1 Honyuma kw'aho, Yesʉ mwashabʉka engetsɨ y'iNgalilaya, kandɨ eyɨnahʉlwamo ngetsɨ ya Tiberia*. 2 Muhindano w'abandʉ bangɨ mobamʉkwama, kʉshangwa abandʉ abo mobashʉnga bɨmɨnyɨkalo ebyo akanganaya mw'ilamya abakoni. 3 Aho Yesʉ mwɨrʉkɨra ko kɨthwa hagʉma n'abɨga bʉwe na mobikala eyo. 4 N'ekɨro kɨkʉlʉ ky'ePasaka y'aBayuta kyabyaga nɨ kɨrɨ hofɨ. 5 Yesʉ abere ashʉmba amesho, mwashʉnga muhindano mʉnene wa bandʉ niamuhikira. Aho mwabʉtsya Filipo athɨ: «Hayi ho thwangagʉla kalyo k'erɨrɨsa abandʉ aba?» 6 Mwanegena athyo nɨathega Filipo yo kɨnwa kʉshangwa abyaga nietsi ekyo akola. 7 Filipo mwamʉshʉbɨtsya athɨ: «Namo thwangagʉla mikati ya bɨtsere magana abɨrɨ bya faranga*, ɨthangagonera kʉbo na mothwangahabo kɨtse-kɨtse.» 8 Oʉndɨ mwɨga mʉgʉma ye Ndereya, mʉgalabo Simoni Petero mwamʉbwɨra athɨ: 9 «Hano halɨ mʉthabana awithe ku mikati ithano ya shayiri* na mahere abɨrɨ. Ewono, ebyo byanga yɨra ki ko bandʉ bangana n'aba?» 10 Yesʉ mwanegena athɨ: «Mʉbwɨre abandʉ bikale ahishi.» Ahandʉ aho habyaga bɨthɨ bɨngɨ. Aho abandʉ mobikala. Abayira bo babyaga aho, babyaga hofɨ bɨhʉmbɨ bɨthano. 11 Honyuma kw'aho, Yesʉ mwatsɨmba emikati eyo, mwasɨma Gongo, na mwagabɨraro ko bandʉ boshi bo babyaga aho. Na kuthyo mwagaba amahere nga ko bʉlɨ mʉndʉ abyaga alayire. 12 Babere bamamala iutha, Yesʉ mwabwɨra abɨga bʉwe athɨ: «Mʉkʉme-kʉme ebɨtse-bɨtse bithashiba, bʉshana kuthabyaga kɨtse n'ekɨgʉma kyo kyahera.» 13 Aho mobashongya-shongya ebɨtse-bɨtse by'emikati ithano y'eshayiri byo byashakaga, na mobutsutsya bɨthonga ikumi na bɨbɨrɨ.

14 Abandʉ babere bashʉnga ekɨmɨnyɨkalo Yesʉ akolaga, mobanegena bathɨ: «Ko kwenene omʉndʉ oyu nɨ omʉmɨnyeretsɨ yo wangahikire mo kɨhʉgo.» 15 Kʉshangwa Yesʉ abyaga nietsi ko bahika ɨmʉthwala mʉ kahatho n'ɨmʉyɨramo mwamɨ, mwathoka aho n'ɨshʉba ko kɨthwa ko yowene.

16 Bwabere bwahika igolo, abɨga bʉwe mobandagalɨra ko ngetsɨ. 17 Mobashambɨra mo bwatho n'ɨshabʉkɨra ko ʉndɨ mwishirya, ɨKaperenaʉmʉ. Omwitsimya abyaga nɨamamala ibya na Yesʉ niathetsi eyabo. 18 N'ametsi w'engetsɨ mwabyamo mibimbi mɨtsɨbʉ, kʉshangwa embeho yabyaga nzɨbʉ. 19 Babere bahika hofɨ kʉ bilometere bɨthano kʉtse ndathʉ, mobashʉnga Yesʉ yo hofɨ n'obwatho, nɨagendera ko metsi kw'elʉgʉlʉ. Bʉshana n'ekyo mobʉbaha. 20 Hewethuwe Yesʉ mwabwɨrabo athɨ: «N'ingye, mʉthʉbahaga!» 21 Abɨga babyaga niabashondya ɨmʉshambɨtsya mo bwatho, hewethuwe aho n'aho obwatho mobwitsa obuhika ko kɨthaka eyo bagenda baya.

