27 Honyuma kw’aho, Yesʉ mwathoka mo nyʉmba eyo. Mwashʉnga kʉ mukarani mʉgʉma w’ekoli erɨtsɨna lɨwe nɨ yo Lawi.5:27 Lawi oyo yo na Matayo. Lawi oyo abyaga n’ikere mo biro agenda alɨhɨsɨra Ekoli. Yesʉ mwamʉbwɨra athɨ: «Nyɨkwame.» 28 Lawi mwahangana, mwashiga ebyoshi n’ɨkwama Yesʉ.
29 Honyuma kw’aho Lawi mwakolera Yesʉ yo linye linene mo nyʉmba yɨwe. Mo nyʉmba eyo mwabyaga bakarani bangɨ b’ekoli na bandɨ bandʉ bagenda abalya hagʉma nabo. 30 aBafarisayo n’abakangɨrɨtsya b’oMʉgomba b’omo kɨkembe ky’aBafarisayo abo, babere bashʉnga ebyo mobayɨfweba, n’ɨbwɨra abɨga ba Yesʉ bathɨ: «Nɨ ki kyo kɨreka omulya n’ɨshoma hagʉma n’abakarani b’ekoli n’abakoli b’ebɨtsɨbʉ?» 31 Yesʉ mwashʉbɨtsyabo athɨ: «Abatsibuhire bathashondya mʉshake hewethuwe nɨ abakoni bobanamushondya. 32 Ingye nyithahikaga ɨbɨrɨkɨra abathʉnganene embere sa Gongo, hewethuwe nyahikaga ɨbɨrɨkɨra abakoli b’ebɨtsɨbʉ bʉshana babɨndʉke bathoke mo bɨtsɨbʉ byabo.»