1 Mona kɨro ekyo, Yesʉ mwathoka mo nyʉmba n'iyikala emʉsɨke w'engetsɨ. 2 Bandʉ bangɨ mobahindana hofɨ naye. Bʉshana n'ekyo mwashambɨra mʉ bwatho n'ikala mʉbo. N'abandʉ babyaga nibimene emʉsɨke w'engetsɨ. 3 Mwasɨmolerabo bɨnwa bɨngɨ mo mishinga n'ɨbwɨrabo athɨ: «Muheri mʉgʉma mwaya mw'ɨshwa lɨwe bʉshana n'ɨya hera. 4 Abere anemʉhera, mbʉtho ngʉma mosathogera emʉsɨke w'enzɨra, ebɨronge mobyahika n'irya esoshi. 5 Esɨndɨ mbʉtho mosathogera ko kɨthaka kya mabwe, aho hathabyaga bʉthaka bʉngɨ. Esombʉtho etho mosalasha tsʉba kʉshangwa hathabyaga bʉthaka bʉngɨ. 6 Hewethuwe erɨshɨ lyabere lyakola kʉtsɨbʉ, esombʉtho mosashashʉka, kʉshangwa mosabʉsha mirihi, mosʉma. 7 Sɨndɨ mbʉtho mosathogongera mo mɨshakɨ, Emɨshakɨ eyo moyalasha na moyayɨndɨrɨtsyatho. 8 Sɨndɨ mbʉtho mosathogera ko kɨthaka kikwirire na mosaheka biguma. Biguma bɨgʉma mobyaheka mbulu igana, n'ebɨndɨ kɨrathʉ n'ebɨndɨ makumi ashathʉ. 9 Yo uwithe mathwi w'ɨonvwa onvwe!»

10 Abɨga mobayɨfʉnda hofɨ na Yesʉ n'ɨmʉbʉtsya bathɨ: «Bʉshana na ki ʉnegena n'abandʉ mo mishinga?» 11 Mwashʉbɨtsyabo athɨ: «Imwe momwabona lʉkogo lw'erɨmɨnya sonyɨfʉmɨ s'oBwamɨ bw'elʉbʉla, he ɨbo, mobathabonalo. 12 Kʉshangwa yo uwithe kɨndʉ andahabwa kalengyo, aho andayɨra bɨndʉ bɨngɨ. He yo uthawithe andanyagʉlwa n'akake awitheko. 13 Shʉnga, ekyo kɨreka nɨnyanegena nabo mo mishinga nɨ bʉshana abashʉnga he bathalɨ abalola na abahʉlɨkɨrɨtsya he bathalɨ abonvwa n'ɨmɨnya. 14 Aho obʉmɨnyeretsɨ bwa Isaya bwamabererera kʉbo bo bunegenire bʉthɨ:

"Erɨonvwa mwand'onvwa, he mʉthɨndamɨnye,

Erɨshʉnga mwandashʉnga, he mʉthɨndalole.

15 Kʉshangwa emɨthɨma y'abandʉ aba nɨ mɨtsɨbʉ,

na babere ba mathwi matsɨbʉ,

bamalire ɨtsɨba amesho wabo

kʉshangwa bathalolaga,

na bathonvwaga mo mathwi wabo,

na bathamɨnyaga mo mɨthɨma yabo,

bathangandabɨndʉka nangye nyihike kw'ilamyabo."*

16 «Hewethuwe imwe, mʉgashanɨrwe kʉshangwa amesho enyu alola, n'amathwi enyu onvwa. 17 Kwenene enyɨbabwɨra bamɨnyeretsɨ bangɨ na bandʉ bangɨ bathʉnganene mobashondya ɨlola ko by'omʉlolako, he mobathalola kʉbyo, na mobashondya ɨonvwa eby'omonvwa, he mobathonvwabyo.»

18 «Ewo, imwe mwonvwe nga k'omushinga w'omuheri w'embʉtho oyo anegenire. 19 Obʉlɨ mʉndʉ yo wonvwa ekɨnwa ky'oBwamɨ bwa Gongo bʉthamɨnyakyo, ashoshekanibwe n'esombʉtho so sathogeraga emʉsɨke w'enzɨra. Enzigu Sitani anahika n'ithokya eKɨnwa kyaherawa mo mʉthɨma ʉwe. 20 Esombʉtho so saherawa ko bʉthaka bʉlɨmo amabwe, sishoshekanibwe na mʉndʉ yo wonvwa eKɨnwa kya Gongo n'ɨkokyako mo lʉmogo, 21 hewethuwe kithawithe mirihi mo mʉthɨma ʉwe. Abanashikyakyo kʉ ndambɨ nge. Aho, amalɨgo kʉtse inubibwa ebinabya byahika bʉshana n'eKɨnwa kya Gongo, nɨathoka mo lwɨkɨrɨtsyo lʉwe. 22 Esombʉtho sosaherawa mo mɨshakɨ, sishoshekanibwe na mʉndʉ yo wonvwa eKɨnwa kya Gongo, hewethuwe ebyo mo kɨhʉgo kɨno n'erɨrengwako ly'obushoki n'ɨbyayɨndɨrɨtsya eKɨnwa ekyo, nakyo ni kyabya bʉthabʉtha. 23 Esombʉtho so saherawa mo kɨthaka kikwirire, sishoshekanibwe na mʉndʉ yo wonvwa eKɨnwa n'ɨmɨnyakyo. Aho anaheka biguma, n'ekiguma kɨgʉma nɨkyaheka mbulu igana n'ekɨndɨ kɨrathʉ, n'ekɨndɨ makumi ashathʉ.»

