1 Yesʉ mwashʉba negena athɨ: «Kwenene enyɨbabwɨra nyɨthɨ: bagʉma mo bandʉ bo balɨ hano bathɨndafwe bathetsi balola ko Bwamɨ bwa Gongo bʉlɨ obuhika n'amaka.»

2 Honyuma wa bɨro ndathʉ, Yesʉ mwatsɨmba Petero, na Yakobo na Yoani, na mwathwalabo ɨbo bene ko kɨthwa kɨre. N'eyo obʉsʉ bwa Yesʉ mobwahɨndʉka embere sabo. 3 Esongɨmba sɨwe mosahɨndʉka mʉshohe kʉtsɨbʉ n'ɨnyenyetha. Naho mo kɨhʉgo hathalɨ mwengenge yo wangakotsya ɨnyenyethya athyo*. 4 Aho n'aho abɨga bashathʉ abo mobashʉnga Elia bana Mʉsa nɨabasɨmola na Yesʉ. 5 Aho Petero mwabwɨra Yesʉ athɨ: «Mʉkangɨrɨtsya, bikwirire kw'ithwe ibya hano. Thuhimbe hema ishathu, ngʉma yɨwawe, na ngʉma ya Mʉsa na yɨndɨ ya Elia.» 6 Petero mwathamɨnya ekyo anganegena kʉshangwa ɨye na balikyabo mobʉbaha. 7 Aho ekɨfʉ mokyahʉlʉka n'ɨshwɨkabo. N'omo kɨfʉ ekyo momwonvwɨka mʉlenge nɨanegena athɨ: «Ono nɨ Mʉgala aye mʉtsɨɨrwa. Mʉmʉhʉlɨkɨrɨtsye!» 8 Aho n'aho abɨga mobakeba-keba ko mbande sabo soshi, mobathashʉnga ʉndɨ mʉndʉ hagʉma nabo, athalɨ Yesʉ yowene. 9 Babere balɨ abandagala ɨthoka ko kɨthwa, Yesʉ mwahamʉlabo athɨ: «Mʉthaganʉlɨraga mʉndʉ y'ebyo mʉthashʉnga ihika ko kɨro Mʉgala w'oMʉndʉ andalubuka.»

10 Abɨga mobashikya ekɨnwa ekyo, hewethuwe mobathanga ibutsania bathɨ: «Erilubuka eri, linegenire lithi ki?» 11 Honyuma kw'aho mobabʉtsya Yesʉ bathɨ: «Bʉshana na ki aBakangɨrɨtsya b'oMʉgomba abananegena bathɨ lɨtholere Elia* nɨathanga ɨshʉbʉla?»

12 Yesʉ mwashʉbɨtsyabo athɨ: «Kwenene, Elia atholere nɨathanga ɨshʉbʉla n'ɨthondeka ebɨndʉ byoshi. Hewethuwe bʉshana na ki aMashako Abuyirire anegenire athɨ oMʉgala w'oMʉndʉ andagalwa kʉtsɨbʉ n'ɨsʉnzʉgʉrwa*? 13 Hewethuwe enyɨbabwɨra ko Elia amalire ihika, n'abandʉ mobamʉkolera ebyoshi babyaga bashashire, ɨkwamana n'ebishakirwe kw'ɨye mo Mashako Abuyirire*.»

