1 Ko mʉgʉlʉ oyo, mʉ kɨro kɨgʉma ky'eSabato, Yesʉ agenda atsʉka mo mashwa w'engano. Abɨga bʉwe mobawɨra, mobathanga ɨtsa ebɨkʉmba by'engano n'ɨthanga iryabyo. 2 aBafarisayo babere balola kw'ebyo, mobabwɨra Yesʉ bathɨ: «Lola, abɨga bawe abakola ebyo bɨthatholere ɨkolwa mo kɨro ky'eSabato!» 3 Yesʉ mwashʉbɨtsyabo athɨ: «Momʉthasoma ekyo Tawiti akolaga abere awɨra ɨye n'abo abyaga nabo? 4 Ndɨ mwɨngɨra mo Nyʉmba ya Gongo n'irya emikati yo yahererawa Gongo, yo bathabyaga bahamulirwe irya ɨye n'abo abyaga nabo, hewethuwe niyihamulirwe ɨrɨbwa n'abaheri basha! 5 Kʉtse momʉthasoma mo Mʉgomba wa Mʉsa k'obʉlɨ kɨro ky'eSabato, abaheri bo banakola mo Nyʉmba ya Gongo abanagenda abahatsya ko Sabato, nabo bathalɨ abanaganzɨrwa kɨbɨ?* 6 Hewethuwe enyɨbabwɨra, hano halɨ mʉkʉlʉ kʉlenga eNyʉmba ya Gongo! 7 Mwangaminyire ekɨnwa ekinegenire kɨthɨ: "Nyishashire shashi, he bʉthalɨ obʉhere* bwenyu," muthangasohire abandʉ aba bo bathakolire kɨbɨ. 8 Kʉshangwa Mʉgala w'oMʉndʉ yo mʉkʉlʉ w'eSabato.»

9 Yesʉ mwathoka aho, mwɨngɨra mo sinakoki y'aBayuta. 10 Omo mwabyaga mʉndʉ wa kʉboko kukonongokire. aBafarisayo mobabʉtsya Yesʉ bathɨ: «Binahamulirwe ilamya ekɨro ky'eSabato?» Bagenda abashondya kɨnwa k'imusitakirako. 11 Yesʉ mwashʉbɨtsyabo athɨ: «Ɨndɨ mo kathi kenyu amabya awithe kʉ mbuli ngʉma kuroshi naro yamathogera mo kyuna ekɨro ky'eSabato niathiyathokyeromo? 12 Ndɨ omʉndʉ nɨ wa kɨtsɨro kɨnene kʉlenga embuli! Aho, bihamulirwe ɨkola bɨbʉya ekɨro ky'eSabato.» 13 Aho Yesʉ mwabwɨra omʉndʉ oyo athɨ: «Lambʉla okʉboko kwawe.» Mwalambʉlako, mokwalama na mokwabya ng'okʉndɨ. 14 aBafarisayo mobathoka aho n'ɨya kola nama nga ko bangɨthɨsa Yesʉ.

15 Yesʉ abere amɨnya omwatsɨ oyo, mwathoka aho. Bandʉ bangɨ mobamʉkwama, naye mwalamya abakoni boshi. 16 Hewethuwe mwahangɨrabo kʉtsɨbʉ athɨ bathanalinda bamʉmɨnyɨsa ko bandʉ. 17 Mobyakoleka bithyo bʉshana bɨbererere ebɨnwa byanegenawa ɨtsʉkɨra omʉmɨnyeretsɨ Isaya bɨthɨ:

18 «Mʉshʉnge omukoli aye oyo nyashombolaga,

yo mʉtsɨɨrwa aye, yo nyamogeraga ɨshombola.

Nyandamuhirako oMʉthɨma aye,

naye andafʉlɨra abandʉ b'ebɨhanda bw'obʉthʉnganene bwa Gongo.

19 Athɨndakʉbe bʉhaka na mʉndʉ kʉtse ɨhambala,

omʉlenge ʉwe athɨndonvwɨke mo mɨhengere.

