1 KINGS 14

Yam’ ni tay fare pagel ni fak Jeroboam

1 Ngiyal’nem e yib i m’ar Abijah nib mo’on ni fak Jeroboam ni Pilung. 2 Me ga’ar Jeroboam ngak le’engin, "Mu thilyeg ya’am nge dabki poyem be’, ma ga yan nga Shiloh, ko gin nma par Ahijah ni profet riy, fa’anem ni yog ni gu ra mang pilung nu Israel. 3 Mu fek i yan ngak ragag e flowa ni lof, nge boch e kek, nge ba melor i honey. Mag fith ngak ko mang e nge buch rok e re pagel ney ni fakdow, mra yog ngom."

4 Ma aram me yan fare pin nga tabnaw rok Ahijah u Shiloh. Ma ke malmit Ahijah ya kari pilbithir. 5 Ma keyog SOMOL ngak ni bay yib le’engin Jeroboam ni nge fith salpen fak ni pumo’on ngak nike m’ar. Ma keyog SOMOL ngak Ahijah e n’en ni nge yog.

Nap’an ni taw le’engin Jeroboam e ngaram ma ke dake yug be’ nag ir. 6 Machane nap’an ni rung’ag Ahijah lingan nike yib ko mab, me ga’ar, "Moy nga naun. Gu manang ni gur le’engin Jeroboam. Mangfan ni ga be dake be’ nigem? Bay e thin ni nggog ngom nde fel’. 7 Mman ngamog ngak Jeroboam ni ba’aray e n’en ni be yog SOMOL ni Got rok yu Israel ngak: ‘Kug mel’egem u fithik’ e girdi’ kug tem ni gur e ngu’um gagiyegnag e girdi’ rog ni piyu Israel. 8 Kug fek e gagiyeg ko pulung rok e pi’in owchen David kug pi’ ngom. Machane da mur par ni bod e tapigpig rog i David, nrib yul’yul’ ngog, ir e ma fol ko tin kugog, ma tin nib magan’ug ngay e i rin’. 9 Pi denen ni kam rin’ e ba gel e kireb riy ko tin ni i rin’ e pi’in ni ur gagiyeggad ni yad m’on rom. Kam pi’ keru’um ngog ma kam k’aring e damumuw ngog ko pi liyos ni ga be ngongliy nge ya’an bogi ban’en nni ngongliy ko wasey ni yibe tayfan. 10 Bochan e ran’ey ma aram e bay gu girengiy e riya’ nga daken e gagiyeg ni be tay e tabnaw rom, ma bay gu thang owchen gubin e pumo’on ni owchem, ni ta’reb rogon e pi’in ni kayad bpagel nge pi’in ke pilbithir. Bay gu thirif e tabnaw rom u but’; ngar chuwgad ni bod t’ay e gamanman. 11 Ma demturug reb i chon e tabnaw rom nra yim’ u lan binaw mra longuy e pilis, ma demturug e arorad nra yim’ u daken e tafelfel’ mra longuy e arche’ ni vulture. I Gag SOMOL e gu be non.’"

12 Miki ul ul’ Ahijah ngay nge ga’ar ngak le’engin Jeroboam, "Mu sul nga tabnaw e chiney. Yug nap’an ni ga ra thum’ ngalan fachi binaw, me yim’ fare pagel ni fakam. 13 Urngin e girdi’ nu Israel e yad ra yornag miyad k’eyeg. Kemus ni ir u chon e tabnaw rok Jeroboam e yira chibgiliy ni bfel’ rogon, ya kemus ni ir e bm’agan’ SOMOL ni Got rok yu Israel ngak. 14 Me SOMOL e bayi tay reb e pilung nga Israel ni bayi thang e gagiyeg rok Jeroboam nge pifak. 15 Me SOMOL e bayi gechignag yu Israel, ma bayi rur yu Israel ni bod e uchel u mnalul’ ni be aw e ran ngay be rur. Bayi pug lik’ngin e girdi’ nu Israel u but’ ko re nam ney nib manigil nni pi’ ngak e pi ga’ rorad kakrom, ma bayi weregrad i yan nge pag e Lul’ ni Eufrates, ni bochan e kar k’aringed e damumuw ngak ko pi liyos nra ngongliyed ni ya’an fare got ni bpin ni Asherah. 16 Bayi digey SOMOL yu Israel ni bochan e ke denen Jeroboam ma ke waliy e girdi’ nu Israel nga fithik’ e denen."

