Mateus 26

Yesʉ ashabɨra mw’ɨshwa ly’iNgetetsemani

36 Aho Yesʉ mwahika handʉ hagenda ahahʉlwamo Ngetetsemani hagʉma n’abɨga bʉwe. Mwabwɨrabo athɨ: «Mwikale hano, mo ndambi enyɨya shabɨra halira.» 37 Honyuma kw’aho, mwagenda na Petero n’abagala babɨrɨ ba Sebetayo. Mwathanga ɨfwa buliye na n’igangya-gangya mʉthɨma. 38 Aho mwabwɨrabo athɨ: «Omʉthɨma aye otswiremo buliye ihika ko kɨka ky’ɨfwa. Mushibe hano na mutheye hagʉma nangye.» 39 Yesʉ mwayɨfʉnda hale hake, mwafʉkama obʉsʉ ihika ahishi na mwashaba nɨanegena athɨ: «Thatha, bɨrɨ byangathokekana, fʉnda hale nangye olwatha lw’obwagali olu. Hewethuwe, bithabyaga nga ko nyishashire, he nga ko ushashire.»

40 Honyuma kw’aho mwashʉba ahalɨ abɨga na mweyabo nɨbalɨtho. Mwabwɨra Petero athɨ: «Momʉthalɨ omukotsya itheya hagʉma nangye n’esaha n’engʉma? 41 Mʉthayagatho na mʉshabe nɨmo mʉthɨlengweko. Omʉthɨma afwire muhwa, hewethuwe omʉbɨrɨ nɨ molo.» 42 Yesʉ mwayɨfʉnda hale n’ɨya shaba Gongo ngendo lya kabɨrɨ nɨanegena athɨ: «Thatha, olwatha lw’amalɨgo olu lʉlɨ lʉthangatsʉka hale nangye bʉthashoma kʉlo, aho, erɨshasha lyawe lɨkoleke!» 43 Kandɨ mwashʉba aho abɨga babyaga, na mweyabo nɨbalɨtho, kʉshangwa amesho wabo abyaga nɨamatsɨthoha bʉshana n’othʉlo. 44 Yesʉ mwashʉba shigabo, mwashʉba yɨfʉnda n’ɨya shaba ngendo lya kashathʉ nɨashʉbɨrɨra ebɨnwa bɨgʉmerera. 45 Honyuma kw’aho mwashʉba aho abɨga babyaga n’ɨbwɨrabo athɨ: «mʉkɨnalɨtho n’ɨlʉhʉka? Mʉlole, endambi yamahika oMʉgala w’oMʉndʉ ahirwa mo minwe y’abakoli b’ebɨtsɨbʉ. 46 Mwimane thʉgende! Mʉlole kw’oyo wamanyɨhothera kʉbo kw’amahika!»