12 Yesʉ abere analɨ mʉ mʉgʉma w’emiyi y’ekɨhʉgo ekyo, mohahika mʉndʉ alɨko bɨbenzɨ ko mʉbɨrɨ woshi. Omʉndʉ oyo abere ashʉnga Yesʉ mwafʉkama embere sɨwe n’obʉsʉ mobwahika ahishi n’ɨmʉshaba kʉtsɨbʉ athɨ: «Ee Nyinya-kowethʉ, wamashasha wanganyetsya.» 13 Yesʉ mwalambʉla okʉboko mwamʉkolako n’ɨnegena athɨ: «Nyishashire, were.» Aho n’aho ebɨbenzɨ ebyo mobyamʉthokako. 14 Yesʉ mwamʉhamʉla athɨ: «Ʉthabwɨraga mʉndʉ bʉshana n’ebi. Hewethuwe ʉgende uyayikangye ko muheri. Honyuma kw’aho uhulukye ebɨhembo ng’oko oMʉgomba wa Mʉsa ahamulire, kw’ikangania ko bandʉ boshi ko wamera.5:14 Omʉndʉ amalamibwa ebɨbenzɨ anaya yikangania ko baheri kw’alamire. Agenda akola ebyo kʉshangwa bashʉbe mʉtsɨge mo kathi k’abandʉ. Soma Balawi 13:45-46; 14:1-32.»
15 Mokɨthaleka engʉlʉ ya Yesʉ ɨthagenda mo bandʉ. Bandʉ bangɨ mobagenda abahindana bʉshana bonvwe ebyo Yesʉ agenda anegena na kandɨ balamibwe amakoni wabo. 16 Hewethuwe Yesʉ agenda ayɨhɨgʉla kʉbo, n’ɨya handʉ hathalɨ bandʉ bʉshana n’ɨyashaba Gongo.