathʉ b'ɨkolamo mʉlɨmo. Nɨmo bɨro ebyo momʉtholere ɨgenda omuhika bʉshana mulamibwe, he kɨthalɨ ekɨro ky'eSabato.»

15 He Nyinya-kowethʉ mwamʉshʉbɨtsya athɨ: «Mʉlɨ bayimbya! Ndɨ munetsi kw'ekɨro ky'eSabato obʉlɨ mʉndʉ mw'imwe anagenda ahangʉla ende kʉtse epʉnda yɨwe aho ɨnagenda ɨhangwa bʉshana athwalero ko maliba. 16 Omʉkatsɨ ono nɨ w'omo lʉganda lwa Abʉrahamʉ yo Sitani amɨnaga mɨaka ikumi na mʉnanɨ. Aho, bɨthatholere amɨnʉlwe mo kɨro ky'eSabato?»

17 Yesʉ abere amamala ɨnegena ebɨnwa ebyo, esonzigu sɨwe soshi mosafwa shoni. He omuhindano woshi w'abandʉ ɨwo, mwagenda amogera ebɨthɨko-thɨko byoshi Yesʉ agenda akola.

18 Yesʉ mwashʉba negena athɨ: «oBwamɨ bwa Gongo bwangashoshekanibwa na ki? Kandɨ iki kyo nyangalingania nabo? 19 oBwamɨ obo bushoshire nga kambulu kake ka haratali, ko mʉndʉ mʉgʉma ayaga hera mw'ɨshwa lɨwe. Akambulu kake ako mokalasha mokabya mʉthɨ mʉnene, n'ebɨronge mobyayahimba so nyʉthʉ sabyo ko mɨthahɨ yago.»

20 Yesʉ mwashʉba negena athɨ: «oBwamɨ bwa Gongo nyangalinganiabo na ki? 21 oBwamɨ obo bushoshire nga tsatsʉ yo mʉkatsɨ mʉgʉma atsɨmbaga n'ithulunganiaro mʉ hɨthonga hɨshathʉ hya shyano, ihika ko kɨka eshyano yoshi moyabimba.»

22 Yesʉ abyaga mo lʉgendo lw'ɨrʉkɨra ɨYerʉsalemʉ. Mwatsʉka mo miyi n'omo mɨrongo nɨakangɨrɨtsya bandʉ. 23 Mʉndʉ mʉgʉma mwamʉbʉtsya athɨ: «Nyinya-kowethʉ, nɨna bandʉ bake bo bandashabʉlwa?» Yesʉ mwabwɨrabo athɨ: 24 «Mʉyɨtsɨnge ɨngɨra mo lukyo lʉfʉnda. Kʉshangwa enyɨbabwɨra kwenene, bandʉ bangɨ bandayɨrenga ɨngɨra mʉlo he bandalemwa.

25 «Omwenye enyʉmba andabya nɨamamala imana n'ɨkɨnga oluyi, nemwe mwandabya nimwimene embʉga. Nemwe mwandathanga ɨkongotha ko luyi nɨomʉnegena mʉthɨ: "Nyinya-kowethʉ, thʉkɨngʉlɨre!" Naye andabashʉbɨtsya athɨ: "Nyithetsi yo mʉthoka." 26 Aho mwandathanga ɨnegena mʉthɨ: "Thwalyaga n'ɨshoma hagʉma nawe. Kandɨ mowakangɨrɨtsya abandʉ b'omo mɨhengere y'omo muyi ethʉ." 27 Hewethuwe andababwɨra athɨ: "Nyithetsi yo mʉthoka. Mʉthoke mo mesho aye imwe boshi bakoli b'ebɨbɨ!" 28 Mwandashʉnga Abʉrahamʉ, na Isaka, na Yakobo n'abamɨnyeretsɨ boshi mo Bwamɨ bwa Gongo. H'imwe mwandagʉshwa embʉga. Eyo, mwandalɨra n'ɨshʉnga kya bwana. 29 Abandʉ bandathoka ebʉbʉkɨra ɨtsʉba n'ebʉlengera ɨtsʉba, ko mʉnda lʉgʉlʉ na ko mʉnda kihya. Abandʉ abo bandikala niabalya kalyo mo Bwamɨ bwa Gongo. 30 Mʉhʉlɨkɨrɨtsye! Bandʉ bagʉma bo balɨ banyuma-nyuma bandabya bambere-mbere. Na bo balɨ bambere-mbere bandabya banyuma-nyuma.»

31 Mo kathambi ako Bafarisayo bagʉma mobahikira Yesʉ n'ɨmʉbwɨra bathɨ: «Yɨhɨgʉle, kʉshangwa Herote ashondya ikwitha.» 32 Yesʉ mwashʉbɨtsyabo athɨ: «Mʉyabwɨre omʉtherere oyo mʉthɨ: "Enyɨbɨnga emɨtsɨmʉ mɨbɨ, n'ilamya abakoni munobwire na mʉmakera. Na mwabwakya nyandabya nɨnyamamala omʉlɨmo aye." 33 Hewethuwe lɨtholere munobwire na mʉmakera, na mwabwakya nyɨkwame olʉgendo. Kʉshangwa lɨthatholere omʉmɨnyeretsɨ niathithirwa mʉ ʉndɨ muyi athalɨ w'ɨYerʉsalemʉ.

34 «Imwe bahimbani b'ɨYerʉsalemʉ! Imwe momʉnagenda omwitha abamɨnyeretsɨ. N'abandʉ Gongo anabathʉmɨra omʉnagenda omwɨthabo mw'ihumabo mabwe. Ngendo sɨngahɨ monyashondire ibahindania ng'engoko ko ɨnagenda eyihindania ehipyeye mo bipupa byaro. He, imwe momwathindire. 35 Monvwe! Enyʉmba enyu yandabya kihuma. Enyɨbabwɨra kwenene, ko mʉthɨndashʉbe nyɨlolako ihika ko ndambi mwandanegena mʉthɨ: "Agashanɨrwe yo uhika kw'ɨtsɨna lya Nyinya-kowethʉ!*"»