1 KINGS 13

1 Me yog SOMOL ngak ba profet nu Judah ni nge yan nga Bethel, me yan ma nap’an ni taw e ngaram mab sak’iy Jeroboam ko fare altar ni nge pi’ e maligach. 2 Me non fare profet nib togopluw ko fare altar, ni nge fol ko tin keyog SOMOL ngak ni ga’ar "Altar, altar, ba’aray e n’en ni be yog SOMOL: Bay bbitir ni bay ni tunguy fithingan ni Josiah, ni bay ni gergeleg ngalan fare tabnaw rok David. Ir e bayi li’ nge yim’ u dakenam e pi prist ni yad be pigpig ko fapi altar rok e pi’in ndar nagned SOMOL ni yad ma pi’ e maligach u dakenam, ma bayi urfiy yilen e girdi’ u dakenam." 3 Miki ul ul’ fare profet ngay ngki ga’ar, "Re altar ney e bayi puth, ma pi awat nu daken e bayi wearwear. Ma aram e bay mu nang nike non SOMOL u dakenag."

4 Nap’an ni rung’ag Jeroboam ni Pilung e ran’ey, me foleg pa’ ngak fare profet ma ba’aray e n’en ni yog ni ngan rin’ ngak, "Mu kolew e re mo’on nem!" Ma ka chiyngiyal’ nem me m’ay gelngin pa’ fare pilung ma dakiyag ni buguy pa’. 5 Miy gi puth fare altar nib tumgin me map e awat riy nga but’, ni bod nike yog fare profet u fithingan SOMOL nra buch. 6 Me ga’ar Jeroboam ni Pilung ngak fare profet, "Wenig ngom mu yibliyeg ngak SOMOL ni Got rom, mag wenig ngak nge golnag pa’ag!"

Me meybil fare profet ngak SOMOL me gol pa’ fare pilung. 7 Ma aram me ga’ar fare pilung ngak fare profet, "Mu’un ngog ngdarow nga tabnaw rog mag kay ban’en. Bay gu pi’ puluwon ngom e tin kamrin."

8 Me fulweg fare profet, "Ku fa’anra mang e ga ra pi’ ngog baley ko fla’ab rom, ma ku dab gu un ngom ara guwa’ ganam fa gu unum ban’en u tafnam. 9 Keyog SOMOL ngog ndab gu wa’ fa gu unum ban’en, ma ku dab gu sul nga tabnaw ko re pa’ i kanawo’ ni gub riy." 10 Ere daki sul ko fare pa’ i kanawo’ ni yib riy, ya sul u ba pa’ e kanawo’.

Ba profet u Bethel nike pilbithir

11 Ma ngiyal’nem e immoy ba profet nib pilbithir ni be par u Bethel. Me yib e pi’in pagel ni pifak ma yad be weliy ngak e n’en nike rin’ fare profet nu Judah u lan yu Bethel e rofen nem nge n’en nike yog ngak Jeroboam ni Pilung. 12 Me fithrad fare profet ni pilbithir, ni ga’ar, "Pa’ ni ngan e kanawo’ e yan riy nnap’an ni chuw?" Miyad yog fare kanawo’ ngak 13 me yog ngorad ni ngar ted e sedal nga daken e dongki rok. Mar rin’ed ni aram rogon, me yan u daken fare dongki rok 14 u daken fare pa’ i kanawo’ ni be lek fare profet nu Judah me pir’eg ni be par u tan ba ke gek’iy ni oak. Me fith, ni ga’ar, "Mog i gur fare profet nu Judah?"

Me fulweg fare mo’on, ni ga’ar, "I gag."

15 Me ga’ar ngak, "Moy nga tabnaw ngad abichgow."

16 Machane me fulweg fare profet nu Judah, ni ga’ar, "Dabiyag ni nggu’un ngom nga tabnaw fa gu fanay e tin ga be t’ufegeg ngay. Ma ku dab gu wa’ fa gu unum ban’en ni kam pi’ u roy, 17 ni bochan e keyog SOMOL ngog ndab gu wa’ fa gu unum ban’en, ma ku dab gu sul nga tabnaw ko re pa’ i kanawo’ ni gub riy."

