1 Mo kɨro kya kashathʉ, mokwabya buheruki mo muyi w'ɨKana mo kɨhʉgo ky'iNgalilaya. Na nyinya wa Yesʉ abyagaho. 2 Yesʉ n'abɨga bʉwe nabo mobalalɨkwa ko buheruki obo.

3 Etifayi yabere yahwa, nyinya wa Yesʉ mwabwɨra Mʉgala athɨ: «Bathakiwithe kʉ tifayi.»

4 Hewethuwe Yesʉ mwamʉshʉbɨtsya athɨ: «Mbe malɨ, unyishondyako ki? Endambi aye ithetsi yahika.» 5 Nyinya mwabwɨra abakoli bo bagenda abathenga etifai athɨ: «Ebyoshi ababwɨra, mʉkolebyo.»

6 Aho habyaga bɨrega ndathʉ byakomibawa mʉ mabwe, ebyo aBayuta bagenda abahiramo ametsi w'erɨyetsyamo. Na mo bʉlɨ kɨrega mwagenda omwɨngɨra hofɨ litere igana lya metsi.

7 Yesʉ mwabwɨra abakoli abo athɨ: «Mwotsutsye ebɨrega ebi byo metsi.» Nabo mobotsutsyabyo metsi bʉyɨ-bʉyɨ.

8 Nɨmo Yesʉ abwɨrabo athɨ: «Mʉthehe ko metsi aya na mʉthwalɨre kʉwo kw'omʉkʉlʉ w'elinye.» Abakoli mobamʉthwalɨra kʉwo. 9 Omʉkʉlʉ w'elinye mwagetsya ametsi ayo nɨamamala ɨhɨndʉka tifayi. Hewethuwe mwathamɨnya nga etifayi eyo ɨthathoka hayi. Abakoli bo bathehaga ko metsi basha bo bamɨnyaga aho yɨthathoka.

Aho omʉkʉlʉ w'elinye mwabɨrɨkɨra omuherukya, 10 n'ɨmʉbwɨra athɨ: «Abandʉ boshi abanathanga ɨha bo bathalalɨkwa bw'etifayi ikwirire kʉtsɨbʉ, bamamala ikunda nɨmo wahabo omʉshʉshʉle. Hewethuwe ɨwe moʉbɨka etifayi yikwire ihika lɨno!»

11 Kuthyo ko Yesʉ akolaga ekɨmɨnyɨkalo kɨwe kɨmbere mo muyi w'ɨKana mo kɨhʉgo ky'iNgalilaya. Aho, mwakangania olʉkengerwa lʉwe, n'abɨga bʉwe mobamwɨkɨrɨtsya.

12 Honyuma kw'aho mwandagalɨra ɨKaperenaʉmʉ hagʉma na nyinya, na bagala babo n'abɨga bʉwe. Hewethuwe mobikalako bɨro bɨke.

13 Aho ePasaka y'aBayuta yabyaga nɨyɨrɨ hofɨ, Yesʉ mwɨrʉkɨra ɨYerʉsalemʉ. 14 Abere ahika mo kɨbʉga ky'eNyʉmba ya Gongo mweya bandʉ nɨabagʉlɨtsyamo esonde, na mbuli na thulikuku na kuthyo abahingania b'esofaranga nabo nɨbalɨmo.

15 Aho mwalʉka lʉkoba, mwayɨralo mo lʉbasha, mwahɨga abandʉ boshi n'esombuli n'esonde sabo mo kɨbʉga ky'eNyʉmba ya Gongo. Mwapanza esofaranga s'abahingania, n'ɨbɨndʉngʉla eso nyɨgalɨ sabo. 16 Na bo bagenda abagʉtsya othulikuku, Yesʉ mwabwɨrabo athɨ: «Muthokye ebyoshi ebyo byo hano. Mʉthayɨraga eNyʉmba ya Thatha mo nyʉmba ya buhingania.»

17 Abɨga bʉwe mobɨbʉka ko kushakirwe mo Mashako Abuyirire kʉthɨ: «Olwanzo nyɨrɨ nalo ko Nyʉmba awe lwanyɨmala.*»

18 Aho abakʉlʉ b'aBayuta mobabʉtsya Yesʉ bathɨ: «Kɨmɨnyɨkalo kɨhe ky'erishwekya kyo wathukangya bʉshana thʉmɨnye ko uwithe maka w'ɨkola uthyo?»

19 Yesʉ mwashʉbɨtsyabo athɨ: «Muhimbule eNyʉmba ya Gongo eyi, na mʉ bɨro bɨshathʉ nyashʉba imaniaro.» 20 Aho aBayuta abo mobamʉbwɨra bathɨ: «eNyʉmba ya Gongo eyi yotsuliraga myaka makumi ane na ndathʉ, nawe ʉthɨ wimaniaro mʉ bɨro bɨshathʉ kuroshi?»

21 Hewethuwe eNyʉmba ya Gongo yo Yesʉ agenda ahʉla, yabyaga nɨ omʉbɨrɨ ʉwe. 22 Honyuma kw'aho, Yesʉ abere alubuka, abɨga bʉwe mobɨbʉka ko mwasɨmolerabo ekɨnwa eki, aho mobɨkɨrɨtsya aMashako n'ebɨnwa Yesʉ anegenaga.

23 Yesʉ abere alɨ ɨYerʉsalemʉ ko kɨro kɨkʉlʉ ky'ePasaka mwakola bɨthɨko-thɨko. Bʉshana n'erɨlola ko bɨthɨko-thɨko akolaga, bandʉ bangɨ mobamwɨkɨrɨtsya.

24 Hewethuwe Yesʉ ɨye, mwathɨkɨrɨtsyabo kʉshangwa abyaga nietsi aboshi bo kʉtsɨbʉ. 25 Kandɨ mwathashondya bamʉfʉlɨre mwatsɨ wa mʉndʉ mʉlebe, kʉshangwa abyaga nietsi ebɨrɨ mo mɨthɨma y'abandʉ.