Obʉsʉ bwa Yesʉ obʉhɨndʉlwa
1 Habere hahwa bɨro ndathʉ, Yesʉ mwatsɨmba Petero, Yakobo na Yoani mʉgala abo, mwathwalabo ko kɨthwa kɨre, babyagako ɨbo bene. 2 Yesʉ mwahɨndʉlwa embere sabo, n’obʉsʉ bʉwe mobwathanga ɨngenga-ngenga17:2 Lingania na 2Petero 1:16-18; Marɨko 9:2 n’ebishakirwe. nga lɨshɨ, n’esongɨmba sɨwe mosasana nga kyakakala. 3 Aho n’aho Mʉsa na Elia mobahʉlʉkɨrabo nɨabasɨmola na Yesʉ. 4 Aho Petero mwabwɨra Yesʉ athɨ: «Nyinya-kowethʉ, likwirire kw’ithwe eribya hano. Wamashasha, nyahimba hano ho hema ishathu, ngʉma yɨwawe, ngʉma ya Mʉsa na ngʉma ya Elia.» 5 Abere anemʉnegena, ekɨfʉ ekyo ekɨkoletsya mokyashwɨkabo. N’omo kɨfʉ ekyo momwonvwɨka mʉlenge nɨanegena athɨ: «Ono nɨ Mʉgala aye mʉtsɨɨrwa, nyimoyibwe naye kʉtsɨbʉ. Mʉmʉhʉlɨkɨrɨtsye!»17:5 Soma 3:17 n’ebishakirwe. 6 Abɨga babere bonvwa omʉlenge oyo, mobʉbaha kʉtsɨbʉ, mobawa n’ihuma obʉsʉ ko kɨthaka. 7 Yesʉ mwayɨfʉnda aho babyaga, mwakola kʉbo n’ɨbwɨrabo athɨ: «Mwimane, mʉthʉbahaga.» 8 Nabo babere bashʉmba amesho wabo, mobathashʉnga ʉndɨ mʉndʉ athalɨ Yesʉ mʉsha. 9 Babere banemukima ko kɨthwa, Yesʉ mwahamʉlabo athɨ: «Mʉthabwɨraga mʉndʉ ebyo mwamashʉngako, ihika ko kɨro oMʉgala w’oMʉndʉ andalubuka mo baholi.»
Yesʉ asɨmola kʉ Elia
10 Aho abɨga mobabʉtsya Yesʉ bathɨ: «Bʉshana na ki aBakangɨrɨtsya b’oMʉgomba abanegena bathɨ lɨtholere Elia nɨathanga ihika?»17:10 Soma Malaki 3:23. 11 Mwashʉbɨtsyabo athɨ: «Kwenene lɨtholere Elia nɨathanga ihika athondeke ebɨndʉ byoshi. 12 Hewethuwe enyɨbabwɨra nyɨthɨ Elia amalire ihika, abandʉ mobathamʉmɨnya he mobamʉkolera nga ko bashashire.17:12 Soma Marɨko 9:13. Ni kuthyo ko bandagatsya oMʉgala w’oMʉndʉ yowene-wene.» 13 Aho abɨga mobamɨnya ko agenda ahʉla Yoani mubatisya.