1 Honyuma kw'aho, Nyinya-kowethʉ mwashombola bandɨ bɨga makumi alɨnda na babɨrɨ.* Mwathʉmabo mo babɨrɨ-babɨrɨ bamʉthange embere mo bʉlɨ muyi na bʉlɨ handʉ angayire yowene. 2 Mwabwɨrabo athɨ: «Emyaka yerire mɨngɨ, he abakoli nɨ bake. Bʉshana n'ekyo, mʉshabe omwenye emyaka athʉme bandɨ bakoli mw'ɨshwa lɨwe. 3 Ewo mʉgende! Hewethuwe mʉmɨnye ko nyamabathʉma ng'ebyana by'esombuli mo kathi k'esonyambwe. 4 Mʉthahekaga faranga kʉtse shaho, kʉtse bɨrato. Na mʉthaketsyaga mʉndʉ mo nzɨra.

5 «Mo bʉlɨ nyʉmba mwandagenda omwɨngɨra, mʉketsye benyemo mʉthɨ: "Bʉholo bubye mo nyʉmba eno." 6 N'omo nyʉmba eyo mwamabya mʉlɨ mʉndʉ ashondya bʉholo, obʉholo bwenyu obo, bwandamʉshɨgalɨra. Bɨthalɨ bityo, obʉholo bwenyu obo, bwandabashʉbʉlɨra. 7 Mwikale mo nyʉmba eyo, mulye n'ɨshoma ebyo abenye enyʉmba bandabaha. Kʉshangwa omukoli atholere ɨhabwa lʉhembo lʉwe. Mʉthathokaga mo nyʉmba n'ɨngɨra mʉ yɨndɨ. 8 N'omo bʉlɨ muyi wo mwandɨngɨramo, abandʉ bamabakokya, mulye byo abandʉ abo bandabaha. 9 N'abakoni bo balɨ mo muyi oyo, mulamyebo n'ɨbwɨra abandʉ b'omo muyi oyo mʉthɨ: "oBwamɨ bwa Gongo bʉlɨ hofɨ nemwe." 10 He mo bʉlɨ muyi abikalani bamo bandathɨnda ibakokya, mʉgende mo mbʉga yawo n'ɨnegena mʉthɨ: 11 "Thwamabakʉngʉthɨra oluthuthu lw'omuyi enyu olʉlɨ ko bɨshando byethʉ.* He mʉmɨnye kʉbʉya kw'oBwamɨ bwa Gongo bʉlɨ hofɨ." 12 Kwenene enyɨbabwɨra nyɨthɨ, ekɨro ky'esohi kyandabya kyahika abandʉ b'omo muyi oyo, bandasohwa kʉtsɨbʉ kʉlenga abandʉ b'omuyi w'ɨSotomo.*»

13 Yesʉ mwashʉba negena athɨ: «Bʉhanya kw'imwe Banyakorasini! Na bʉhanya kw'imwe Banyabetesaita! Kʉshangwa monyakolire ebɨthɨko-thɨko mo kathi kenyu. Ebɨthɨko-thɨko ebyo kʉbwɨra mbʉ nyakoleragabyo aBanyatiro n'aBanyasitona, ɨbo bangambere mɨbʉta n'ikala omw'ɨfʉ bʉshana n'ikangania ko bamabɨndʉka ɨthoka mo bɨtsɨbʉ byabo. 14 Bʉshana n'ekyo, ekɨro ky'erɨsoha, aBanyatiro n'aBanyasitona bandasohwa kʉke kʉlenga aBanyakorasini n'aBanyabetesaita. 15 Nemwe Banyakaperenaʉmʉ, omʉganɨtsya mʉthɨ mwandirukibwa ihika mo lʉbʉla? Ɨhɨ! Mwandakimibwa ihika okw'ɨrʉnga!»

16 Yesʉ Mwashʉba bwɨra abɨga bʉwe athɨ: «Oy'ʉbahʉlɨkɨrɨtsya n'ingye ahʉlɨkɨrɨtsya. Hewethuwe oyo wamabathɨnda n'ingye amathɨnda. N'oyo wamanyɨthɨnda, nɨamathɨnda yo wanyɨthʉmaga.»