22 Bwabere bwakya, abandʉ bo bashibaga eyishirya w'engetsɨ mobamɨnya ko ko kyambʉ kʉthalɨ bwatho bʉgʉma bʉsha. Na kandɨ mobamɨnya ko Yesʉ mwathalɨ ashambɨra mo bwatho obo hagʉma n'abɨga bʉwe, he abɨga mobagenda ɨbo bene. 23 Na kuthyo wandɨ matho mwahika ho abandʉ balɨraga emikati, Nyinya-kowethʉ abere amamala ɨsɨma Gongo. Amatho ayo athokaga mo muyi w'iTiberia. 24 Abandʉ babere bashʉnga ko Yesʉ n'abɨga bʉwe bathalɨ aho, mobɨngɨra mo matho n'ɨshabʉkɨra ɨKaperenaʉmʉ ɨya shondya Yesʉ.

25 Abandʉ abo mobeya Yesʉ yo eyishirya w'engetsɨ n'ɨmʉbʉtsya bathɨ: «Mʉkangɨrɨtsya uthahika hano mango ki?» 26 Yesʉ mwashʉbɨtsyabo athɨ: «Kwenene kwenene, mʉthalɨ omunyishondya bʉshana n'ebɨmɨnyɨkalo mʉthashʉnga nyɨrɨ enyɨkola, hewethuwe nɨ bʉshana n'emikati muthalya n'iugutha. 27 Mʉthakoleraga akalyo ko kanabola, hewethuwe mʉkolere akalyo ko kathahwa na ko kanaletha obʉyɨngo bw'ekera n'ekera. N'akalyo ako, nɨ oMʉgala w'oMʉndʉ yo wabahako, kʉshangwa Gongo Thatha mwamʉha maka w'ɨkola athyo.» 28 Mobamʉbʉtsya bathɨ: «Thʉyɨre thʉthɨ nɨmo thwakola ebyo Gongo ashondya?» 29 Yesʉ mwashʉbɨtsyabo athɨ: «Omʉlɨmo wa Gongo wono: mwɨkɨrɨtsye yo Gongo athʉmaga.» 30 Mobabʉtsya Yesʉ bathɨ: «Wathukangya kɨmɨnyɨkalo kɨhe bʉshana thʉshʉnge kʉkyo na thʉkwɨkɨrɨtsye? iki kyo wakola? 31 Abo thatha-kʉlʉ mobalya mana mo mbwarara, nga ko binegenirwe mo Mashako Abuyirire bɨthɨ: "Mwalɨsabo omukati ow'athokaga elʉbʉla."*» 32 Yesʉ mwashʉbɨtsyabo athɨ: «Ko kwenene enyɨbabwɨra: Mʉsa mwathabaha mukati ow'athokaga elʉbʉla, hewethuwe nɨ Thatha yo ʉbaha omukati w'ekwenene ow'athoka elʉbʉla. 33 Kʉshangwa omukati wo Gongo ahana, nɨ ow'akima ɨthoka mo lʉbʉla n'ɨretha obʉyɨngo ko bandʉ b'omo kɨhʉgo kɨno.» 34 Aho mobamʉbwɨra bathɨ: «Nyinya-kowethʉ, ʉgende ʉthʉha omukati oyo w'ebɨro byoshi.» 35 Yesʉ mwabwɨrabo athɨ: «Ingye ngyo mukati w'obʉyɨngo. Oyo wamanyihikira athɨndafwe nzala na hake, n'oyo ʉnyɨkɨrɨtsye athɨndafwe nyotha na hake. 36 Hewethuwe nga ko nyababwɨraga, mwamanyɨshʉnga hewethuwe namo bɨnalɨ bithyo, mʉthanyɨkɨrɨtsye. 37 Abandʉ boshi bo Thatha anyɨha bandanyihikako, nangye nyɨthɨndathɨnde n'omʉgʉma w'oko bo banyihikira. 38 Kʉshangwa nyakimaga ɨthoka elʉbʉla bʉshana nyɨkole erishondya ly'oyo wanyɨthʉmaga, bʉtsɨra erishondya lyaye. 39 N'erishondya ly'oyo wanyɨthʉmaga nɨ: nyɨthahetsyaga n'omʉgʉma w'oko bo anyɨhaga, hewethuwe nyimulubukye ekɨro ky'enduli y'ekɨhʉgo. 40 Shʉnga, erishondya lya Thatha: aboshi bo bashʉnga Mʉgala n'ɨmwɨkɨrɨtsya babone obʉyɨngo bw'ekera n'ekera, nangye nyandalubukyabo ekɨro ky'enduli.»

