1 KINGS 15

Abijah ni Pilung nu Judah

1 U lan e bin ragag nge meruk e duw ngay nike gagiyeg Jeroboam ni Pilung nu Israel, me mang Abijah e pilung nu Judah, 2 me gagiyeg ni dalip e duw u lan yu Jerusalem. Chitiningin e Maakah ni be’ ni bpin ni fak Absalom. 3 Pi denen ni i rin’ e chitamngin e ki i rin’ ma gathi ri i yul’yul’ ngak SOMOL ni Got rok, ni bod rogon ni rin’ David ni thangtuw rok. 4 Machane bochan David me pi’ SOMOL ni Got rok fak Abijah nib pagel ni nge gagiyeg nga tomuren u lan yu Jerusalem mi i ayweg yu Jerusalem ndabi buch ban’en riy. 5 I rin’ SOMOL e ren’ey ni bochan e i rin’ David e tin nib m’agan’ SOMOL ngay ma dariy ban’en ni yog ngak ni pag, kemus ni fare oloboch ni ngongliy ngak Uriah nib Hittite. 6 Fare mael ni tabab u thilin Rehoboam nge Jeroboam e detal u n’umngin nap’an ni i gagiyeg Abijah. 7 Ma gubin e tin kabay ni i rin’ Abijah e ni yoloy ngalan e babyor ni fithingan e Chepin e Pilung nu Judah.

8 Me yim’ Abijah min k’eyag u lane Binaw rok David, me Asa nib mo’on ni fak e yan nga luwan nge pilung.

Asa ni Pilung nu Judah

9 Re duw ni gaman e rliw’ e duw nike gagiyeg Jeroboam ni Pilung nu Israel, me mang Asa e pilung nu Judah, 10 me gagiyeg ni aningeg i ragag nge ta’reb e duw u lan yu Jerusalem. Me Maakah e titaw rok ni be’ ni bpin ni fak Absalom. 11 Me Asa e i rin’ e tin nib m’agan’ SOMOL ngay, ni bod ni i rin’ David ni ga’ rok kakrom. 12 Me chuweg u lan e re nam nem urngin e pumo’on nge ppin ni yad ma falchuway’ ngorad ma yad ma pigpig ngak yug boch e got ko yung i n’en tagil’ e meybil, me n’ag urngin e liyos ni yima meybil ngay ni i ngongliy e tin ni yad bm’on rok e pilung. 13 Miki chuweg Maakah ni titaw rok ko fare liw ni chitiningin e pilung, ni bochan e ke ngongliy ba liyos nib sonogor ni ya’an Asherah ni fare got ni bpin. Re liyos nem e th’ab Asa nga but’ nge urfiy u lan fare Loway ni Kidron. 14 Yug aram rogon nde gathay Asa urngin e yungi tagil’ e meybil rok e pi’in ndar nanged Got, machane i par nib yul’yul’ ngak SOMOL u n’umngin nap’an e yafos rok. 15 Me tay ngalan fare Tempel urngin e pin’en nike ognag e chitamngin ngak Got, ku arrogon e pi gol nge bogi ban’en nib silber ni ir rok e pi’.

16 Me Asa ni Pilung nu Judah nge Baasha ni Pilung nu Israel e go’ mael e ra tew u n’umngin nap’an ni ur gagiyeggow. 17 Me yan Baasha i mael ngak yu Judah me tabab i yororiy yu Ramah ni fan ko mael ni bochan ni nge dabkiyag ni ngu’un yan ngalan yu Judah fa nganib nga wuru’. 18 Ma aram me fek Asa ni Pilung urngin e silber nge gol nike magey u lan fare Tempel nge fare naun ni tafen e pilung, nge pi’ ngak bogi tolang ko salthaw rok ni ngar feked i yan nga Damascus, ngan pi’ ngak Benhadad ni Pilung nu Syria, nib mo’on ni fak Tabrimmon nib mo’on ni fak Hezion, ni ba’aray e thin nib cheag ngay: 19 "Ngad manged ngabang, ni bod rogon e pi chitamangidad. Ba’aray e silber nge gol niba tow’ath ni fanam. Ere chiney e ngam th’ab e tha’ romew Baasha ni Pilung nu Israel, ya nge chuweg e yu raba’ i salthaw rok u tafnag."