20 Athɨndatse olʉsheke lufunyire, kʉtse itsimya orʉtambɨ lo lʉkɨnafʉmbagako muki,

andakola athyo ihika ko kɨro andahikya obʉthʉnganene kw'ɨthegeka.

21 Mw'ɨtsɨna lɨwe, ebɨhanda byoshi byandayinihira ɨye.»*

22 Aho mobalethera Yesʉ yo mʉndʉ yo wabyagako mʉtsɨmʉ. Omʉtsɨmʉ oyo abyaga niamuyiriremo mbumi na kɨtsɨrʉ. Yesʉ mwamulamya ihika ko kɨka mwathanga ɨshʉba negena n'ɨlola. 23 Abandʉ boshi mobashweka nɨabanegena bathɨ: «Oyu athalɨ Mʉgala wa Tawiti?» 24 Hewethuwe aBafarisayo babere bonvwa ebyo, mobanegena bathɨ: «Omʉndʉ oyu anagenda abɨnga emɨtsɨmʉ ko maka wa Belisebuli, mʉkʉlʉ w'emɨtsɨmʉ.» 25 Yesʉ mw'ɨmɨnya emɨganɨtsye yabo, mwabwɨrabo athɨ: «Abandʉ b'obwamɨ bʉgʉma bamalwa ɨbo kw'ɨbo, obwamɨ obo nɨ bwashambʉkala. Na bikalani ba muyi mʉgʉma kʉtse bandʉ ba kɨhanda kɨgʉma bamalwa ɨbo kw'ɨbo, omuyi oyo kʉtse ekɨhanda ekyo nibithindimane. 26 Na Sitani amaliitha Sitani, nɨamayɨlwɨsa yowene. Aho obwamɨ bʉwe bwangimana bʉthɨ? 27 Na nyamabya nɨenyɨbɨnga emɨtsɨmʉ mɨbɨ kʉ maka wa Belisebuli, abɨga benyu ababɨngaro kʉ maka wa ndɨ? Nɨ bʉshana n'ekyo abɨga benyu abo bandabasoha. 28 Hewethuwe nyamabya nɨenyɨbɨnga emɨtsɨmʉ ko kagala k'oMʉthɨma wa Gongo, aho oBwamɨ bwa Gongo nibwamalire ibahikira.

29 «Kʉtse kandɨ omʉndʉ angɨngɨra athɨ mo nyʉmba y'omʉndʉ wa kagala, n'ipura obushoki bʉwe, athathangire agalinga omʉndʉ wa kagala oyo? Aho nɨmwanyaga ebyoshi bɨrɨ omwe. 30 Oyo ʉthalɨ hagʉma nangye, nianyibayire, n'oyo ʉthalɨ akʉma-kʉma hagʉma nangye nɨapanza. 31 Nɨ bʉshana n'ekyo, enyɨbabwɨra nyɨthɨ: abandʉ bandaganyɨrwa obʉlɨ kɨtsɨbʉ n'obʉlɨ bʉhatsye, hewethuwe erɨhatsya ko Mʉthɨma Mwerʉ lɨthɨndaganyɨrwe. 32 Obʉlɨ mʉndʉ woshi-woshi amanegena kɨnwa kɨbɨ kʉ Mʉgala w'oMʉndʉ, ekyo andaganyɨrwakyo, hewethuwe amanegena kɨbɨ ko Mʉthɨma Mwerʉ ekyo, athɨndaganyɨrwekyo ibye mo kɨhʉgo kɨno, ibye mo kɨhʉgo kyandahika.»

33 «Omʉthɨ amabya akwirire, ebiguma byago nabyo kuthyo nɨbyakwɨra, n'omʉthɨ amabya mʉbɨ, ebiguma byago kuthyo nibyabya bɨbɨ. Kʉshangwa omʉthɨ anamɨnyɨrwa ko biguma byawo. 34 Imwe lʉbʉtho lwa nzoka! Mwanganegena mʉthɨ bɨnwa bikwirire imwe bandʉ babɨ? Kʉshangwa obʉnʉ obʉnanegena ebyo byotswire mo mʉthɨma. 35 Omʉndʉ yo ukwirire anathokya bɨndʉ bikwirire mo mbɨko yɨwe mbʉya, n'omʉndʉ mʉbɨ anathokya bɨndʉ bɨbɨ mo mbɨko yɨwe mbɨ. 36 Enyɨbabwɨra nyɨthɨ ekɨro ky'esohi, abandʉ bandathonda ko bʉlɨ kɨnwa kyoshi kya bʉsha-bʉsha banegenaga. 37 Kʉshangwa wandasɨndana kʉtse wandasɨndwa ɨkwamana n'ebɨnwa byawe.»

