28 Habere hahwa bɨro mʉnanɨ Yesʉ anegenire ebɨnwa ebyo, mwatsɨmba Petero, Yoani na Yakobo. Mwɨrʉkɨra nabo ko kɨthwa bʉshana n’ɨya shaba Gongo. 29 Abere anemʉshaba, obʉsʉ bʉwe mobwahɨndʉka n’esongɨmba sɨwe mosasana n’ɨngenga kʉtsɨbʉ. 30,31 Omo lʉkengerwa olo mokwahʉlʉka bayira babɨrɨ, Mʉsa na Elia. Abayira babɨrɨ abo nɨabasɨmola na Yesʉ ng’oko andamala omʉlɨmo ʉwe n’ɨfwɨra ɨYerʉsalemʉ.
32 Ko ndambi eyo Petero na balikyabo babyaga nibayiretho bʉrangwe. He mobasɨsɨmʉka, mobashʉnga olʉkengerwa lwa Yesʉ, n’abayira babɨrɨ abo bo babyaga nibimene hagʉma naye. 33 Mo ndambi abayira babɨrɨ abo bamikanaga na Yesʉ, Petero mwamʉbwɨra athɨ: «Mʉkangɨrɨtsya, bikwirire thwikale hano. Na thuhimbe hano ho hema ishathu: ngʉma yabya yɨwawe, eyɨndɨ yabya ya Mʉsa, n’eyɨndɨ yabya ya Elia.» Petero abyaga niathetsi ebyo agenda anegena. 34 Mo ndambi Petero abere anemʉnegena athyo, mokwahʉlʉka kɨfʉ kɨnene n’ɨshwɨkabo. Abɨga abo mobʉbaha babere balola ekɨfʉ ko kyamashwɨkabo. 35 Mo kɨfʉ ekyo momwonvwɨka mʉlenge nɨanegena athɨ: «Oyu nɨ Mʉgala aye yo nyashombolaga. Mʉgende omʉmʉthega amathwi!»
36 Mo ndambi omʉlenge oyo onvwɨkaga, abɨga abo mobashʉnga Yesʉ nɨahera yowene. Ebɨnwa bashʉngaga aho, mobayɨtsɨrɨra, mobathabwɨrabyo mʉndʉ n’omʉgʉma mo bɨro ebyo.