1 Kwabyaga ni kukishiya kɨro kɨgʉma embere ePasaka ihike. Yesʉ abyaga nietsi kw'endambi yɨwe y'erɨthoka mo kɨhʉgo n'ɨshʉba ewa Thatha yamahika. Ɨye yo wabyaga atsiire abandʉ bʉwe ba hano ishi, mwatsɨɨrabo ihika ko nduli.

2 Yesʉ n'abɨga bʉwe babere balɨ abalya akalyo k'olʉlengero, Sitani abyaga niamalire ihira mo mʉthɨma wa Yuta mʉgala wa Simoni Isikariote mo mɨganɨtsye y'erɨhothera Yesʉ. 3 Yesʉ abyaga nietsi ko Ishe mwahira ebɨndʉ byoshi ekihya y'obuthegeki bʉwe, nietsi ko athokaga ewa Gongo na ashʉba ewa Gongo. 4 Babere balɨ abalya, Yesʉ mwimana emʉsɨke w'olʉgalɨ, mwathokya ekoti na mwatsɨmba sume na mwayɨmɨnaro mo mbɨndɨ. 5 Honyuma kw'aho, mwahira metsi mʉ beseni, na mwathanga inabya ebɨshando by'abɨga bʉwe n'ɨshangʉlabyo mo sume abyaga aminire mo mbɨndɨ. 6 Lwabere lwabya lʉhɨtsyo lwa Simoni Petero, ono mwamʉbwɨra athɨ: «Nyinya-kowethʉ, nɨ ɨwe wanyinabya ko bɨshando?» 7 Yesʉ mwamʉshʉbɨtsya athɨ: «Uthaminyire lɨno ekyo enyɨkola, hewethuwe wamɨnyakyo enyuma.» 8 Petero mwamʉbwɨra athɨ: «Kiro, uthanganyinabya ebɨshando n'ahake!» Yesʉ mwamʉshʉbɨtsya athɨ: «Nyithakunabitsye ko bɨshando, nɨhathakɨrɨ kyo nyishangire nawe.» 9 Simoni Petero mwamʉbwɨra athɨ: «Aho mbe Nyinya-kowethʉ uthanyinabaya ko bɨshando bɨsha, hewethuwe na ko minwe na ko muthwe!» 10 Yesʉ mwamʉbwɨra athɨ: «Yo ʉthoga athakilayire kw'inabibwa, kʉshangwa ɨye woshi erire. Nemwe mwerire hewethuwe ɨthalɨ imwe boshi.» 11 Yesʉ abyaga nietsi yo wamʉhothera kyo kyalekaga nɨanegena athɨ: «Ɨthalɨ imwe boshi mo mwerire.»

12 Yesʉ abere amamala inabyabo ko bɨshando, mwambala ekoti yɨwe, mwashʉba ɨya lya n'ɨbwɨra abɨga athɨ: «Mwanamamɨnya ebyo nyamabakolera? 13 Omʉnyahʉlamo "Mʉkangɨrɨtsya" na "Nyinya-kowethʉ" omʉnegena kwenene kʉshangwa nyɨrɨ ɨye. 14 Aho, ingye Mʉkangɨrɨtsya enyu na Nyinya-kowenyu nyamabanabya ko bɨshando, nemwe kuthyo muhamulirwe ɨgenda omunabania bɨshando. 15 Nyamabakangya ko mwagenda omʉyɨra, ekyo nyamabakolera, nemwe mʉgende omʉkola muthyo.Yesʉ anabya ebɨshando bya bɨga bʉwe 16 Kwenene, kwenene, enyɨbabwɨra, omukoli athalengitsye nyinya-kowabo. Kʉtse omʉthʉmwa athalɨ mʉkʉlʉ ko yo ʉthamʉthʉma. 17 Kʉshangwa mʉhera mwetsi ebi, mwandagashanɨrwa mwamakolabyo.»

18 «Nyɨthalɨ enyɨbwahʉla imwe boshi, nyetsi bo nyashombolaga. Hewethuwe, lɨtholere ebɨnwa bɨrɨ mo Mashako Abuyirire bɨno bɨbererere: "Yo nyashangɨraga naye akalyo kʉ mbale ngʉma, amanyɨbɨndʉkako*." 19 Enyɨbabwɨra lɨno embere bibye, bʉshana byabya byahika mwɨkɨrɨtsye ko Ingye ngyo Nyɨrɨ. 20 Kwenene, kwenene enyɨbabwɨra, ikokya yo nyandathʉma nɨ inyikokya ingyowene-wene, n'erinyikokya nɨ ikokya na yo wanyɨthʉmaga.»