18 Ma aram me ga’ar fare profet ni pilbithir nu Bethel ngak, "Ma ku gag reb a profet ni bod gur, ma keyog SOMOL ngak ba engel ni nggu piningem ngam un nga tabnaw rog nggu nang salpem." Machane fare profet ni pilbithir e be ban.

19 Ma aram me un fare profet nu Judah ngak fare profet nib pilbithir nga tafen ngar abichgow. 20 Ma nap’an ni yow ba sabal ko tebel, me yib e thin rok SOMOL ngak fare profet ni pilbithir, 21 me tolul ngak fare profet nu Judah, ni ga’ar, "Be yog SOMOL ni gur e dam fol rok ma dam rin’ e tin ni yog. 22 Ya, kam sul kam abich u bangi ban’en nike yog ngom ndab mu abich riy. Bochan e ran’ey ma aram e bay nthang e fan rom, ma downgim e dab ni k’eyag u lane taliw ko tabnaw rom."

23 Nga tomuren ni kar mu’gow ko abich, me tay fare profet ni pilbithir e sedal nga daken e dongki rok fare profet nu Judah, 24 ma aram me yan. Ma kabeyan u kanawo’ me mada’eg ba layon me li’ fare layon fare profet nge yim’. Me par e ldow rok u kanawo, me sak’iy fare dongki nge fare layon u barba’ i to’oben. 25 Me yib bogi pumo’on u kanawo’ mar guyed fare ldow u lan e kanawo’, ma bay fare layon ni be sak’iy u to’oben. Mranod ngalan yu Bethel mar weliyed e tin kar guyed.

26 Nap’an ni rung’ag fare profet ni pilbithir murung’agen e ran’ey, me ga’ar, "Ireram fare profet nde fol ko tini yog SOMOL ngak ni nge rin’! Ma aram e ke l’oeg SOMOL e re layon nem ni nge thang e fan rok, nri bod rogon ni yog SOMOL." 27 Ma aram me ga’ar ngak e pi pumo’on ni pifak, "Mu ted e sedal nga daken e dongki rog." Miyad rin’ ni aram rogon, 28 ma aram me yan, me yan i pir’eg e ldow rok fare profet ni bay u lane kanawo’, ni bay fare dongki nge fare layon ni ka yow be sak’iy u to’oben. Fare layon e dawori longuy fare ldow ma ku dawori li’ fare dongki. 29 Me fek fare profet ni pilbithir fare ldow nge tay nga daken keru’ fare dongki, me fulweg nga Bethel ni nge mowawnag me k’eyag. 30 Me k’eyag ngalan e taliw ko birok e tabnaw, ma ir nge pi pumo’on ni pifak e ur yor niged, ni be lungurad, "A walageg ni pumo’on, walageg ni pumo’on!" 31 Ma nga tomuren ni kan k’eyag me ga’ar fare profet ngak fapi pumo’on ni pifak, "Nap’an ni gu ra yim’, mi gimed k’eyageg ngalan e re low ney, ni ngam tedgag nga barba’ i charen. 32 Fapi thin ni yog SOMOL ngak ni nge yog nib togopluw ko fare altar nu Bethel mab togopluw nga gubin yang ni yima meybil riy u lane yochi binaw nu Samaria e rra yib i m’ug nib riyul’."

Denen ni ubchiya’ ku Jeroboam

33 Me Jeroboam ni Pilung nu Israel e ku de pi’ keru’ ko pi ngongol rok ni kireb miki par ngi i mel’eg e pi’in prist u lan e yug tabnaw ni ngu’ur pigpiggad ko fapi altar nike toy. Demturug e en ni ba’adag ni nge mang reb e prist me yibley nge mang reb. 34 Re denen rok ney ni rin’ e ir e girengiy e kireb nga daken e tabaw rok, nge chuw ko gagiyeg me math mit u roy u fayleng.