17 Yesʉ abere alotsya ebʉshondotsɨ mo lʉgendo lʉwe, mʉndʉ mʉgʉma mwamuhikira tsʉba n’ɨfʉkama embere sɨwe n’ɨmʉbʉtsya athɨ: «Mʉkangɨrɨtsya mʉbʉya, nyɨyɨre nyɨthɨ bʉshana nyɨbone obʉyɨngo bwa kera n’ekera?»
18 Yesʉ mwamʉshʉbɨtsya athɨ: «Bʉshana na ki ogʉnyahʉlamo mʉbʉya? Hathalɨ mʉndʉ mʉbʉya, athalɨ Gongo mʉsha. 19 Unetsi ko amathegeko anegenire athɨ: "Uthithaga, ʉthasɨngɨraga, uthibaga, ʉthalegaga mʉndʉ, ʉthathɨmaga, ushikye sho na nyoko."»
20 Omʉndʉ oyo mwamʉshʉbɨtsya athɨ: «Mʉkangɨrɨtsya, nyishikitsye amathegeko woshi ayo ɨthanga mo bʉtsana bwaye.»
21 Yesʉ mwamʉkebera mʉ lwanzo, n’ɨmʉbwɨra athɨ: «Ubushire kɨndʉ kɨgʉma kɨsha. Enda ʉyagʉtsye ebɨndʉ byawe byoshi, n’esofaranga so sathoka kʉbyo ʉgabɨretho abatsene. Nawe wayɨra bushoki mo lʉbʉla. Honyuma kw’aho uhike, ʉnyɨkwame!» 22 Hewethuwe omʉndʉ oyo abere onvwa ebɨnwa ebyo, mwafʉnya obʉsʉ, n’ɨyɨendera mw’ɨhononokala, bʉshana abyaga mushoki kʉtsɨbʉ. 23 Yesʉ mwakebera abɨga bo babyaga bamuthimbireko n’ɨbwɨrabo athɨ: «Kwenene bitsibuhire ko bashoki erɨngɨra mo Bwamɨ bwa Gongo!»
24 Abɨga babere bonvwa ebɨnwa ebyo, mobashweka kʉtsɨbʉ. Hewethuwe Yesʉ mwashʉba bwɨrabo athɨ: «Bana baye, bitsibuhire kundu erɨngɨra mo Bwamɨ bwa Gongo! 25 Byanguhire kʉtsɨbʉ ko ngamɨa ɨtsʉka mo kyuna ky’enandi kʉlenga omushoki erɨngɨra mo Bwamɨ bwa Gongo.»
26 Abɨga babere bonvwa ebɨnwa ebyo mobashʉba shweka ihika ko kɨka mobathanga ibutsania ɨbo kw’ɨbo bathɨ: «Ewono, nɨ ndɨ yo wangashabʉlwa?»
27 Yesʉ mwahanda kʉbo kw’amesho n’ɨbwɨrabo athɨ: «Ko bandʉ bɨthathokekene, hewethuwe kʉ Gongo ko bɨthalɨ bithyo, kʉshangwa ebyoshi bɨthokekene kw’ɨye.»
28 Petero mwamʉbwɨra athɨ: «Lola, ithwe thwamamika ebyoshi n’ɨkʉkwama!»
29 Yesʉ mwashubya athɨ: «Kwenene enyɨbabwɨra: kw’omʉndʉ amamika enyʉmba yɨwe, kʉtse bagala babo, kʉtse balɨ babo, kʉtse nyinya, kʉtse ishe, kʉtse abana bʉwe kʉtse mashwa ʉwe bʉshana nangye na bʉshana n’eNgʉlʉ Mbʉya, 30 andahamba ngendo igana kalengyo mo mʉgʉlʉ ono. Na andahamba manyʉmba, na bagala babo, na balɨ babo, na nyinya, na bana. Hagʉma n’ebyoshi ebyo, andabona na malɨgo ko kɨhʉgo kɨno. Na mo mʉgʉlʉ owandahika andahamba bʉyɨngo bwa kera n’ekera. 31 Hewethuwe bangɨ bo balɨ bambere-mbere munobwire, bandabya banyuma-nyuma, na bangɨ bo balɨ banyuma-nyuma munobwire, bandabya bambere-mbere.»