17 Honyuma kw'aho, abɨga makumi alɨnda na babɨrɨ abo, mobashʉbʉla nɨbalɨ n'olʉmogo lʉnene. Mobanegena bathɨ: «Nyinya-kowethʉ, emɨtsɨmʉ mɨbɨ naro thwabere thʉlɨ othʉbɨngaro mw'ɨtsɨna lyawe moyagendire eyɨthʉkenga!» 18 Aho Yesʉ mwabwɨrabo athɨ: «Monyashungire Sitani nɨathoga mo lʉbʉla ng'omulabyo. 19 Monvwe! Monyabahere maka w'ikinda Sitani. Nɨ omo maka ayo momwagenda omʉlyathɨra so nzoka n'esonge, hathakɨrɨ ekyangabayɨra kʉbɨ. 20 He, mʉthamogaga bʉshana n'emɨtsɨmʉ ko yɨbakenga. Hewethuwe mʉmoge kʉshangwa amatsɨna enyu ashakirwe mo lʉbʉla.»

21 Kona ndambi eyo, Yesʉ mwamoga kʉtsɨbʉ mo maka w'oMʉthɨma Mwerʉ. Mwanegena athɨ: «Thatha, ɨwe Muthegeki w'olʉbʉla n'ekɨhʉgo! Enyɨkʉsɨma kʉshangwa ebɨnwa bɨno mowabishabyo abathegekania n'abawithe obwenge. He mowabishulirabyo abana balere. Ega, mbe Thatha! Ebyoshi ebi bɨthokene kw'ɨshasha lyawe!

22 «Thatha mwanyɨhere ebyoshi. Hathalɨ mʉndʉ yo wetsi oMʉgala athalɨ Thatha mʉsha. Na kandɨ hathalɨ mʉndʉ yo wetsi Thatha athalɨ Mʉgala mʉsha, n'obʉlɨ mʉndʉ yo Mʉgala ashashire amʉmɨnye.»

23 Aho Yesʉ mwabɨndʉkɨra ahabyaga abɨga bʉwe. Mwabwɨrabo ɨbo bene athɨ: «Amesho ow'alola ko by'omʉlolako bɨno amagashanɨrwa. 24 Kwenene enyɨbabwɨra, bamɨnyeretsɨ bangɨ na bamɨ bangɨ mobashondya ɨlola ko by'omʉlolako, he mobathalola kʉbyo. Kandɨ mobashondya ɨonvwa ebyo mwonvwa ebi, he mobathonvwabyo.»

25 Honyuma kw'aho, mʉkangɨrɨtsya mʉgʉma w'oMʉgomba mwimana niashondya ɨlenga kʉ Yesʉ. Mwabʉtsya Yesʉ athɨ: «Mʉkangɨrɨtsya, nyangakola ki bʉshana nyɨbone obʉyɨngo bw'ekera na kera?»

26 Yesʉ mwamʉshʉbɨtsya athɨ: «Mo Mʉgomba mushakirwe ki? Ʉlɨ ʉsomawo ʉnonvwawo ʉthɨ?» 27 Omʉkangɨrɨtsya w'oMʉgomba oyo mwamʉshʉbɨtsya athɨ: «Ʉtsɨɨre Nyinya-kowethʉ Gongo wawe n'omʉthɨma awe woshi, n'obwenge bwawe boshi, n'akagala kawe koshi, n'emɨganɨtsye awe yoshi. Na ʉtsɨɨre mulikyenyu ng'oko uyitsiire wowene.*» 28 Aho Yesʉ mwamʉbwɨra athɨ: «Wamashubya kʉbʉya! Ʉgende ʉkola uthyo nawe wandabyaho.»

29 Hewethuwe omʉkangɨrɨtsya w'oMʉgomba oyo, mwashondya ikangania kw'asɨngene. Aho mwabʉtsya Yesʉ athɨ: «Na ndɨ yo mulikyethu?»