24 Yesʉ mwatsɨrabo ʉndɨ mushinga athɨ: «oBwamɨ bw'elʉbʉla bushoshekanibwe na mʉndʉ yo waheraga mw'ɨshwa lɨwe mo mbʉtho ikwirire. 25 Abandʉ babere banagonzere, enzigu yo omʉndʉ oyo moyaya hera bɨthɨ bɨbɨ mo ngano, na moyayɨgendera. 26 Engano yabere yalasha n'ihulukya mathokwe, ebɨthɨ bɨbɨ kuthyo nabyo mobyahʉlʉka. 27 Abakoli b'omwenye erɨshwa mobaya mʉbwɨra bathɨ: "Mbe nyinya-kowethʉ, mouthaherire mbʉtho sikwirire mw'ɨshwa lyawe? Ewono ebɨthɨ bɨbɨ byamabʉthʉkamo hayi?" 28 Mwashʉbɨtsyabo athɨ: "Nɨ enzigu yo yakolaga ithyo." Aho abakoli mobamʉbwɨra bathɨ: "Wanzire nɨthwayakʉlanga ebɨthɨ bɨbɨ ebyo?" 29 Mwanegena athɨ: "Ɨhɨ, mw'ɨkʉlanga ebɨthɨ bɨbɨ ebyo, mwangalibukira nɨmwamakʉlanga n'engano. 30 Mulike ebyoshi bɨshʉkɨre hagʉma ihika ekɨro ky'erɨgesha. Nɨ mo kɨro ekyo monyandabwɨra abageshi bathange ɨkʉma-kʉma ebɨthɨ bɨbɨ, bamɨnebyo mo mɨganda-mɨganda bʉshana bokyebyo. Hewethuwe engano ɨro, bashongye-shongyero n'ihiraro mo mbʉpʉ aye."»

31 Yesʉ mwashʉba tsɨrabo ʉndɨ mushinga athɨ: «oBwamɨ bw'elʉbʉla bushoshekanibwe na kambulu k'eharatali, ko mʉndʉ mʉgʉma atsɨmbaga nɨyaherako mw'ɨshwa lɨwe. 32 Ako ko kambulu kake mo mbʉtho soshi, hewethuwe akanabya kamamala ɨlasha nɨkabya kanene mo myaka yɨrɨ mw'ɨshwa, na nikabya mʉthɨ, ihika ko kɨka ebɨronge by'omo kyanya nibyaya himba sonyʉthʉ sabyo ko mɨthahɨ yawo.»

33 Yesʉ mwashʉba bwɨra abandʉ abo bo ʉndɨ mushinga athɨ: «oBwamɨ bw'elʉbʉla bushoshekanibwe nga tsatsʉ yo mʉkatsɨ mʉgʉma atsɨmbaga n'ithulunganiaro mʉ hɨthonga hɨshathʉ hya shyano bʉshana atsʉmbe bʉndʉ bwa mikati, ihika ko kɨka ebyoshi mobyabimba.»

34 Ebyoshi ebyo Yesʉ mwabwɨrabyo omuhindano mʉ mishinga, athagenda abwɨrabo kɨndʉ ɨthalɨ mu mishinga. 35 Agenda akola athyo bʉshana kɨberere ekɨnwa kyanegenawa kw'ɨtsʉkɨra omʉmɨnyeretsɨ athɨ:

