41 Aho Petero mwabʉtsya Yesʉ athɨ: «Nyinya-kowethʉ, omushinga wamatsa oyu athulebitsye ithwe bene kʉtse alebitsye abandʉ boshi?»
42 Nyinya-kowethʉ mwamʉshʉbɨtsya athɨ: «Ɨndɨ yo mukoli w’iyinihirwa na mwenge? Omukoli yo ʉlɨ ng’oyo n’ɨye yo nyinya-kowabo angamʉyɨramo mwimanitsi w’enyʉmba yɨwe. Omukoli oyo andagenda aha abakoli balikyabo bo kalyo ko ndambi ɨtholere. 43 Amagashanɨrwa omukoli oyo nyinya-kowabo andabya ashʉbʉla angamweya nɨakɨnalɨ akola omʉlɨmo oyo. 44 Kwenene enyɨbabwɨra, nyinya-kowabo andamʉyɨramo mwimanitsi w’obushoki bʉwe boshi.
45 «He n’omukoli oyo amathanga ɨyɨbwɨra mo mʉthɨma ʉwe athɨ: "Nyinya-kowethʉ amathɨndɨrayo," honyuma kw’aho amagenda ahumba abakoli balikyabo abayira n’abakatsɨ, nɨathanga irya n’ɨshoma n’ikunda, 46 nyinya-kowabo andashʉbʉla mo kɨro athalengekenie na ko ndambi athetsi. Aho nyinya-kowabo andamʉthɨbɨthako n’ɨmʉganzamo nga mʉndʉ athathʉnganene.»
47 «Omukoli yo wetsi erishondya lya nyinya-kowabo, he athayithegekenie n’ɨkola nga ko nyinya-kowabo ashondire, omukoli oyo andahumbwa mihumbo mɨngɨ. 48 He omukoli yo uthetsi erishondya lya nyinya-kowabo amakola ekyangaleka niahumbwa andahumbwa mihumbo mɨke. Omʉndʉ yo wahabawa bɨngɨ, andashabwa bɨngɨ. N’oyo wabikibawa bɨngɨ andabʉtsɨbwa bɨngɨ kʉtsɨbʉ.»