38 Aho bakangɨrɨtsya bagʉma b'oMʉgomba na Bafarisayo bagʉma mobabwɨra Yesʉ bathɨ: «Mʉkangɨrɨtsya, othushondya uthukangye kɨmɨnyɨkalo.» 39 Yesʉ mwashʉbɨtsyabo athɨ: «Bandʉ ba lʉgero lʉbɨ na lwa bashɨngɨtsɨ bo bashondya kɨmɨnyɨkalo. Hewethuwe bathɨndahabwe kɨndɨ kɨmɨnyɨkalo kɨthalɨ eky' omʉmɨnyeretsɨ Yona. 40 Kʉshangwa nga ko Yona amalaga bɨro bɨshathʉ kɨro na mwɨshɨ mo nda y'erihere inene, kuthyo oMʉgala w'oMʉndʉ andamala bɨro bɨshathʉ, kɨro na mwɨshɨ, mo nda kɨthaka. 41 Ekɨro ky'esohi, abandʉ b'iNinawi band'imana hagʉma n'abandʉ b'olʉgero lʉno n'ɨsohabo. Kʉshangwa mobabɨndʉka ɨthoka mo bɨtsɨbʉ byabo ɨkwamana n'amakangɨrɨtsya wa Yona.* Na hano halɨ mʉkʉlʉ kʉ Yona! 42 Na kuthyo, ekɨro ky'esohi, omʉgole w'oko Lʉnda Kihya andimana embere s'abandʉ b'olʉgero lʉno n'ɨsohabo. Kʉshangwa mwathoka mʉ kɨhʉgo kya hale bʉshana n'ɨonvwa ebɨnwa by'obwenge by'omwamɨ Solomona. Na hano halɨ mʉkʉlʉ kʉ Solomona.

43 «Mo ndambi omʉtsɨmʉ athoka ko mʉndʉ, anayathimba-thimba mo mbwarara mw'ishondya handʉ angalʉhʉkɨra. Naye amabʉshaho, 44 nɨanegena athɨ: "Nyashʉbaya mo nyʉmba aye mo nyɨthathoka." Mw'ihikamo, ameyamo nɨ mʉthalɨ mʉndʉ, nɨ mubitsibwe na nɨ mukwirire. 45 Aho nɨyayenda yɨndɨ mɨtsɨmʉ ɨrɨnda, mɨbɨ kʉlenga ɨye, naro nɨyɨngɨramo n'ikalamo. Aho emɨbere minyuma y'omʉndʉ oyo niyabya mɨbɨ kʉlenga emɨmbere. Na bithyo ko byandabya ko bandʉ b'olʉgero lʉbɨ lʉno.»

46 Yesʉ abere anemʉnegena n'omuhindano, nyinya na bagala babo babyaga nibimene embʉga niabashondya ɨsɨmola naye. [47 Mʉndʉ mʉgʉma mwamʉbwɨra athɨ: «Shʉnga, nyoko na bagala benyu bimene embʉga abashondya ɨsɨmola nawe.»] 48 Yesʉ mwashʉbɨtsya omʉndʉ oyo athɨ: «Ɨndɨ yo malɨ na bahɨ bo bagala bethʉ?» 49 Honyuma kw'aho, mwakangya abɨga bʉwe bw'omunwe n'ɨnegena athɨ: «Aba bo malɨ na bagala bethʉ. 50 Bʉlɨ mʉndʉ woshi-woshi yo ʉkola erishondya lya Thatha yo ʉlɨ mo lʉbʉla, oyo yo mʉgala ethʉ, na mwalɨ wethʉ na malɨ.»