41 Aho, aBayuta mobathanga ɨrʉkʉma kʉshangwa Yesʉ mwanegena athɨ: «Ingye nyɨrɨ mukati ow'akimaga ɨthoka mo lʉbʉla.» 42 Nabo mobanegena bathɨ: «Oyu athalɨ Yesʉ mʉgala wa Yosefʉ? Ndɨ thunetsi ishe na nyinya! Ewono athɨ kwanganegena athɨ ɨye akimaga ɨthoka elʉbʉla?» 43 Yesʉ mwashʉbɨtsyabo athɨ: «Mʉtharʉkʉmaga mo kathi kenyu. 44 Hathalɨ yo wangahika yo nyɨrɨ, alɨ athalɨ athakʉrwa na Thatha yo wanyɨthʉmaga, nangye nyandamulubukya ekɨro ky'enduli. 45 Bishakirwe mo mashako w'abamɨnyeretsɨ bɨthɨ: "Aboshi bandakangɨrɨtsɨbwa na Gongo."* Obʉlɨ mʉndʉ yo ʉhʉlɨkɨrɨtsya Thatha n'ɨkwama amakangɨrɨtsya ʉwe, ahika eyo nyɨrɨ. 46 Hathalɨ mʉndʉ yo washʉngaga Thatha, athalɨ yo wathokaga ewa Gongo. Ɨye, mwashʉnga Thatha. 47 Kwenene, kwenene, enyɨbabwɨra: oyo wɨkɨrɨtsye awithe bʉyɨngo bw'ekera n'ekera. 48 Ingye ngyo mukati w'obʉyɨngo. 49 Bo sho-kʉlʉ mobalya mana mo mbwarara, hewethuwe mobafwa. 50 Hewethuwe ono wo mukati akimaga ɨthoka elʉbʉla. Bʉlɨ mʉndʉ yo ulya kʉwo athɨndafwe. 51 Ingye ngyo mukati w'obʉyɨngo ow'akimaga ɨthoka mo lʉbʉla. Omʉndʉ amalya ko mukati ono andabyaho kera na kera. N'omukati wo nyabaha nɨ omʉbɨrɨ aye ow'ahanwa bʉshana ekɨhʉgo kɨbone obʉyɨngo.»