21 Yesʉ abere amamala ɨnegena ebyo, mwathabagana n'ɨnegena athɨ: «Kwenene, kwenene enyɨbabwɨra, mʉgʉma mw'imwe anyɨhothera.» 22 Abɨga mobalolana n'ɨabayɨbʉtsya nga Yesʉ ahʉla ndɨ. 23 Mʉgʉma w'oko bɨga, yo Yesʉ abyaga atsiire kʉtsɨbʉ abyaga nɨagemere kʉ Yesʉ balɨ abalya. 24 Simoni Petero mwamʉkohetsya athɨ abʉtsye Yesʉ ng'ahʉla ndɨ. 25 Aho, omwɨga oyo mwagemera ko kɨfʉba kya Yesʉ n'ɨmʉbʉtsya athɨ: «Nyinya-kowethʉ, nɨ ndɨ yo wahʉla?» 26 Yesʉ mwashubya athɨ: «Enyishondya ɨkoletsya kɨtse kya mukati. Yo nyaha ekɨtse ekyo, nɨ ɨye.» Aho, Yesʉ mwakoletsya ekɨtse ky'omukati abyaga awitheko na mwahakyo Yuta mʉgala wa Simoni Isikariote. 27 Yuta abere amamala ɨtsɨmba ekɨtse ky'omukati ekyo Sitani mwamwɨngɨramo. Nɨmo Yesʉ amʉbwɨra athɨ: «Ekyo ushondya ɨkola, kolakyo tsʉba.» 28 Hathalɨ n'omʉgʉma ko bo bagenda abalya hagʉma na Yesʉ yo wamɨnyaga nga Yesʉ amamʉbwɨra athyo bʉshana na ki. 29 Bagʉma mobaganɨtsya bathɨ Yesʉ amamʉbwɨra mbʉ ayagʉle bɨndʉ bilayirweko ko linye kʉtse ayawathikye abatsene kʉshangwa nɨ Yuta yo wabyaga abikire eshaho y'esofaranga. 30 Yuta ɨye, abere amamala irya ekɨtse ky'omukati ekyo, aho n'aho mwahʉlʉka. Bwabyaga nɨbwahera kɨro.

31 Yuta abere amahʉlʉka, Yesʉ mwanegena athɨ: «Hano, oMʉgala w'oMʉndʉ amasingibwa, na Gongo naye amasingibwa ɨtsʉkɨra ɨye. 32 Gongo alɨ amasingibwa ɨtsʉkɨra Mʉgala, na kuthyo Gongo naye asingya Mʉgala w'oMʉndʉ ɨtsʉkɨra ɨye yowene, na amusingya bʉtha thɨndɨra. 33 Bʉshana n'ekyo, bana baye, nyɨkɨnalɨ nemwe kʉ kathambi kake. Mwanyishondya, hewethuwe nga ko nyɨthabwɨra abakʉlʉ b'aBayuta, nemwe kuthyo enyɨbabwɨrabyo lɨno, eyo nyɨya muthangahikayo. 34 Enyɨbaha ithegeko lihya: mʉtsɨɨrane bagʉma kʉ bandɨ. Nga ko nyabatsɨɨraga, nemwe kuthyo mʉtsɨɨrane. 35 Mwamatsɨɨrana bagʉma kʉ bandɨ, abandʉ boshi nɨbamɨnya ko mʉlɨ bɨga baye.»

36 Simoni Petero mwamʉbʉtsya athɨ: «Nyinya-kowethʉ, waya hayi?» Yesʉ mwamʉshʉbɨtsya athɨ: «Eyo enyɨya, ʉthanganyɨkwama lɨno, hewethuwe wandanyɨkwama enyuma.» 37 Petero mwamʉbʉtsya athɨ: «Nyinya-kowethʉ, bʉshana na ki nyɨthangakʉkwama lɨno? Nyahana obʉyɨngo bwaye bʉshana nawe!» 38 Yesʉ mwamʉshʉbɨtsya athɨ: «Wahana obʉyɨngo bwawe bʉshana nangye? Kwenene, kwenene, enyɨkʉbwɨra, wayɨgana ingye ngendo ishathu ko uthanyetsi embere embagatsɨ yɨbɨke.»