«Nyandanegena mo mishinga,

na nyandanegena bɨndʉ bya bishawa ɨthanga ko ndangɨro y'ekɨhʉgo.»*

36 Honyuma kw'aho Yesʉ mwamika omuhindano, mwashʉba mo nyʉmba. Abɨga bʉwe mobayɨfʉnda hofɨ naye n'ɨmʉbwɨra bathɨ: «Thukumbulire omushinga oyo w'ebɨthɨ bɨbɨ mw'ɨshwa.» 37 Yesʉ mwashʉbɨtsyabo athɨ: «Oyo ʉhera embʉtho ikwirire nɨ oMʉgala w'oMʉndʉ. 38 N'erɨshwa nɨ ekɨhʉgo. Embʉtho ikwirire nɨ abana b'oBwamɨ bwa Gongo. Ebɨthɨ bɨbɨ nɨ abana b'omubihya Sitani. 39 Enzigu yo yaheraga ebɨthɨ bɨbɨ nɨ Sitani. Emyaka nɨ enduli y'ekɨhʉgo, abageshi nɨ abamalaɨka. 40 Nga ko abanakʉma-kʉma ebɨthɨ bɨbɨ bʉshana n'iokyabyo mo mʉtsanwa, kuthyo ko byandabya ko nduli y'ekɨhʉgo. 41 oMʉgala w'omʉndʉ andathʉma abamalaɨka bʉwe, nabo bandakʉma-kʉma ɨthoka mo Bwamɨ bʉwe abo banaletha kɨtsɨkalo n'abakoli b'ebɨbɨ. 42 Na bandagʉshabo mo kiriko ky'omʉtsanwa, aho handabya bɨrɨro n'ishya meno. 43 Hewethuwe abathʉnganene ɨbo bandangenga ng'erɨshɨ mo Bwamɨ bw'Ishe wabo. Yo ʉlɨko mathwi w'ɨonvwa, onvwe!»

44 «oBwamɨ bw'elʉbʉla bushoshekanibwe na bushoki bo bwabyaga bubishirwe mw'ɨshwa. Mʉndʉ mʉgʉma mwashʉngabo. Omʉndʉ oyo mwashʉba bishabo buhya-buhya, mwagenda niamoyire, n'ɨyagʉtsya ebyoshi abyaga awitheko n'ɨyagʉla erɨshwa eryo.

45 «Kandɨ oBwamɨ bw'elʉbʉla bushoshekanibwe na muhingania yo wagenda ashondya bʉlema bwa kɨtsɨro kɨnene. 46 Abere ashʉnga olʉlema lwa kɨtsɨro kɨnene, mwayagʉtsya ebyoshi abyaga awitheko n'ɨyagʉlalo.»

47 «oBwamɨ bw'elʉbʉla bushoshekanibwe kandɨ n'akakira kokanagʉshwa mo ngetsɨ n'ishongya emɨhanda yoshi y'amahere. 48 Mo ndambi akakira kamotsula, abarobi nɨbakʉrɨrako emʉsɨke. Honyuma kw'aho, nibikala n'ɨshombola amahere akwirire n'ihirawo mo bɨthonga, n'ɨgʉsha ow'athakwirire. 49 Ni bithyo ko byandabya ko nduli y'ekɨhʉgo. Aho abamalaɨka bandahika na bandagabania ababɨ n'abathʉnganene. 50 Nabo bandagʉsha ababɨ mo kiriko ky'omʉtsanwa, aho handabya bɨrɨro n'ishya ameno.»

51 «Yesʉ mwabʉtsya abɨga bʉwe athɨ: "Mwanamamɨnya ebyoshi ebyo?" Mobamʉshʉbɨtsya bathɨ: "Ega" 52 Mwabwɨrabo athɨ: "Aho, bʉlɨ mushaki w'oMʉgomba yo wakangɨrɨtsɨbawa ebɨnwa by'oBwamɨ bw'elʉbʉla, ashoshekanibwe na mwenye nyʉmba yo uthokya mo mbɨko yɨwe mw'ebɨndʉ bihya-bihya n'ebya kera."»

53 Yesʉ abere amamala ɨtsa emishinga eyo, mwathokayo. 54 Abere ahika mo kɨhʉgo kɨwe, mwakangɨrɨtsya abahimbani mo sinakoki yabo, ihika ko kɨka abandʉ mobashweka nɨabanegena bathɨ: *«Amathokya obwenge obu bo hayi, n'amaka w'erɨkola ebɨthɨko-thɨko? 55 Oyu athalɨ omʉgala w'omʉsapate? Na nyinya ʉwe athalɨ anahʉlwamo Marɨa? Na bagala babo bathalɨ Yakobo na Yosefʉ na Simoni na Yuta? 56 Na balɨ babo boshi bathalɨ kowethʉ? Ebyoshi ebi athokyabyo hayi?» 57 Ebyo mobyaleka nɨbathamwɨkɨrɨtsya. Aho Yesʉ mwabwɨrabo athɨ: «Omʉmɨnyeretsɨ athalɨ anashikibwa mo kɨhʉgo kɨwe n'omo muyi ʉwe.»* 58 Eyo, Yesʉ mwathakolayo bɨthɨko-thɨko bɨngɨ bʉshana n'obʉthɨkɨrɨtsya bwabo.