20 Me pining Benhadad ni Pilung e kefel’ ko tin keyog Asa me l’oeg e pi tolang ko salthaw rok nge yu raba’ i salthaw rorad ni ngar maelgad ko pi binaw nu Israel. Miyad kol e binaw nu Ijon, Dan, Abel Beth Maacah, nge fa gin’en nu to’oben e Lipath ni Galilee, nge ga’ngin yang u tafen yu Naftali. 21 Nap’an ni rung’ag Baasha ni Pilung e n’en nike buch, me tal i yororiy yu Ramah ni fan ko mael me yan nga Tirzah.

22 Ma aram me l’oeg Asa ni Pilung e thin nge yan u ga’ngin yang yu Judah ni be yog ngak gubin e girdi’, ndariy be’ ndabi un ngay, ni go’ ngan pi’ e ayuw ngan fek fapi malang nge ren nike tay Baasha u Ramah ni i fanay ko yoror nge chuw u rom. Me fanay Asa e pin’ey nge yororiy yu Mizpah ngu Geba, nib binaw ni bay u lan e nug nu Benjamin.

23 Ma tin kabay niki rin’ Asa ni Pilung, ni aram e ngongol rok ni madangdang nge yochi binaw ni i yororiy ni fan ko mael, e gubin ma go’ kan yoloy ngalan Chepin e Pilung nu Judah. Machane nap’an e ke pilbithir me mugutgut ni bochan bm’ar ni yib nga’ay. 24 Me yim’ Asa min k’eyag ngalan fapi low ko yam rok e pilung u lan fare Binaw rok David, me Jehoshafat nib mo’on ni fak e yan nga luwan nge mang pilung.

Nadab ni Pilung nu Israel

25 U lan e bin l’agruw e duw ko gagiyeg rok Asa ni Pilung nu Judah, me Nadab nib mo’on ni fak Jeroboam ni Pilung e ir e mang pilung nu Israel, me gagiyeg ni l’agruw e duw. 26 Me denen nib togopluw ngak SOMOL me waliy yu Israel nga fithik’ e denen, ni bod e chitamngin.

27 Baasha nib mo’on ni fak Ahijah, ni be’ ko fare ganong ni Issakar, e makath nib togopluw ngak Nadab me thang e fan rok Nadab u nnap’an nike yib nge salthaw rok ra koled fare binaw nu Gibbethon u lan yu Filistia. 28 Ran’ey e buch u lan e bin dalip e duw ko gagiyeg rok Asa ni Pilung nu Judah. Ma aram me yan Baasha nga luwan Nadab nge mang pilung nu Israel. 29 Ma yug nap’an ni mang pilung me tabab i thang e fan rok urngin chon e tabnaw rok Jeroboam. Ni bod rogon e tin yog SOMOL u daken e tapigpig rok, ni fare profet i Ahijah nu Shiloh, urngin chon e tabnaw rok Jeroboam ni yigo’ nthang e fan rorad; ri dariy ta’abgayad ni fos. 30 Ran’ey e buch ni bochan e ke pug Jeroboam e damumuw rok SOMOL, ni Got nu Israel, ko pi denen nike ngongliy ma ku ir tapgin yu Israel ni denen.

31 Ma urngin e tin kabay niki rin’ Nadab e kan yoloy ngalan Chepin e Pilung nu Israel. 32 Me Asa ni Pilung nu Judah nge Baasha ni Pilung nu Israel e ur mael gow ngorow ni dariy e tal u n’umngin nap’an ni ur gagiyeggow.

Baasha ni Pilung nu Israel

33 U lan e bin dalip e duw ko gagiyeg rok Asa ni Pilung nu Judah, me Baasha nib mo’on ni fak Ahijah e mang pilung u ga’ngin yu Israel, me par u Tirzah ngi i gagiyeg ni rliw’ nge aningeg e duw. 34 Me denen nib togopluw ngak SOMOL nge waliy yu Israel nga fithik’ e denen, ni bod Jeroboam ni Pilung ni immoy nib m’on rok.