14 Yesʉ n'abɨga bashathʉ abo babere bahika eyɨrɨ abandɨ abɨga, mobashʉnga muhindano w'abandʉ bangɨ niathimbire kʉbo, balɨ abakubisania n'abakangɨrɨtsya b'oMʉgomba. 15 Aho n'aho, abandʉ babere bashʉnga Yesʉ, mobashweka kʉtsɨbʉ, mobathɨbɨtha mw'ɨya mʉketsya. 16 Yesʉ mwabʉtsya abɨga bʉwe athɨ: «Ni ki kyo kɨreka nɨ mwakubisania nabo?» 17 N'aho, mʉndʉ mʉgʉma mo kathi k'omuhindano mwamʉshʉbɨtsya athɨ: «Mʉkangɨrɨtsya, nyamakʉlethera mʉgala aye, kʉshangwa alɨko mɨtsɨmʉ mɨbɨ. Emɨtsɨmʉ eyo yamalire ɨmʉyɨramo karumbu. 18 Ko bʉlɨ ndambi omʉtsɨmʉ oyo anabya amʉtsɨmba, anamuhuma ahishi, n'omwana anathokya ɨfʉlo mo bʉnʉ n'ishya ameno, n'omʉbɨrɨ ʉwe anʉma. Monyashabire abɨga bawe babɨnge omʉtsɨmʉ oyo, hewethuwe mobalemirwe.» 19 Yesʉ mwabwɨrabo athɨ: «Mbe imwe bandʉ b'olʉgero lʉthɨkɨrɨtsye Gongo! Nyandabya hagʉma nemwe kandɨ ihika ndambi ehɨ? Nyandabalɨndɨrɨra kandɨ ihika ku ndambi ehɨ? Mʉnyɨrethere omwana yo hano.» 20 Aho mobamʉlethera omwana oyo. Na aho n'aho omʉtsɨmʉ mʉbɨ oyo abere ashʉnga Yesʉ, mwathithimania omwana oyo ko kagala ihika ko kɨka mwawa ahishi, na mwagala-gala ahishi n'ithokya erɨfʉlo mo bʉnʉ. 21 Yesʉ mwabʉtsya ishe w'omwana athɨ: «Omwana oyu anabya athyo ɨthanga kʉ mʉgʉlʉ ohɨ?» Ishe ʉwe mwamʉshʉbɨtsya athɨ: «Nɨ ɨthanga mo bwana bʉwe. 22 Na ngendo nyɨngɨ omʉtsɨmʉ mʉbɨ oyu anamʉgʉsha mo mʉtsanwa na mo metsi, bʉshana amwithe. Hewethuwe wamabya wanganakotsya ɨkola kɨndʉ, ʉthʉshashɨre n'ithuwathikya.» 23 Yesʉ mwamʉbwɨra athɨ: «Bʉshana na ki ʉnegena ʉthɨ nga nyanganakotsya? Ʉmɨnye kʉbʉya kw'ebyoshi bɨthokekene kw'oyo wɨkɨrɨtsye.» 24 Aho n'aho ishe w'omwana mwahambala kʉtsɨbʉ athɨ: «Nyɨkɨrɨtsye! Hewethuwe unyiwathikye kʉshangwa olwɨkɨrɨtsyo lwaye nɨ lʉke!»

25 Yesʉ abere ashʉnga abandʉ bangɨ ko bongereka tsʉba-tsʉba, mwakemera omʉtsɨmʉ oyo n'ɨmʉbwɨra athɨ: «Ɨwe mʉtsɨmʉ mʉbɨ w'oʉyɨra abandʉ mo thurumbu na batsɨha, enyɨkʉhamʉla ʉthoke ko mwana oyu na ʉthandashʉba mʉshʉbako!» 26 Omʉtsɨmʉ oyo mwahambala, n'ithithimania omwana yo kʉtsɨbʉ n'ɨmʉthokako. Omwana mwashʉngɨka nga amafwa, n'abandʉ bangɨ mobathanga ɨnegena bathɨ: «Amamala ɨfwa.» 27 Hewethuwe Yesʉ mwamʉtsɨmba ko kʉboko, n'imwimania*, naye mwimana. 28 Yesʉ abere amɨngɨra mo nyʉmba*, abɨga bʉwe mobamʉbʉtsya nɨbahera ɨbo bene hagʉma naye bathɨ: «Bʉshana na ki ithwe mothwalemirwe ɨbɨnga omʉtsɨmʉ oyo?» 29 Yesʉ mwashʉbɨtsyabo athɨ: «Emɨtsɨmʉ y'omʉhanda oyu ɨnabɨngwa mo mɨshabe kuroshi.»

30 Yesʉ n'abɨga bʉwe mobathoka eyo n'ɨtsʉka mo kɨhʉgo ky'iNgalilaya. Yesʉ mwathashasha abandʉ bamɨnye aho babyaga, 31 kʉshangwa abyaga nɨakangɨrɨtsya abɨga bʉwe, n'ɨbwɨrabo athɨ: «oMʉgala w'oMʉndʉ ahirwa mo minwe y'abandʉ, nabo bandamwitha, n'oko kɨro ky'akashathʉ honyuma w'olʉholo lʉwe, andalubuka.» 32 Hewethuwe abɨga mobathamɨnya amakangɨrɨtsya ayo ng'anegenire athɨ ki. Mobʉbaha ɨmʉbʉtsya kɨnwa.