30 Yesʉ mwamʉshʉbɨtsya athɨ: «Mʉndʉ mʉgʉma agenda athoka ɨYerʉsalemʉ nɨ akimira iYeriko. Abere akɨnalɨ mo nzɨra abashamuli mobamʉwako. Abashamuli abo mobamʉnyaga ebyoshi abyaga awitheko, mobamunoya, mobayɨgendera nibamamushiga hofɨ ɨfwa.

31 «Mokwahʉlʉka muheri mʉgʉma wa Gongo agenda akima mo nzɨra eyo. Abere ashʉnga yo uthahumbwa mwatsʉka emʉsɨke n'ɨyɨgendera. 32 Mulawi* mʉgʉma naye mwahikaho. Abere ashʉnga ko mʉndʉ oyo, naye mwatsʉka emʉsɨke n'ɨyɨgendera.

33 «Honyuma kw'aho, mokwahʉlʉka Mʉsamarɨa mʉgʉma abyaga mo lʉgendo. oMʉsamarɨa oyo mwahika ahabyaga omʉndʉ wahumbawa. Ɨye abere amʉshʉngako mwamʉfwɨra shashi. 34 Mwayɨfʉnda hofɨ naye, mwashomola ebɨhʉlʉ bɨwe mw'ihira mʉbyo mo mafʉtha n'etifayi n'ɨmɨnabyo. Mwamʉshʉmbɨra ko pʉnda yɨwe mwamʉthwala eyɨrɨ enyʉmba y'abageni bʉshana bamʉlweko.Mʉsamarɨa mʉbʉya ashomola ebɨhʉlʉ bya mʉndʉ athahumbwa 35 Bwabere bwakya, mwahulukya tinari* ibiri, mwahatho omwenye nyʉmba y'abageni n'ɨmʉbwɨra athɨ: "Omʉndʉ oyu ʉmʉlweko kʉbʉya. Nyandakʉfʉha esɨndɨ tinari soshi ko byoshi wamʉkolera nyandabya nyashʉbʉla."»

36 Ko nduli Yesʉ mwabʉtsya omʉkangɨrɨtsya w'oMʉgomba oyo athɨ: «Mo mɨganɨtsye awe ko bandʉ bashathʉ abo, nɨ ndɨ yo wabyaga mulikyabo w'oyo wahumbawa n'abashamuli?» 37 Omʉkangɨrɨtsya w'oMʉgomba oyo mwashubya athɨ: «Oyo wamʉfwɨraga shashi.»

Yesʉ mwamʉbwɨra athɨ: «Enda! Nawe ʉgende ʉkola uthyo.»

38 Yesʉ n'abɨga bʉwe babere banalɨ mo lʉgendo, mwɨngɨra mʉ mʉrongo mʉgʉma. Mʉkatsɨ mʉgʉma yo ʉnahʉlwamo Marata mwamukokya mo nyʉmba yɨwe. 39 Maratha oyo abyaga awithe mʉlʉmʉna ʉwe, agenda ahʉlwamo Marɨa. Marɨa oyo mwikala ho mʉsɨke w'ebɨshando bya Nyinya-kowethʉ, nɨahʉlɨkɨrɨtsya ebɨnwa bɨwe. 40 He Marata ɨye abyaga nɨathʉba-thʉba mo mʉlɨmo w'ɨtheka kalyo. Mwahika ahalɨ Yesʉ mwamʉbwɨra athɨ: «Nyinya-kowethʉ, mʉlʉmʉna aye mwanyimikira omʉlɨmo w'ingye ngyowene, bithakubwire kɨndʉ? Mʉbwɨre anyiwathikye.»

41 Nyinya-kowethʉ mwamʉshʉbɨtsya athɨ: «Marata! Ɨwe ʉyagatsya n'ɨthʉba-thʉba mʉ bɨndʉ bɨngɨ. 42 Hewethuwe, nɨ kɨndʉ kɨgʉma bʉsha kyo kɨtholere. Marɨa ɨye amashombola kɨndʉ kɨbʉya kʉtsɨbʉ. N'ekyo athɨndanyagʉlwekyo.»