1 Kɨro kɨgʉma Yesʉ abyaga mo Nyʉmba ya Gongo. Abere athimbya amesho ko bandʉ mwashʉnga nga ko abashoki bagenda abahira ebɨhembo by'omo kibo. 2 Mwashʉnga kuthyo mʉshʉmbakatsɨ mʉgʉma mʉtsene naye mwahira hɨtsere hɨbɨrɨ hya faranga mo kibo ekyo. 3 Aho Yesʉ mwanegena athɨ: «Kwenene enyɨbabwɨra, omʉshʉmbakatsɨ mʉtsene oyu, yo wamahana bɨhembo bɨngɨ kʉlenga abandɨ bandʉ boshi. 4 Kʉshangwa abandɨ boshi, ebɨhembo bya faranga bathahana nɨ so sɨthashaka ko bushoki bwabo. He omʉshʉmbakatsɨ oyu ɨye mo bʉtsene bʉwe amahana ebyoshi athawitheko byo byangalekire niabyaho.»

5 Bandʉ bagʉma bagenda abasɨmola ko myatsɨ y'eNyʉmba ya Gongo. Bagenda abanegena bathɨ eNyʉmba ya Gongo eyi yihimbire kʉbʉya, mʉ mabwe akwirire, n'omo bɨndɨ bɨndʉ bikwirire ebyo abandʉ bahaga Gongo. He Yesʉ mwanegena athɨ:eNyʉmba ya Gongo y'ɨYerʉsalemʉ 6 «Ebyo mushungireko ebi, ebɨro byandahika eribwe lithindashibe elʉgʉlʉ w'erɨndɨ. Ebyoshi byandashambʉlwa.»

7 Aho abandʉ mobamʉbʉtsya bathɨ: «Mʉkangɨrɨtsya, emyatsɨ eyi yandahika kɨro ki? Na kɨhe kyo kɨmɨnyɨkalo kyandathukangania ko yahera hofɨ n'ɨbererera?»

8 Yesʉ mwashʉbɨtsyabo athɨ: «Muyitheye mʉthathɨmawa. Kʉshangwa bandʉ bangɨ bandahika mw'ɨtsɨna lyaye. Bandagenda abanegena bathɨ n'ɨbo bo Kirisito. Kandɨ bandanegena bathɨ endambi eyo yamalire ihika! He abandʉ abo mʉthakwamagabo. 9 Mwandabya mwonvwa abandʉ balɨ abanegena ko myatsɨ y'ebita n'oko hwehweri y'obʉrʉnga, mʉthagenda omʉbaha. Kʉshangya lɨtholere ebyo nɨbyathanga ihika, hewethuwe bɨthalɨ ebikangania kw'enduli y'ekɨhʉgo yahika ko bɨro ebyo.»

10 Honyuma kw'aho Yesʉ mwashʉba bwɨrabo athɨ: «Ekɨhanda kyandalwa n'ekɨndɨ, n'obwamɨ bwandalwa n'obʉndɨ. 11 Kwandatsʉka thulingiti thʉtsɨbʉ. Kwandabya nzala nzɨbʉ na makoni handʉ hangɨ hangɨ. N'omo lʉbʉla mwandabya bɨmɨnyɨkalo b'ishwekya, byo byandubahya abandʉ bo kʉtsɨbʉ.

12 «Hewethuwe embere ebyoshi ebi bihike, bandabatsɨmba n'ibanubya. Bandabathwala mo so sinakoki bʉshana n'ɨyabʉrana n'ɨbagʉsha mo muliki. Kandɨ bandagenda ababaletha embere s'abamɨ n'abakʉlʉ b'ekɨhʉgo bʉshana nangye. 13 Ekyo kyandaleka nɨmwaletha obutimo bwenyu. 14 He bɨno byo mʉtholere nɨmwamɨnya: Mʉthagenda omʉthanga igangya-gangya emɨthɨma enyu nga mwandayɨlwako mʉthɨ. 15 Kʉshangwa nɨ ingyowene ngyo nyandabaha ebɨnwa by'obuthegekania byo mwandanegena, ihika ko kɨka so nzigu senyu soshi sithindakotsye ikubisania nemwe kʉtse ɨthɨnda ebyo mʉthanegena. 16 Na kuthyo bo sho na bo nyoko, na bagala benyu, n'ababuthi benyu, n'abira benyu, nabo kuthyo bandabahothera ko bakʉlʉkʉlʉ. Bagʉma mw'imwe bandasoherwa ithwa. 17 Abandʉ boshi bandababaga bʉshana na ngye. 18 Hewethuwe hathalɨ lʉtswɨrɨ n'olʉgʉma lw'oko mithwe enyu lolwandahera. 19 Bʉshana n'ebyo muhathikanie mw'itsitsinia, kʉshangwa omw'itsitsinia eryo, mo mwandashabʉla obʉyɨngo bwenyu.»

