1 Honyuma kw'aho, Yesʉ agenda athimba mo kɨhʉgo ky'iNgalilaya. Athagenda ahika mo kɨhʉgo ky'iYuteya, kʉshangwa aBakʉlʉ b'aBayuta bagenda abashondya imwitha. 2 Ekɨro kɨkʉlʉ ky'elinye ly'esoHema ky'aBayuta kyabyaga hofɨ.* 3 Bagala babo Yesʉ mobamʉbwɨra bathɨ: «Thoka kʉno, ʉye iYuteya nɨmo abɨga bawe nabo balola ko mɨkolano yo ʉkola. 4 Omʉndʉ yo ushondya ɨmɨnyɨkala athakola kɨndʉ mʉ bubisho. Kʉshangwa oʉkola mɨkolano yɨrɨ ng'eyo, uyikangye ko bandʉ boshi bʉshana bakʉmɨnye!» 5 Bagala babo nabo mobathamwɨkɨrɨtsya. 6 Aho, Yesʉ mwabwɨrabo athɨ: «Endambi aye ithetsi yahika, hewethuwe kw'imwe obʉlɨ ndambi ɨtholere. 7 Abandʉ ba hano ishi bathangababaga, hewethuwe banyibayire kʉshangwa enyɨnanegena nyɨthɨ emɨkolano yabo nɨ mɨbɨ. 8 Mʉgende ko linye. Ingye nyɨthɨyeyo kʉshangwa endambi aye ithetsi yahika.» 9 Abere amamala ɨnegena athyo, mwikala iNgalilaya. 10 Hewethuwe bagala babo babere baya ko linye, Yesʉ naye mwayayo, buthayikangya ko bandʉ.

11 Mo kɨro ky'elinye, abakʉlʉ b'aBayuta bagenda abashondya Yesʉ nɨababʉtsya bathɨ: «Alɨ hayi?» 12 Mo kathi k'abandʉ abo mwabyaga bo bagenda abarʉkʉma bʉshana na Yesʉ. Bagʉma bagenda abanegena bathɨ: «Nɨ mʉndʉ akwirire.» N'abandɨ bagenda abanegena bathɨ: «Kiro, athɨma abandʉ.» 13 Hewethuwe hathalɨ mʉndʉ yo wamʉnegenagako kɨnwa ahalɨ bandʉ kʉshangwa aboshi bagenda abʉbaha abakʉlʉ b'aBayuta.

14 Elinye lyabere lyahika mo kathi, Yesʉ mwɨngɨra mo Nyʉmba ya Gongo na mwathanga ɨkangɨrɨtsya. 15 Abakʉlʉ b'aBayuta mobashwekera amakangɨrɨtsya ʉwe nɨabanegena bathɨ: «Athokya obwenge boshi obu bo hayi omʉndʉ yo ʉthahera wathɨngɨra mʉ masomo?» 16 Yesʉ mwashʉbɨtsyabo athɨ: «Amakangɨrɨtsya awo enyɨkangɨrɨtsya athalɨ ʉwaye, hewethuwe nɨ w'oyo wanyɨthʉmaga. 17 Mʉndʉ amashondya ɨkola erɨshasha lya Gongo, amɨ́nya kw'amakangɨrɨtsya aya ng'athoka ewa Gongo kʉtse ng'enyɨnegena kʉ maka aye ingy'owene. 18 Omʉndʉ yo ʉnegena ko maka ʉwe yowene, oyo niashondya iyisingya yowene. Hewethuwe yo ushondya isingya yo wamʉthʉmaga, oyo nɨanegena ekwenene na athalɨmo bʉbɨ boshi-boshi. 19 Mʉsa mwathabaha oMʉgomba? Namo bɨnalɨ bithyo, hathalɨ n'omʉgʉma wa mw'imwe yo ushikitsyewo. Aho, omushondya inyithira ki?» 20 Omuhindano mwamʉshʉbɨtsya athɨ: «Ʉlɨko mʉtsɨmʉ mʉbɨ! Ɨndɨ yo ushondya ikwitha?» 21 Yesʉ mwashʉbɨtsyabo athɨ: «Monyɨkola kɨnwa kɨgʉma kuroshi, nakyo kyamabashwekya imwe boshi. 22 Mʉsa mwabahamʉla imonia abana benyu b'obʉtsana. Ko kwenene, ebyo bɨthathokaga ewa Mʉsa hewethuwe ewa bo sho-kʉlʉ benyu. Na lɨno, imwe omunamonia abana benyu namo kɨro ky'eSabato. 23 Na mwamabya niomunamonia abana benyu mo kɨro ky'eSabato bʉshana mushikye oMʉgomba wa Mʉsa, bʉshana na ki omʉnyɨtsɨbʉkɨra kʉshangwa nyamalamya mʉndʉ ekɨro ky'eSabato? 24 Mulike ɨsoha abandʉ ɨkwamana na ko bashoshire, hewethuwe mʉsohebo ɨkwamana n'ekwenene.»