17 Me sul le’engin Jeroboam nga Tirzah. Ma yug nap’an ni thum’ ngalan tafen, me yim’ fare tir. 18 Me mowawnag e girdi’ nu Israel fachi pagel miyad k’eyag, ni bod nike yog SOMOL u l’ugun e tapigpig rok, ni fare profet i Ahijah.

Yam’ ni tay Jeroboam

19 Urngin e yochi ban’en ni rin’ Jeroboam ni Pilung, ni pi mael ni i tay nge rogon ni i gagiyeg, e go’ kan yoloy ngalan e babyor ni Chepin e Pilung nu Israel. 20 I Jeroboam e i pilung ni rliw’ nge l’agruw e duw. Me yim’ min k’eyag, me Nadab nib mo’on ni fak e ir e mang pilung.

Rehoboam ni Pilung nu Judah

21 Me Rehoboam nib mo’on ni fak Solomon e aningeg i ragag nge ta’reb e duw yangren me mang pilung nu Judah, me gagiyeg u lan yu Jerusalem ni ragag nge medlip e duw, ni aram fare binaw ni mel’eg SOMOL u fithik’ e pi ganong nu Israel ni aram e gin ngu’un liyor ngak riy. Chitiningin Rehoboam e Naamah nu Ammon.

22 Ma girdi’ nu Judah e ra denengad nib togopluw ngak SOMOL ur rin’ed boch ban’en nge thum’ ngaru’ e tin i rin’ e pi chitamangirad kakrom, ngar k’arnged SOMOL ngari damumuw ngorad. 23 Ra ngongliyed tagil’ e tayfan ngak boch e got ni go’ bogi ban’en, miyad n’uf yugaf i malang nge bogi pow rok Asherah ni ngu’un tayfan u daken yochi burey ngu tanggin yuke gek’iy nib taglul’. 24 Ma n’en nth’abi kireb riy, e immoy e pumo’on nge ppin ni yad ma pi’rad ni nchuway’ ko yungi n’em ni tagil’ e tayfan ngak yug boch e got. Girdi’ nu Judah e ur rin’ed urngin e pin’en nib tamra’ ni i rin’ e girdi’ nike tulufrad SOMOL nga wuru’ fare nam nnap’an ni be yib yu Israel i yib nga langgin.

25 U lan e bin lal e duw nike gagiyeg Rehoboam me yib Shishak ni Pilung nu Egypt i m’ag e mael nga Jerusalem. 26 Me fek urngin e machaf u lan fare Tempel ngu lan fare naun ni tafen e pilung, nib mu’un fa yungi shield ngay ni gol ni ngongliy Solomon. 27 Me ngongliy Rehoboam yungi shield ni bronze nge tay nga luwan e tinem, me tay chiylen ngak e pi ga’ ko salthaw ni yad e ngar guyed ni dabi buch ban’en ko fapi garog ko fare naun rok e pilung. 28 Gubin yay nra yan fare pilung ko fare Tempel, me fek fapi girdi’en e matnag fa yungi shield ngar feked i yan ngemu’ miyad fulweg ko fare senggil ko matnag.

29 Gubin e tin ni rin’ Rehoboam ni Pilung e go’ kan yoloy ngalan Chepin e Pilung nu Judah. 30 Ma ka aram n’umngin nap’an ni i par Rehoboam nge Jeroboam ni dartal gow ko mael. 31 Me yim’ Rehoboam min k’eyag ngalan fapi low ko yam’ ni fen e pilung ni bay u lane Binaw rok David. Fithingan e chitiningin e Naamah nu Ammon, me Abijah nib mo’on ni fak Rehoboam e yan nga luwan nge pilung.