47 Yesʉ abere akɨnalɨ anegena, Yuta mʉgʉma w’oko bɨga ikumi na babɨrɨ mwahika. Yuta oyo abyaga na bandʉ bangɨ bahekire miyali na bɨbando. Babyaga nibathumirwe n’abakʉlʉ b’abaheri n’abangʉmwa b’aBayuta. 48 Yuta, oyo wabyaga nɨamahothera Yesʉ, mwaha abandʉ abo bo kɨmɨnyɨkalo athɨ: «Oyo nyafʉmbatha nɨ ɨye. Mʉmʉtsɨmbe.» 49 Aho n’aho Yuta mwayɨfʉnda ahalɨ Yesʉ n’ɨmʉbwɨra athɨ: «Enyɨkʉketsya mbe Mʉkangɨrɨtsya!» Honyuma kw’aho mwamʉfʉmbatha. 50 Yesʉ mwamʉbwɨra athɨ: «Mwira aye, kola ebyo bɨthakʉletha.» Aho, abandʉ abo mobayɨfʉnda hofɨ, mobatsɨmba Yesʉ n’ɨmʉmɨna. 51 Mʉgʉma w’oko bo babyaga na Yesʉ mwahulukya omuyali ʉwe, mwabanda mukoli w’omuheri mʉkʉlʉ n’ɨmʉtsako okuthwi. 52 Aho Yesʉ mwamʉbwɨra athɨ: «Shubya omuyali awe w’omo lʉba lwawo, kʉshangwa aboshi bo batsɨmba omuyali bandafwa mʉ muyali. 53 Uthetsi ko nyangalakɨra Thatha anyiwathikye. Aho n’aho anganyɨthʉmɨra bɨkembe bilengitsye ikumi na bɨbɨrɨ bya bamalaɨka? 54 Hewethuwe, aMashako owanegenire athɨ bɨno bithyo ko byangabere, angabererere athɨ?»
55 Honyuma kw’aho Yesʉ mwabwɨra abandʉ abo athɨ: «Iki kyangaleka nimwahika na miyali na bɨbando bʉshana mʉnyɨtsɨmbe nga nyɨrɨ mubandi? Nyagendaga enyikala mo Nyʉmba ya Gongo mw’ebɨro byoshi nyɨrɨ enyɨkangɨrɨtsya, momʉthanyɨmɨna. 56 Hewethuwe ebyoshi ebyo mobyabya bʉshana n’ebyo bamɨnyeretsɨ banegenaga mo Mashako Abuyirire bɨbererere.» Aho abɨga bʉwe boshi mobamushiga na mobashaga.
Yesʉ embere y’oBʉshenge Bʉkʉlʉ
(Mar 14:53-65; Luk 22:54-55,63-71; Yoa 18:13-14,19-24)