1 Yesʉ abere amamala ɨnegena ebɨnwa ebyo, mwagenda hagʉma n'abɨga bʉwe, na mobashabʉkɨra eyishirya w'olwitsi lw'iKitironi. N'aboshi mobɨngɨra mw'ɨshwa lyo lyabyagayo. 2 Na Yuta yo wahotheraga Yesʉ, mwamɨnya aho Yesʉ abyaga, kʉshangwa agenda ahindana mw'ɨshwa eryo mo ngendo nyɨngɨ n'abɨga bʉwe*. 3 Aho, Yuta oyo mwaletha kɨkembe kya bashirikani ba baroma na batheya bagʉma b'eNyʉmba ya Gongo, abo babyaga nɨbamathʉmwa n'abaheri bakʉlʉ n'aBafarisayo. Na mwahika mw'ɨshwa hagʉma nabo. Bano babyaga bahekire bɨmole, na tara, na bɨmano bya malwa mo minwe yabo. 4 Kʉshangwa Yesʉ abyaga nietsi ebɨndʉ byoshi ebyo byamuhikira, mwagenderabo n'ɨbʉtsyabo athɨ: «Omushondya ndɨ?» 5 Nabo mobamʉshʉbɨtsya bathɨ: «Yesʉ w'iNasareti*.» Na Yesʉ mwabwɨrabo athɨ: «N'ingye.» Yuta yo wamʉhotheraga abyaga nimene aho hagʉma nabo. 6 Yesʉ abere abwɨrabo athɨ: «N'ingye», mobashʉba enyuma n'ɨwa ahishi. 7 Mwabʉtsyabo athɨ: «Omushondya ndɨ?» Nabo mobashubya bathɨ: «Yesʉ w'iNasareti.» 8 Yesʉ mwashʉbɨtsyabo athɨ: «Nyamalire ɨbabwɨra nyɨthɨ n'ingye. Na nyamabya n'ingye omushondya, mulike abo nyɨrɨ nabo aba bayɨgendere.» 9 Mwanegena athyo bʉshana bɨbererere ebɨnwa anegenaga athɨ: «Monyɨthahetsya n'omʉgʉma w'oko abo wanyɨhaga*.» 10 Aho, Simoni Petero abyaga niawithe ku muyali, mwashosholawo mo lʉba, na mwatsa okuthwi kw'amalyo kw'omukoli w'oMuheri Mʉkʉlʉ. Omukoli oyo agenda ahʉlwamo Malɨko. 11 Hewethuwe Yesʉ mwabwɨra Petero athɨ: «Shubya omuyali awe w'omo lʉba. Ʉganɨtsya ʉthɨ nyɨthɨshome olwatha lw'amalɨgo lo Thatha anyɨhaga*?» 12 Ekɨkembe ky'abashirikani n'omʉkʉlʉ wabo, n'abatheya b'abakʉlʉ b'aBayuta mobatsɨmba Yesʉ n'ɨmʉmɨna. 13 Mobathanga ɨmʉthwala ewa Ana*. Ana oyo abyaga ishe-tsala wa Kayafa. Na Kayafa yo wabyaga Muheri Mʉkʉlʉ ko mwaka oyo. 14 Ewo, ndɨ nɨ Kayafa yo wahanaga aBayuta athɨ: bikwirire mʉndʉ mʉgʉma nɨafwa bʉshana n'abandʉ boshi.

15 Simoni Petero na ʉndɨ mwɨga mobakwama Yesʉ. Kʉshangwa oʉndɨ mwɨga oyo abyaga nietsibwe n'oMuheri Mʉkʉlʉ, mwɨngɨra na Yesʉ mo nyʉmba y'oMuheri Mʉkʉlʉ oyo. 16 Hewethuwe Petero ɨye mwimana embʉga hofɨ n'olukyo, oʉndɨ mwɨga oyo wabyaga nietsibwe n'oMuheri Mʉkʉlʉ, mwahʉlʉkɨra embʉga n'ɨthanga ɨsɨmola n'omʉkatsɨ mutheya w'olukyo, na mwɨngɨtsya Petero y'omo. 17 Omʉkatsɨ mutheya w'olukyo, mwabwɨra Petero athɨ: «Ɨwe nawe ʉthalɨ mʉgʉma w'oko bɨga b'omʉlʉme oyu?» Petero mwashubya athɨ: «Ɨhɨ, ingye nyɨthalɨ mwɨga ʉwe!» 18 Abakoli n'abatheya babyaga nɨbamatsana mʉtsanwa, kʉshangwa ebɨro ebyo byabyaga bɨro bya mbeho, nabo babyaga nibimeneho nɨabotha ko mʉtsanwa. Petero naye abyaga nimene aho kuthyo alɨotha ko mʉtsanwa.