25 Bahimbani bagʉma b'ɨYerʉsalemʉ bagenda abanegena bathɨ: «Omʉndʉ oyu athalɨ yo bashondya itha? 26 Hene! Athɨ kw'anegenera mo bandʉ nabo bathanegenire kɨndʉ? Kʉthɨ abakʉlʉ bethʉ bamalire ɨmɨnya ko kwenene kw'ɨye nɨ Kirisito! 27 Hewethuwe omʉndʉ oyu thwetsi eyo athoka, Masia ɨye andabya ahika, hathalɨ yo wandamɨnya aho andahʉlʉka.» 28 Aho Yesʉ abere anemʉkangɨrɨtsya mo Nyʉmba ya Gongo, mwahambala nɨanegena athɨ: «Imwe omʉnegena mʉthɨ munyetsi, mwetsi na yo nyɨthoka. Nyithahikaga mʉ maka aye ngyowene. Hewethuwe yo wanyɨthʉmaga nɨ wa kwenene, nemwe muthamwetsi. 29 Hewethuwe ingye nyimwetsi kʉshangwa nyathokaga ewe, na n'ɨye yo wanyɨthʉmaga.»

30 Mobashondya ɨmʉmɨna hewethuwe mohathabya mʉndʉ yo wamuhiragako eminwe kʉshangwa endambi yɨwe yabyaga niyithetsi yahika. 31 Bandʉ bangɨ mo muhindano bo babyaga aho mobamwɨkɨrɨtsya, na bagenda abanegena bathɨ: «Kirisito andabya ahika andakola bɨmɨnyɨkalo bilengitsye ebyo oyu akola?»

32 aBafarisayo mobonvwa ebɨnwa abandʉ bagenda abanegena kʉ Yesʉ. Aho, abakʉlʉ b'abaheri n'aBafarisayo mobathʉma abatheya b'eNyʉmba ya Gongo bayamɨne Yesʉ. 33 Yesʉ mwanegena athɨ: «Nyɨkɨnalɨ nemwe ku ndambi nge, na honyuma kw'aho nyashʉba ewa yo wanyɨthʉmaga. 34 Mwanyishondya hewethuwe mʉthɨnyɨbone, kʉshangwa muthangakotsya ɨya eyo nyandabya.» 35 Abakʉlʉ b'aBayuta mobathanga ibutsania ɨbo kw'ɨbo bathɨ: «Aya hayi nɨmo thʉthɨshʉbe mʉshʉngeko? Aya eyɨrɨ aBayuta bo babungire mo Bakiriki, n'ɨkangɨrɨtsya aBakiriki? 36 Ebɨnwa athanegena athɨ: "Mwanyishondya na mʉthɨnyɨbone, n'eyo enyɨya muthangahikayo, binegenire bithi ki?"»

37 Ekɨro kɨtsɨndʉ ky'elinye ly'esoHema, kyo kyabyaga kɨro kɨkʉlʉ, Yesʉ mwimana embere s'omuhindano n'ɨhambala kʉtsɨbʉ athɨ: «Kwamabya kʉlɨ mʉndʉ yo ufwire nyotha, anyihikire na ashome. 38 Nga ko aMashako anegenire athɨ: "Nyitsi sa metsi wa bʉyɨngo sathoka mo mʉthɨma w'oyo ʉnyɨkɨrɨtsye."» 39 Yesʉ anegenaga athyo, bʉshana n'oMʉthɨma Mwerʉ bandabona abo bandamwɨkɨrɨtsya. Mo bɨro ebyo oMʉthɨma Mwerʉ abyaga niathetsi athʉmwa, kʉshangwa Yesʉ abyaga niathetsi ɨngɨra mo lʉkengerwa lʉwe.

40 Mo bandʉ bahʉlɨkɨrɨtsyaga ebɨnwa bya Yesʉ, bagʉma bagenda abanegena bathɨ: «Ko kwenene, oyu nɨ omʉmɨnyeretsɨ yo wangahikire!» 41 N'abandɨ bagenda abanegena bathɨ: «Oyu nɨ Kirisito.» N'abandɨ kandɨ bathɨ: «Kirisito anganathoka iNgalilaya? 42 aMashako athanegenire athɨ Kirisito andabya wa mo lʉganda lwa Tawiti na andathoka ɨBetelehemʉ, muyi wa mabʉthwa wa Tawiti?» 43 Aho abandʉ mobagabana bʉshana na Yesʉ. 44 Bagʉma ba mʉbo mobashondya ɨmʉmɨna, hewethuwe mohathabya mʉndʉ yo wamuhiragako eminwe.

45 Abatheya abo mobashʉba eyɨrɨ abakʉlʉ b'abaheri n'aBafarisayo. Mobabʉtsya abatheya bathɨ: «Muthamulethire bʉshana na ki?» 46 Abatheya mobashubya bathɨ: «Tʉthahera thwathonvwa mʉndʉ yo ʉnegena ng'oyo.» 47 aBafarisayo mobabʉtsyabo bathɨ: «Nemwe kuthyo mwamalire ɨthɨmwa? 48 Nɨ ndɨ mo bakʉlʉ b'aBayuta kʉtse mo Bafarisayo yo wamwɨkɨrɨtsye? 49 Kiro nako, hewethuwe abandʉ aba bathetsi oMʉgomba wa Mʉsa, bathakirwe na Gongo!» 50 Nikotemo, yo wayaga shʉnga Yesʉ embere, abyaga mʉgʉma w'oko Bafarisayo bo babyaga aho, mwanegena athɨ: 51 «oMʉgomba ethʉ anganasoha mʉndʉ yo ʉthathangire athonda n'ɨmɨnya ekyo athakola?»* 52 Mobamʉshʉbɨtsya bathɨ: «Nawe kuthyo ʉlɨ Munyangalilaya? Sonzomola aMashako Abuyirire na walola kw'iNgalilaya ɨthathoka mʉmɨnyeretsɨ.»

53 [Bʉlɨ mʉndʉ mwaya ewe.*