52 Aho aBayuta mobathanga ikubisania ɨbo kw'ɨbo, mobanegena bathɨ: «Omʉndʉ oyu, athɨ kwangathʉha omʉbɨrɨ ʉwe thulyewo?»

53 Bʉshana n'ekyo Yesʉ mwabwɨrabo athɨ: «Kwenene kwenene enyɨbabwɨra, muthalire omʉbɨrɨ w'oMʉgala w'oMʉndʉ n'ɨshoma omʉsasɨ ʉwe, muthindabye na bʉyɨngo mw'imwe. 54 Omʉndʉ yo ulya omʉbɨrɨ aye n'ɨshoma omʉsasɨ aye, alɨ n'obʉyɨngo bw'ekera n'ekera, nangye nyandamulubukya ekɨro ky'enduli. 55 Omʉbɨrɨ aye nɨ kalyo ka kwenene n'omʉsasɨ aye nɨ w'erɨshoma lya kwenene. 56 Omʉndʉ yo ulya omʉbɨrɨ aye n'ɨshoma omʉsasɨ aye, ikere emwishi saye, nangye nyikere emwishi sɨwe. 57 Nga ko Thatha yo wanyɨthʉmaga alɨho, nangye nyɨrɨho ko kagala kʉwe, na kuthyo oyo unyirya andabyaho ko kagala kaye. 58 Mʉshʉnge ko mukati ow'akimaga ɨthoka elʉbʉla kw'alɨ, athalɨ ng'emikati yo bosho-kʉlʉ balyaga mo mbwarara na mobafwa. Oyo ulya omukati ono andabyaho kera n'ekera.» 59 Yesʉ anegenaga ebɨnwa ebyo abere alɨ akangɨrɨtsya mo sinakoki ɨKaperenaʉmʉ.

60 Bangɨ mo bɨga bʉwe babere bonvwa ebɨnwa ebyo mobanegena bathɨ: «Ebɨnwa bɨno bitsibuhire. Nɨ ndɨ yo wangɨmɨrabyo?» 61 Yesʉ mwamɨnya ko abɨga bʉwe abarʉkʉma bʉshana n'ekɨnwa eki, aho mwabʉtsyabo athɨ: «Ekɨnwa kɨno kyamabagatsya emɨthɨma? 62 Ewo, byandabya bɨthɨ mwamashʉnga oMʉgala w' oMʉndʉ alɨ ɨrʉkɨra aho abyaga embere? 63 oMʉthɨma Mwerʉ yo ʉnaletha obʉyɨngo, omʉbɨrɨ athawithe ndundi. Ebɨnwa nyababwɨraga, nɨ ɨbyo byo Mʉthɨma Mwerʉ na kandɨ nɨ byo bɨnaletha obʉyɨngo. 64 Hewethuwe halɨ bagʉma mw'imwe bathɨkɨrɨtsye.» Yesʉ anegenaga athyo kʉshangwa abyaga nietsi ɨthoka kera abo bathɨkɨrɨtsye n'oyo wamʉhothera. 65 Yesʉ mwashʉba negena athɨ: «Bʉshana n'eki enyɨbabwɨra nyɨthɨ, hathalɨ mʉndʉ yo wangahika yo nyɨrɨ, Thatha athamʉhere obuthoki.»

66 Na bʉshana n'ebɨnwa ebyo, bangɨ mo bɨga bʉwe mobamumika, nabo mobathashʉba enda hagʉma naye. 67 Aho Yesʉ mwabʉtsya abɨga ikumi n'ababɨrɨ athɨ: «Nemwe kuthyo omushondya ɨgenda?» 68 Simoni Petero mwamʉshʉbɨtsya athɨ: «Nyinya-kowethʉ, thwaya ewa ndɨ? N'ɨwe wo uwithe ko bɨnwa by'obʉyɨngo bw'ekera na kera. 69 Na lɨno thwamɨkɨrɨtsya n'ɨmɨnya ko ʉlɨ Mubuyirire yo wathʉmawa na Gongo*!» 70 Yesʉ mwashʉbɨtsyabo athɨ: «Nɨ ingye ngyowene ngyo nyabashombolaga imwe ikumi na babɨrɨ, hewethuwe namo bɨnalɨ bithyo mʉgʉma wa mw'imwe ni Sitani!» 71 Anegenaga athyo bʉshana na Yuta mʉgala wa Simoni Isikariote. Kʉshangwa abyaga mʉgʉma w'oko bɨga ikumi na babɨrɨ, na n'ɨye yo wamʉhothera.