33 Honyuma kw'aho, Yesʉ n'abɨga bʉwe mobahika ɨKaperenaʉmʉ. Babere bamɨngɨra mo nyʉmba, Yesʉ mwabʉtsya abɨga bʉwe athɨ: «Ni ki kyo mʉthagenda omukubisaniako mo nzɨra?» 34 Hewethuwe mobatsɨra, kʉshangwa babyaga niabakubisania mo nzɨra bathɨ nɨ ndɨ yo mʉkʉlʉ mo kathi kabo. 35 Aho Yesʉ mwikala, mwabɨrɨkɨra abɨga bʉwe ikumi n'ababɨrɨ n'ɨbwɨrabo athɨ: «Omʉndʉ yo ushondya ibya mʉmbere atholere nɨayɨyɨramo munyuma-nyuma kʉlenga aboshi n'ibya mukoli w'aboshi.» 36 Honyuma kw'aho, mwatsɨmba mwana mʉlere, mwamuhira mo kathi k'abo n'ɨmʉfʉmbatha. Aho mwabwɨrabo athɨ: 37 «Omʉndʉ yo ukokya omwana mʉlere ng'ono bʉshana nangye, niamanyikokya. N'oyo wamanyikokya, nɨathalɨ ingye amakokya, hewethuwe niamakokya kuthyo oyo wanyɨthʉmaga.»

38 Yoani mwabwɨra Yesʉ athɨ: «Mʉkangɨrɨtsya, mothʉshʉnga mʉndʉ mʉgʉma nɨabɨnga mʉtsɨmʉ kw'ɨtsɨna lyawe. Aho, ithwe mothʉmʉhangɨra kʉshangwa ɨye athalɨ w'omo kɨkembe kyethʉ.» 39 Hewethuwe Yesʉ mwashubya athɨ: «Mʉthamʉhangɨraga, kʉshangwa hathalɨ mʉndʉ yo ʉkola bɨthɨko-thɨko kw'ɨtsɨna lyaye, oyo athangakotsya ɨshʉba negena kʉbɨ kw'ingye honyuma hake kw'aho. 40 Kʉshangwa yo uthathubayire nɨ alɨ ko lʉhande lwethʉ. 41 N'omʉndʉ woshi-woshi yo wandabaha lwatha lwa metsi bʉshana nangye, kʉshangwa imwe mʉlɨ bandʉ ba Kirisito, kwenene enyɨbabwɨra, omʉndʉ oyo athɨndabʉshe ɨhabwa lʉhembo lʉwe.»

42 «Omʉndʉ woshi-woshi yo wandaleka mʉgʉma w'oko balere abo banyɨkɨrɨtsye aba nɨakola kɨtsɨbʉ, byangabere bɨbʉya kw'ɨye amɨnɨrweko lushyo* lʉnene mw'igosi n'ɨgʉshwa mo ngetsɨ.» 43 N'okʉboko kwawe kwamaleka nɨ wakola kɨtsɨbʉ, ʉtseko! Bikwirire kw'ɨwe ɨngɨra mo bʉyɨngo bw'ekwenene n'okʉboko kʉgʉma, kʉlenga ɨya kw'ɨrʉnga mo mʉtsanwa owathɨndatsɨme n'amaboko abɨrɨ. 44 [Omo mʉlɨ bɨhʉka bɨthafwa, na mʉtsanwa owathatsɨma*.] 45 N'okʉgʉlʉ kwawe nako kwamaleka nɨ wakola kɨtsɨbʉ, ʉtseko. Bikwirire kw'ɨwe ɨngɨra mo bʉyɨngo bw'ekwenene na kʉgʉlʉ kʉgʉma, kʉlenga kw'ɨgʉshwa mo mʉtsanwa owo kw'ɨrʉnga na magʉlʉ abɨrɨ. 46 [Omo mʉlɨ bɨhʉka bɨthafwa, na mʉtsanwa owathatsɨma*.] 47 N'elisho lyawe nalyo lwamaleka nɨ wakola kɨtsɨbʉ, ʉkʉlelyo. Bikwirire kw'ɨwe ɨngɨra mo Bwamɨ bwa Gongo n'elisho lɨgʉma, kʉlenga kw'ɨgʉshwa kw'ɨrʉnga na mesho abɨrɨ. 48 Omo mʉlɨ bɨhʉka bɨthafwa, na mʉtsanwa owathatsɨma*. 49 Kʉshangwa obʉlɨ mʉndʉ andetsɨbwa mw'itsukibwa mo mʉtsanwa, nga ko lʉhembo lw'esonyama s'erɨhembwa Gongo nga ko esɨnetsɨbwa mw'ihirwamo munyu*.

50 «Omunyu nɨ kɨndʉ kikwirire. Hewethuwe omunyu amahetsya obʉshɨ bwawo, angahirwamo ki nɨmo ashʉba loka? Mubye munyu, na mwikale hagʉma mʉ bʉholo.»