20 Yesʉ mwashʉba negena athɨ: «Mwandabya mwashʉnga omuyi w'ɨYerʉsalemʉ athimbwako n'abashirikani, aho mʉmɨnye kw'erɨshambʉlwa lyawo lɨrɨ hofɨ. 21 Aho abandʉ bo bandabya iYuteya, bagende bashayɨre ko bɨthwa. N'abo bandabya mo muyi w'ɨYerʉsalemʉ bagende bathoke mʉwo. N'abo bandabya mo mashwa bathandashʉba mo muyi.

22 «Kʉshangwa ebɨro ebyo byandabya bɨro byo Gongo andasoha abandʉ, nɨmo ebyoshi byo bishakirwe mo Mashako Abuyirire bɨbererere.* 23 Mo bɨro ebyo, kwandabya bʉhanya ko bakatsɨ bo bandabya nɨ bakʉle, n'abo bandabya niabongya! Kʉshangwa kwandabya malɨgo manene mo kɨhʉgo ekyo na Gongo andakangania obʉhɨthane bʉwe ko bandʉ abo. 24 Bandʉ bagʉma bandithwa mo muyali, n'abandɨ bandalerekwa mʉ bɨndɨ bɨhʉgo. N'abandʉ b'ebɨhanda bandalyathanga omuyi w'ɨYerʉsalemʉ ihika ko kɨro endambi yabo yandahwa.»

25 Yesʉ mwashʉba negena athɨ: «Ebɨmɨnyɨkalo byandashʉngɨka mw'ɨtsʉba, n'omo mʉgenda, n'omo songununu. Na mo kɨhʉgo abandʉ bandabya mʉ malɨgo na mw'ɨhononokala bʉshana n'erɨhʉha n'emibimbi by'engetsɨ. 26 Abandʉ bandagenda abalekʉla bʉshana n'omushiki omw'ɨrɨndɨrɨra ebyo byandabya mo kɨhʉgo. Kʉshangwa byo biwithe amaka mo lʉbʉla byandathenganibwa. 27 Aho bandashʉnga oMʉgala w'oMʉndʉ nɨathoka mo kɨfʉ, na maka, na lʉkengerwa lʉnene. 28 Emyatsɨ eyo yandabya yathanga ɨhʉlʉka, mwimane na mʉyɨsɨngɨrɨke kʉshangwa endambi y'erɨshabʉlwa lyenyu yɨrɨ hofɨ.»

29 Honyuma kw'aho Yesʉ mwashʉba tsɨra abandʉ b'omushinga ono athɨ: «Mʉlolere ko mʉthɨ w'omutini n'eyɨndɨ mɨthɨ yoshi. 30 Omunabya mwashʉnga ebɨbabɨ byaro byathanga ɨlasha nɨmwamɨnya kw'ekɨgenyero kikwirire kɨrɨ hofɨ. 31 Na kuthyo, mwandabya mwalola emyatsɨ eyi yabya, mʉmɨnye k'oBwamɨ bwa Gongo bʉhera hofɨ. 32 Nɨ kwenene, enyɨbabwɨra ko emyatsɨ yoshi eyo yandabererera abandʉ b'omo lʉgero lʉno bandabya nibathetsi bafwa aboshi. 33 Olʉbʉla n'ekɨhʉgo byandatsʉka, he ebɨnwa byaye ɨbyo bɨthɨndatsʉke na hake.»

34 Yesʉ mwashʉba negena athɨ: «Muyitheye nɨmo emɨthɨma enyu ɨthɨtsɨthoherwe mw'ishondya irya bɨngɨ kʉtsɨbʉ n'omo bukundirya na omw'iganga-gangya emɨthɨma enyu bʉshana n'obʉyɨngo bwenyu. Muthayitheyitsye, ekɨro ekyo ky'erihika lya Kirisito kyandabalɨbʉkanɨtsya, 35 ng'omʉthego kwanagenda atsɨmba. Kʉshangwa ekɨro ekyo kyandalɨbʉkanɨtsya abandʉ b'omo kɨhʉgo kyoshi. 36 Aho mʉthayagatho! Mʉgende omʉshaba Gongo ko ndambi soshi. Nɨmo mwandabona kagala k'ɨyɨhɨgʉla ko bɨndʉ byoshi byandahika, n'imana embere saye ingye Mʉgala w'oMʉndʉ.»

37 Yesʉ agenda ashiba mo Nyʉmba ya Gongo niakangɨrɨtsya abandʉ. N'omo kɨro agenda ayagonzera ko kɨthwa ky'eMiseituni. 38 Abandʉ boshi bagenda abamuhikira mo mambya mo Nyʉmba ya Gongo bʉshana n'ɨmʉhʉlɨkɨrɨtsya.