Mushinga wa balimi babɨ
1 Honyuma kw’aho Yesʉ mwathanga ɨnegena na bandʉ mʉ mishinga athɨ: «Mʉndʉ mʉgʉma mwahera ɨshwa lya misabibu. Erɨshwa eryo mwathimbya kʉlyo ko lʉgʉthʉ, mwathima kyuna ky’erɨkamɨramo ebiguma by’emisabibu na mwahimba kathegeryo12:1 Soma Isaya 5:1-2. k’abatheya b’erɨshwa. Honyuma kw’aho mwakondesalyo ku bahingi, na mwagenda lʉgendo. 2 Ebɨro by’erɨhʉlʉla byabere byahika, mwathʉma mʉgʉma w’oko bakoli bʉwe ko balimi abo, bʉshana bamʉhe engemo y’erɨshwa lɨwe. 3 Hewethuwe abalimi abo mobatsɨmba omukoli oyo, mobamuhumba n’ɨmʉshʉbʉtsya minwe mɨsha. 4 Omwenye erɨshwa mwathʉmɨrabo kandɨ ʉndɨ mukoli. Oyo naye, mobamuhuma ko muthwe n’ɨmʉsʉnzʉgʉra. 5 Omwenye erɨshwa mwashʉba thʉmɨrabo ʉndɨ mukoli, oyo mobamwitha. Na honyuma kw’aho mwathʉma bandɨ bakoli bangɨ, abalimi abo mobahumba bagʉma n’itha abandɨ. 6 Omwenye erɨshwa abyaga niakishibya na mʉgala ʉwe mʉtsɨɨrwa kuroshi. Ko nduli mwamʉthʉma kʉbo, n’ɨnegena athɨ: "Nyetsi ko mʉgala aye ɨye bamushikya." 7 Hewethuwe abalimi abo mobabwɨrana ɨbo kw’ɨbo bathɨ: "Shʉnga! Oyo yo wandashiba n’omwandʉ w’erɨshwa lɨno. Ewo kwenzi thumwithe, n’erɨshwa lɨno lyabya mwandʉ ethʉ!" 8 Aho mobatsɨmba mʉgala ʉwe oyo mobamwitha n’ɨgʉsha ekinda kɨwe ky’emʉsɨke w’erɨshwa.»
9 Honyuma kw’aho Yesʉ mwabʉtsya athɨ: «Ewono omwenye erɨshwa ly’emisabibu oyo andakola ki? Ɨye andahika n’itha abalimi abo. Na honyuma kw’aho andaha erɨshwa eryo lyo bandɨ balimi.» 10 Yesʉ mwabwɨrabo athɨ: «Mʉthahera mwathasoma aMashako Abuyirire owanegenire athɨ:
"Eribwe lyo lyathɨndawa n’abahimbi,
lyo lyabere ibwe inene ly’ekoni.
11 Ni Nyinya-kowethʉ yo wakolaga ekɨnwa kɨno,
nakyo nɨ ky’erishwekya kʉtsɨbʉ kw’ithwe12:11 Soma Saburi 118:22-23.."»
12 Aho abaheri bakʉlʉ abo mobashondya ɨtsɨmba Yesʉ, kʉshangwa mobamɨnya ko mwanegena omushinga oyo bʉshana nabo. Hewethuwe kʉshangwa mobʉbaha omuhindano w’abandʉ, mobamulika na mobayɨgendera.