6 Ko bʉlɨ kɨro kɨkʉlʉ ky’ePasaka, Pilato abyaga abegere ɨmɨnʉla mʉndʉ mʉgʉma wa muliki yo bandʉ bathamʉshaba. 7 Kwabyaga mʉndʉ mʉgʉma wa muliki, erɨtsɨna lɨwe nɨ yo Baraba. Omʉndʉ oyo amɨnawa hagʉma na bathengʉ bagʉma bʉshana n’obwithi na bʉthengʉhe bo bakolaga. 8 Aho, abandʉ mobagendera Pilato, mobathanga ɨmʉshaba akolerebo nga kw’abyaga abegere ɨkolerabo. 9 Pilato mwabʉtsyabo athɨ: «Omushondya nyɨbamɨnʉlɨre omwamɨ w’aBayuta?» 10 Anegenaga athyo kʉshangwa mwamɨnya kw’abaheri bakʉlʉ bamahothera Yesʉ bʉshana n’ɨmʉfwa mwisho. 11 Hewethuwe abaheri bakʉlʉ abo mobuhya abandʉ bashabe Pilato amɨnʉlɨrebo Baraba. 12 Pilato mwashʉbabʉtsya omuhindano athɨ: «Aho omushondya nyɨyɨre omʉndʉ yo mwahʉlamo mwamɨ w’aBayuta oyu yo nyɨthɨ?» 13 Mobashʉba hambala bathɨ: «Mʉbambe ko mʉsalaba!» 14 Pilato mwashʉbabʉtsyabo athɨ: «Akolire kɨbɨ kɨhe?» Hewethuwe mobatsitsinia mw’ɨhambala kʉtsɨbʉ bathɨ: «Mʉbambe ko mʉsalaba!» 15 Pilato agendaga ashondya imoya abandʉ, aho mwamɨnʉlɨrabo Baraba. Honyuma kw’aho mwahamʉla bahumbe Yesʉ yo mbasha, na mwamʉhana bʉshana abambwe ko mʉsalaba.
Abashirikani abashekeretsya Yesʉ
(Mat 27:27-31; Yoa 19:2-3)
16 Abashirikani mobathwala Yesʉ mo rʉba lw’enyʉmba ya kafʉrʉnalɨ, na mobabɨrɨkɨra balikyabo boshi. 17 Mobambikya Yesʉ yo lʉkɨmba lwa ngʉla15:17 Lʉkɨmba lwa ngʉla: Nɨ lʉkɨmba lwa kɨtsɨro kɨnene lwa rangi nyɨthʉkʉla, lwagenda olʉbɨkɨrwa abamɨ basha na ko bandʉ bakʉlʉ. N’erangi eyo yabyaga y’omwamɨ w’abaroma., na mobalʉka kakira mʉ mʉthahɨ alɨko mɨshakɨ na mobamwambikyako ko muthwe. 18 Honyuma kw’aho mobathanga ɨmʉketsya bathɨ: «Woyo he, mwamɨ w’aBayuta!» 19 Bagenda abamuhumanga lʉsheke ko muthwe n’ɨmʉtsɨrako mathandɨ. Honyuma kw’aho mobafʉkama n’iunama embere sɨwe. 20 Babere bamamala ɨmʉshekeretsya, mobamwambʉlako olʉkɨmba lw’engʉla olo, n’ɨshʉba mwambikya esongɨmba sɨwe. Honyuma kw’aho, mobamʉhʉlʉkɨtsya embʉga bʉshana n’ɨya mʉbamba ko mʉsalaba.
Yesʉ abambwa ko mʉsalaba
(Mat 27:32-44; Luk 23:26-43; Yoa 19:17-27)