13 Honyuma kw’aho, Bafarisayo bagʉma na bandʉ bagʉma bo bayihiraga hagʉma na Herote mobathʉmwa kʉ Yesʉ bʉshana bamʉthege mʉthego mo bɨnwa ebyo anegena. 14 Abandʉ abo mobabʉtsya bathɨ: «Mʉkangɨrɨtsya, thwetsi kw’ɨwe ʉlɨ mʉndʉ wa kwenene. Na kuthyo ʉthatsomene mɨganɨtsye ya mʉndʉ, hewethuwe ʉnakangɨrɨtsya ko kwenene enzɨra Gongo ahamulire ɨkwama. Ingo thʉbwɨre, oMʉgomba anathuhamulire ɨrɨha ekoli ya Kaisari kʉtse ɨhɨ? Thʉtholere nɨ thwafʉharo kʉtse ɨhɨ?»
15 Hewethuwe kʉshangwa Yesʉ mwamɨnya kw’ɨbo nɨ bayimbya, mwabwɨrabo athɨ: «Bʉshana na ki omʉnyɨrengako? Mʉnyɨrethere kɨtsere kɨgʉma kya faranga hano bʉshana nyɨlole kʉkyo.»
16 Mobamʉletherakyo. Yesʉ mwabʉtsyabo athɨ: «Eshoshani eno n’erɨtsɨna lɨno ebishakirwe hano nɨ bya ndɨ?»
Mobamʉshʉbɨtsya bathɨ: «Nɨ bya Kaisari.»
17 Aho Yesʉ mwabwɨrabo athɨ: «Mʉgende omʉha Kaisari y’ebɨwe, na mʉgende omʉha Gongo y’ebɨwe.» Nabo mobashwekera kʉtsɨbʉ emɨshʉbɨtsye yɨwe.