1 KINGS 21

Bangi woldug ni grape rok Naboth

1 Naboth e bay bangi woldug ni fi’in ko binaw nu Jezreel, nib chugur ko naun rok Ahab ni Pilung. 2 Me reb e rran me ga’ar Ahab ngak Naboth, "Ngam pi’ fa gi woldug rom ni grape nggu fi’iy, ya ba chugur ko tabinaw rog, ma gu ba’adag ni nggu yung e yasay ngay. Bay gu pi’ bang e woldug ni grapes ngom ni kabfel’ ngay, ma fa’anra ga ba’adag ni nggu chuw’iy, ma gu ra pi’ puluwon ngom ni bfel’."

3 Me fulweg Naboth ni ga’ar, "Re gi woldug nem ni grape e gayog ni yag ngog rok e pi ga’ rog kakrom, ere SOMOL e dabi magan’ ngay ni nggu pi ngom."

4 Me sul Ahab nga tafen nike kireban’ ma ke damumuw ko fapi thin nike yog Naboth ngak. Me yan i pag ir nga chob rok nge sap ko rungrung, me par nde abich. 5 Me yib Jezebel ni le’engin ngak me ga’ar, "Mang e kari kireban’um ngay? Mangfan ndab mu abich?"

6 Me ga’ar, "Bochan e thin nike yog Naboth ngog. Kugog ngak ni nggu chuw’iy fa gi woldug rok ni grape, mra ba’adag ni nggu pi’ bang e woldug ni grape ngak nge yan nga luwan mu gu pi’, me ga’ar dabiyag ni nge pi’!"

7 Me ga’ar Jezebel, "Mog, gur e pilung fa gathi gur? Mu chuw u chob ngam fal’eg lanin’um ma ga abich. Bay gu fek e gi woldug nem rok Naboth nggu pi’ ngom!"

8 Me yoloy e babyor nge tay fithingan Ahab ngay, me pag e pow rok Ahab nga daken, me pi’ nge yan ngak e pi tolang ni yad bay u tan pa’ Ahab nge pi’in yad be yog e thin u Jezreel. 9 Re gi babyor nem e bay e thin riy ni ga’ar: "Nga mogned reb e rran ni ngan pag e abich, mi gimed ulunguy e girdi’, mi gimed yog ngak Naboth nge par ko gin ntagil’ e en ni yibe tay fan. 10 Mi gimed fek l’agruw e girdi’ nrib kireb nga rognew u p’eowchen nike yog e thin nib kireb ngak Got nge en ni pilung. Mi gimed fek nga wuru’ e binaw ngam malang niged nge yim’."

11 Me rin’ e pi tolang ni yad bay u tan pa’ Ahab nge pi’in yad ma yog e thin u Jezreel e n’en keyog Jezebel. 12 Miyad yog reb e rran ni nga ni pag e abich, miyad ulunguy e girdi’, miyad yog ngak Naboth ni nge yan i par ko gin ntagil’ e en ni yibe tay fan. 13 Fa gal girdi’ nrib kireb e rognew u rom u fithik’ e girdi’ nike yog Naboth e thin nib kireb ngak Got nge en ni pilung, ma aram min fek Naboth nga wuru’ e binaw nga ni malangnag nge yim’. 14 Mi ni pi’ e re bugithin ni ba’aray nge yan ngak Jezebel nike lunguy, "Fa’anem i Naboth e kan thang e pogofan rok."

15 Ma nap’an ni taw e re bugithin nem ngak Jezebel me ga’ar ngak Ahab, "Ke yim’ Naboth. Ere ngam fi’iy fa gi woldug ni fa’ani siyeg ni nge pi’ ngom nchuway’." 16 Ka chingiyal’nem me yan Ahab i lekag fa gi woldug ni aram e nge fi’iy.

17 Me ga’ar SOMOL ngak Elijah ni fare profet ni be’ u Tishbe, 18 "Mman mu guy Ahab ni Pilung nu Samaria. Ya gimew ra mada’ ko fa gi woldug ni fi’in Naboth, ni aram e ke yan ni nge lekag ya nge fi’iy. 19 Mog ngak ni gag SOMOL e be lungug ngak, ‘Mog, kam thang e pogofan rok Naboth, ma ngkum fek tafen ngam tafnay?’ Mog ngak ni be lungug, ‘Gin’en ni i lil’ e pilis racha’en Naboth riy e ireram e gin ku bayi lil’ e pilis e racha’ rom riy!"

20 Ma fa’ani guy Ahab Elijah me ga’ar, "To’ogor rog, kam piri’egeg."

Me ga’ar Elijah, "Er rogon, kug piri’egem. Kam par ni tin nib kireb u p’eowchen SOMOL e ga be ngongliy. 21 Ere be ga’ar SOMOL ngom, ‘Bay gu girengiy e riya’ nga dakenam. Bay gu thang owchem, mu gu thang owchen urngin e pumo’on ko tabinaw rom, ni bitir nge pilibthir nta’reb rogon. 22 Tabinaw rom e bayi par ni bod e tabinaw rok Jeroboam ni Pilung ni fak Nebat, nge tabinaw rok Baasha ni Pilung ni fak Ahijah, ya kam k’aring e damumuw ngog ni fan e kam waliy yu Israel nga fithik’ e denen.’ 23 Ma Jezebel ku ba’aray e n’en keyog SOMOL ni fan ngak, ‘Bayi longuy e pilis Jezebel u lan e binaw nu Jezreel.’ 24 Ma girdi’ ko tabinaw rom ni bay yim’ u lan binaw e bayi longuyrad e pilis, ma tin bay yim’ u daken e tafelfel’ e bayi longuyrad e arche’ ni vulture."

( 25 Dariy be’ nike par ni tin kireb u p’eowchen SOMOL e be rin’ ni bod rogon Ahab, ni Jezebel ni le’engin e be tay ir ngak be yodorom. 26 Ya ke ngongliy e tin th’abi kireb e denen, be tayfan ma be meybil ko liyos ni bod e pi Amorite, fa’an ni tulufrad SOMOL ngar chuwgad me tafnay yu Israel taferad.)

27 Fa’ani mu’ Elijah ko welthin, me guchthuy Ahab e mad rok nge chuweg u daken, me yin’ e mad ni tutuw nga daken. Me par ndaki abich, mi i mol ni kabay fare tutuw ni mad u daken, mi i yan ni kari kireban’.

28 Me ga’ar SOMOL ngak Elijah ni profet, 29 "Kam guy nga rogon nike sobut’nag Ahab ir u p’eowcheg? Bochan e ke yodoro’, ma aram e dab kug girengiy e riya’ nga daken u nap’an e yafos rok; machane ba pagel ni fak e bay gu girengiy e riya’ nga daken e tabnaw rok u nap’an e par rok ko biney e tamilang."