1 Yesʉ mwabwɨra abɨga bʉwe athɨ: «Mʉthaganga-gangaya emɨthɨma enyu. Mwɨkɨrɨtsye Gongo nangye mʉnyɨkɨrɨtsye kuthyo. 2 Mo nyʉmba ya Thatha mʉlɨ bwikalo bʉngɨ. Bɨrɨ ko bɨthalɨ bithyo, nyithangababwire nyɨthɨ enyɨya bakometsya bwikalo. 3 Na nyandabya nyamala ɨbakometsya bwikalo, nyandashʉbʉla n'itsa bwenda, bʉshana aho nyandabya, nemwe mubyeho kuthyo. 4 Mwetsi enzɨra y'erihika eyo nyɨya.»

5 Tomasɨ mwamʉbwɨra athɨ: «Nyinya-kowethʉ, thuthetsi eyo ʉya, aho thwangamɨnya enzɨra yo thʉthɨ?» 6 Yesʉ mwamʉshʉbɨtsya athɨ: «Ingye ngyo nzɨra n'ekwenene n'obʉyɨngo. Omʉndʉ athangahika ewa Thatha athanyitsukireko. 7 Mwanganyiminyire, mwangaminyire na Thatha kuthyo. Ɨthoka lɨno mumwetsi na mwamamʉshʉnga.»

8 Filipo mwamʉbwɨra athɨ: «Nyinya-kowethʉ, thukangye Thatha, n'ekyo kithuwathikye.» 9 Yesʉ mwamʉbwɨra athɨ: «Nyɨrɨ nemwe bɨro bɨngaha, mbe Filipo, uthanetsi wanyɨmɨnya? Yo wamanyɨshʉnga nɨamashʉnga Thatha. Bʉshana na ki oʉnegena ʉthɨ: "Thukangye Thatha"? 10 Ʉthɨkɨrɨtsye ko nyɨrɨ emwishi sa Thatha na Thatha alɨ emwishi saye? Ebɨnwa ebyo enyɨbabwɨra nyɨthalɨ enyɨnegenabyo kʉ maka aye ingy'owene. Hewethuwe nɨ Thatha yo ʉlɨ emwishi saye yo ʉkola emɨrɨmo yɨwe. 11 Mʉnyɨkɨrɨtsye mo ndambi enyɨnegena nyɨthɨ nyɨrɨ emwishi sa Thatha, na Thatha alɨ emwishi saye. Bɨthalɨ bithyo, mwɨkɨrɨtsye bʉshana n'emɨkolano eyo enyɨkola.»

12 «Kwenene, kwenene, enyɨbabwɨra, yo ʉnyɨkɨrɨtsye, naye andakola ebyo enyɨkola. Na kalengyo kw'aho, ɨye andakola mɨkolano mɨnene-mɨnene kʉlenga ebyo enyɨkola, kʉshangwa enyɨya ewa Thatha. 13 N'ebyoshi mwandashaba kw'ɨtsɨna lyaye, nyandakolabyo, bʉshana Thatha abone olʉkengerwa kw'ɨtsʉkɨra Mʉgala. 14 Na mwamanyɨshaba kɨndʉ kyoshi-kyoshi kw'ɨtsɨna lyaye nyandabakolerakyo.»

15 «Na mwamanyɨtsɨɨra nimwandashikya amathegeko aye. 16 Nangye nyandashaba Thatha abahe ʉndɨ mwangɨrɨtsɨ naye andabya hagʉma nemwe ebɨro byoshi. 17 Naye nɨ oMʉthɨma w'ekwenene. Ekɨhʉgo kithangamukokya kʉshangwa kɨthalɨ ekɨmʉlolako na kithamwetsi. Imwe mumwetsi kʉshangwa ikere hagʉma nemwe naye alɨ emwishi senyu.»

18 «Nyithibamike nga fubi, hewethuwe nyandabashʉbɨra. 19 Mʉ bɨro bɨke abandʉ ba hano ishi bathɨndashʉbe nyɨlolako. Hewethuwe imwe, mwandanyɨlolako kʉshangwa ingye nyɨrɨho nemwe kuthyo mwandabyaho. 20 Mo kɨro ekyo, mwandamɨnya ko nyɨrɨ emwishi sa Thatha, nemwe ko mʉlɨ emwishi saye, nangye ko nyɨrɨ emwishi senyu. 21 Yo wɨkɨrɨtsya amathegeko aye n'ishikyawo, nɨ oyo yo unyitsiire. Na Thatha andatsɨɨra yo unyitsiire, nangye kuthyo nyandamʉtsɨɨra na nyandayikangya kw'ɨye.»

22 Yuta, hewethuwe athalɨ Yuta Isikariote, mwamʉbʉtsya athɨ: «Nyinya-kowethʉ, ʉthɨ ko wayikangania wowene kw'ithwe basha, he bʉtsɨra ko bandʉ b'omo kɨhʉgo?» 23 Yesʉ mwamʉshʉbɨtsya athɨ: «Mʉndʉ amanyɨtsɨɨra, andashikya ekɨnwa kyaye, na Thatha andamʉtsɨɨra. Aho, ingye na Thatha thwandɨngɨra emwishi sɨwe, n'ikala emwishi sɨwe. 24 Yo uthanyitsiire athangashikya ebɨnwa byaye. N'ekɨnwa omwonvwa nyɨrɨ enyɨnegena kɨthalɨ ekɨthoka emwishi saye, hewethuwe ekɨthoka ewa Thatha yo wanyɨthʉmaga. 25 Nyamababwɨra ebɨnwa byoshi ebi kʉshangwa nyɨkɨnalɨ hagʉma nemwe. 26 Hewethuwe oMwangɨrɨtsɨ nɨ oMʉthɨma Mwerʉ, oyo Thatha andathʉma mw'ɨtsɨna lyaye, andabakangɨrɨtsya ebɨnwa byoshi n'ibwibukya ebyoshi nyababwɨraga.»

27 «Nyamabamikira obʉholo, nyamabaha obʉholo bwaye. Nyɨthabaherebo ng'abandʉ ba hano ishi ko banahanabo. Mʉthaganga-gangaya emɨthɨma enyu na mʉthʉbahaga. 28 Momwonvwa ko nyɨthababwɨra nyɨthɨ enyɨyɨgendera, hewethuwe nyabashʉbɨra. Mwanganyitsiire mwangamogere erɨmɨnya kw'enyɨya ewa Thatha, kʉshangwa Thatha nɨ mʉkʉlʉ kw'ingye. 29 Nyamababwɨra ebɨnwa ebi ko ndambi eno embere bibye, bʉshana byandabya byakoleka, mʉnyɨkɨrɨtsye. 30 Nyɨthɨshʉbe sɨmola nemwe bɨnwa bɨngɨ, kʉshangwa omuthegeki w'ekɨhʉgo kɨno ahika. Ɨye athawithe maka kw'ingye. 31 Hewethuwe lɨtholere abandʉ nɨbamɨnya ko nyitsiire Thatha, nangye enyɨkola nga ko anyɨhamʉlaga. Ewo, mwimane thʉthoke hano!»