19 «oMuheri Mʉkʉlʉ mwabʉtsya Yesʉ bʉshana n'abɨga bʉwe, na bʉshana n'amakangɨrɨtsya ʉwe.» 20 Yesʉ mwamʉshʉbɨtsya athɨ: «Nyagenda enyɨnegena n'abandʉ boshi bʉrora-rora, na nyagenda enyɨkangɨrɨtsya mo so sinakoki na mo Nyʉmba ya Gongo, aho aBayuta boshi abanahindana. Monyɨthanegena kɨndʉ mʉ bubisho-bisho.» 21 Ewono, bʉshana na ki oʉnyɨbʉtsya? Bʉtsya abo bagenda abanyɨhʉlɨkɨrɨtsya, kʉshangwa betsi kʉbʉya ebyo nyagenda enyɨnegena. 22 Yesʉ abere alɨanegena ebyo, mʉgʉma wa ko batheya bo babyaga hofɨ naye, mwamʉbanda ikofi n'ɨnegena athɨ: «Nɨ bathyo ko wangashʉbɨtsya oMuheri Mʉkʉlʉ?» 23 Yesʉ mwashubya athɨ: «Nyɨrɨ nyamanegena kɨnwa kɨbɨ mukanganiekyo. Hewethuwe ebyo nyamanegena byamabya bya kwenene, bʉshana na ki wamanyihumba?» 24 Honyuma kw'aho, Ana mwathʉma Yesʉ nianaminire ewa Kayafa Muheri Mʉkʉlʉ.

25 Mo ndambi eyo Simoni Petero abyaga nɨakɨnalɨ aho alɨotha ko mʉtsanwa. Mobamʉbʉtsya bathɨ: «Ndɨ nawe kuthyo ʉlɨ mʉgʉma w'oko bɨga b'omʉlʉme oyu!» Petero mwayɨgana athɨ: «Ɨhɨ! Ingye nyɨthalɨ mwɨga ʉwe.» 26 Mukoli mʉgʉma w'oMuheri Mʉkʉlʉ yo wabyaga mʉgalabo yo Petero atsagako okuthwi, mwamʉbwɨra athɨ: «Ɨwe, monyɨthalɨ enyɨkʉshʉnga mw'ɨshwa hagʉma naye?» 27 Petero mwashʉba yɨgana ɨye, aho n'aho embagatsɨ moyabɨka.

28 Bwabere bwakya mo mambya, mobathokya Yesʉ yo ewa Kayafa n'ɨmʉthwala mo nyʉmba ya Kafʉrʉnalɨ. Hewethuwe aBayuta ɨbo mobathɨngɨra mo nyʉmba ya Kafʉrʉnalɨ, kʉshangwa bangingire mo nyʉmba eyo bangabere batsɨrene na bathangatholere irya ko linye ly'ePasaka. 29 Aho Pilato mweyabo embʉga, n'ɨbʉtsyabo athɨ: «Omusitaka omʉndʉ oyu bʉshana na ki?» 30 Nabo mobashubya bathɨ: «Athangabere mukoli w'ebɨbɨ thuthangamulethire embere sawe.» 31 Pilato mwabwɨrabo athɨ: «Imwe bene mʉmʉtsɨmbe na mʉmʉsohe ɨkwamana n'oMʉgomba enyu.» aBayuta nabo mobamʉshʉbɨtsya bathɨ: «Ithwe thuthahamulirwe itha mʉndʉ.» 32 Mobyakoleka bithyo, bʉshana bɨbererere ebɨnwa Yesʉ anegenaga kw'ikangania nga andafwa lʉholo lʉhɨ. 33 Aho Pilato mwashʉba mo nyʉmba, mwabɨrɨkɨra Yesʉ n'ɨmʉbʉtsya athɨ: «Nɨ ɨwe wo mwamɨ w'aBayuta?» 34 Yesʉ mwashubya athɨ: «Wamanegena uthyo ɨthoka mo mɨganɨtsye awe wowene kʉtse nɨ bandɨ bandʉ bo bamakʉbwɨra emyatsɨ aye?» 35 Pilato mwashubya athɨ: «Ingye nyɨthalɨ Muyuta. Abandʉ b'omo kɨhʉgo kyenyu n'abaheri bakʉlʉ nɨ ɨbo bo bathanyɨrethera ɨwe. Moʉkola ki?» 36 Yesʉ mwashubya athɨ: «oBwamɨ bwaye bʉthalɨ bw'oko kɨhʉgo kɨno, oBwamɨ bwaye bwangabere bw'oko kɨhʉgo kɨno, abakoli baye banganyilwire, kʉshangwa nyɨthahotherawa ko Bayuta. Hewethuwe oBwamɨ bwaye bʉthalɨ bwa hano ishi.» 37 Aho Pilato mwamʉbwɨra athɨ: «Nɨ ɨnegena mbʉ ɨwe ʉlɨ mwamɨ?» Yesʉ mwamʉshʉbɨtsya athɨ: «Ɨwe wamanegena ʉthɨ nyɨrɨ Mwamɨ. Ingye monyabʉthwa bʉshana nyɨrethe butimo bw'ekwenene. Aboshi bo balɨ ko lʉnda lw'ekwenene abananyɨhʉlɨkɨrɨtsya.» 38 Pilato mwamʉbʉtsya athɨ: «Ekwenene kyo ki?»

Pilato abere amamala ɨnegena ekɨnwa ekyo mwashʉba hʉlʉkɨra embʉga n'ɨbwɨra aBayuta athɨ: «Ingye nyithashungire ekyangaleka omʉndʉ oyu nɨasoherwa lʉholo. 39 Hewethuwe ɨkwamana n'emɨbere enyu, nyɨbegere ɨbamɨnʉlɨra mʉndʉ mʉgʉma wa muliki mo kɨro ky'elinye ly'ePasaka. Ewono, omushondya nyɨbamɨnʉlɨre omwamɨ w'aBayuta?» 40 Aho, mobahambala kʉtsɨbʉ bathɨ: «Thʉthalɨ othushondya omʉndʉ oyu! Othushondya ʉthʉmɨnʉlɨre Baraba!» Baraba oyo abyaga munyaguli.