1 Honyuma w'ebyoshi ebyo Yesʉ mwashʉba hʉlʉkɨra abɨga bʉwe ko mʉsɨke w'engetsɨ y'iTiberia. Shʉnga nga kw'ahʉlʉkɨragabo: 2 Simoni Petero na Tomasɨ yo ʉnahʉlwamo mʉhasha na Natanaele w'omo muyi w'iKana y'iNgalilaya, n'abana ba Sebetayo, n'abandɨ bɨga babɨrɨ ba Yesʉ, aboshi babyaga hagʉma. 3 Simoni Petero mwabwɨra balikyabo athɨ: «Nyamayaroba.» Na balikyabo mobamʉbwɨra bathɨ: «Nethwe kuthyo thwagenda hagʉma nawe.» Aho mobagenda na mobashambɨra mo bwatho. Hewethuwe mo kɨro ekyo mobahɨna. 4 Mo mambya matsɨbʉ Yesʉ mwashʉngɨka n'imene emʉsɨke w'engetsɨ, hewethuwe abɨga mobathamɨnya ko nɨ ɨye. 5 Aho Yesʉ mwabʉtsyabo athɨ: «Bana baye, mwanamitha ko mahere?» Mobamʉshʉbɨtsya bathɨ: «Kiro nako mbe thatha.» 6 Yesʉ mwabwɨrabo athɨ: «Mʉgʉshe ehikira hyenyu hy'oko lʉnda lw'amalyo lw'obwatho, na mwitha ko mahere.» Aho mobagʉsha ehikira hyabo, nabo mobalemwa ɨkʉrahyo bʉshana n'obʉngɨ bw'amahere abyagamo. 7 Aho omwɨga yo wabyaga atsiirwe na Yesʉ mwabwɨra Petero athɨ: «Ni Nyinya-kowethʉ.» Simoni Petero abere onvwa ko ni Nyinya-Kowethʉ, mwambala olʉkɨmba lʉwe kʉshangwa abyaga nɨalɨ ndumbu aho n'aho mwayɨgʉsha mo metsi. 8 Abandɨ bɨga mobahika n'obwatho balɨ abakʉra ehikira hyo hyabyaga hyotswiremo amahere. Alɨbo, babyaga nɨbathakɨrɨ hale n'oko kyambʉ, habyaga nihakishia metere igana bʉsha nibahika ko kɨthaka. 9 Babere bahika ko kyambʉ n'ikimira ko kɨthaka, mobashʉnga makala wa mʉtsanwa alɨko mahere na mukati. 10 Yesʉ mwabwɨrabo athɨ: «Mʉlethe ko mahere mwamaroba.» 11 Aho Simoni Petero mwashamba mo bwatho, na mwakʉra akakira ihika ko kɨthaka. N'akakira ako kabyaga nikotswiremo mahere manene-manene igana na makumi athano n'ashathʉ. Namo amahere anabyaga mangɨ akakira mokathabereka. 12 Yesʉ mwabwɨrabo athɨ: «Muhike mulye.» Mohathabya mwɨga n'omʉgʉma yo wamubutsaya ng'ɨye nɨ ndɨ, kʉshangwa mobamɨnya ko nɨ Nyinya-kowethʉ. 13 Aho Yesʉ mwayɨfʉnda hofɨ nabo, mwatsɨmba omukati, mwagabɨrawo kʉbo n'ɨgabɨrabo kuthyo n'amahere. 14 Lɨno nɨ lya kashathʉ Yesʉ alɨahʉlʉkɨra abɨga bʉwe ɨthanga kw'ilubuka lɨwe.

15 Babere bamamala irya, Yesʉ mwabʉtsya Simoni Petero athɨ: «Simoni mʉgala wa Yoani, unyitsiire kʉlenga aba?» Na Petero mwashubya athɨ: «Ega, mbe Nyinya-kowethʉ, wetsi kʉbʉya ko nyikutsiire!» Yesʉ mwamʉbwɨra athɨ: «Lishya esombuli saye.» 16 Yesʉ mwamʉbʉtsya ngendo ya kabɨrɨ athɨ: «Simoni mʉgala wa Yoani, unyitsiire?» Naye mwamʉshʉbɨtsya athɨ: «Ega mbe Nyinya-kowethʉ wetsi ko nyikutsiire!» Yesʉ mwashʉba mʉbwɨra athɨ: «Lishya esombuli saye.» 17 Honyuma kw'aho, Yesʉ mwamʉbʉtsya erya kashathʉ athɨ: «Simoni mʉgala wa Yoani, unanyitsiire?» Aho Petero mwahɨthana kʉshangwa Yesʉ mwamʉbʉtsya ngendo ishathu nga anamutsiire. Bʉshana n'ekyo, mwamʉshʉbɨtsya athɨ: «Nyinya-kowethʉ, wetsi ebyoshi, wetsi ko nyikutsiire!» Yesʉ mwamʉbwɨra athɨ: «Lishya esombuli saye*. 18 Enyɨkʉbwɨra ekwenene, wabere ʉkɨrɨ mʉtsana, wagenda uyambikya wowene n'ɨya ahoshi ushashire. Hewethuwe wandabya wabya mʉshyakʉlʉ, wandalambʉla okʉboko kwawe na ʉndɨ mʉndʉ yo wandakwambikya n'ɨkʉthwala eyo uthashashire.» 19 Yesʉ anegenaga ebɨnwa ebyo, mw'ikangania Petero nga andafwa lʉholo mʉhanda ki n'isingya Gongo mo lʉholo lʉwe. Honyuma kw'aho Yesʉ mwamʉbwɨra athɨ: «Ʉnyɨkwame*!»

20 Petero mwakebʉka na mwashʉnga omwɨga yo wabyaga niatsiirwe na Yesʉ. Omwɨga oyo yo wabyaga nɨagemere mo kɨfʉba kya Yesʉ balɨ abalya. Mwamʉbʉtsya athɨ: «Nyinya-kowethʉ, nɨ ndɨ yo wakʉhothera?» 21 Ewo, Petero abere amʉshʉnga mwabʉtsya Yesʉ athɨ: «Nyinya-kowethʉ, n'omʉndʉ oyu, iki kyo kyamuhikira?» 22 Yesʉ mwamʉshʉbɨtsya athɨ: «Nyamashasha omʉndʉ oyu abyeho ihika ko kɨro nyandashʉbʉla, ebyo bithakulebitsye mbe Petero, ɨwe ʉnyɨkwame!» 23 Aho, omwatsɨ ono mwaya ngʉlʉ mo bɨkɨrɨtsya boshi ba Yesʉ, kw'omwɨga yo utsiirwe na Yesʉ athɨndafwe. Yesʉ ɨye mwathanegena athɨ athɨndafwe, hewethuwe mwanegena athɨ: «Nyamashasha oyu abyeho ihika ko kɨro nyandashʉbʉla, ebyo bithakulebitsye.» 24 Yo n'omwɨga oyo yo walethega butimo bw'ebɨnwa ebyo n'ɨshakabyo, nethwe thwetsi obutimo bʉwe ko nɨ bwa kwenene.

25 Halɨ bɨndʉ bɨngɨ byo Yesʉ akolaga. Hewethuwe ebyoshi byangashakirwe kɨgʉma kʉ kɨndɨ, enyɨganɨtsya ng'ekɨhʉgo kyoshi kɨthangabonekiremo mwanya w'erɨbɨkamo ebɨtabo byo byangashakirwe.