Isaías 8

Ba pagel ni fak Isaiah e mang pow ko girdi’

1 I SOMOL e ga’ar ngog, "Mu fek bangi n’en ni ba ga’ yang ni yima yol nga daken ngam yoloy e yol ni ba ga’ ngay ni be ga’ar: ‘Fek Chugom u Fithik’ e Yargal nib Machreg.’ 2 Mu fek l’agruw i pumo’on nra pagan’um ngorow, ni Uriah ni prist nge Zekariah ni Jeberekiah e chitamngin ni ngar mangew mich ko tin ngam yoloy."

3 Me ba ngiyal’ nga tomuren ma gamow par le’engig. Me diyen me gargel ni bochi pagel. Me ga’ar SOMOL ngog, "Mu tunguy fithingan ni ‘Fek Chugom u Fithik’ e Yargal nib Machreg.’ 4 Ra dawori yag ni nge pining e re tir nir e Nina’ nge Papa’ ma urngin e pi machaf nu Damaskus nge urngin e chugum nu Samaria e bayi fek e pilung nu Assyria u fithik’ e yargal."

Fare Emperor nu Assyria e be yib

5 Me non SOMOL ngog bayay 6 ni ga’ar, "Bochan e ke dabuy e girdi’ ko re nam ney e ran ko Lul’ nu Shiloah*8:6 LUL’ NU SHILOAH: Re lul’ ney e yib ko fare alublub ni ba ga’ ni bay u ba’ ni ngek yu Jerusalem. ni be yan nib sowath, ma yad be rus ngak fa gal pilung ni Rezin nge Pekah ma karanod ra m’aged e fager ngorow, 7 ma aram fan ni gag SOMOL e bay gu fek e emperor nu Assyria nge urngin e salthaw rok i yib ni ngar m’aged e mael nga Judah. Bay rabad ni bod e lul’ nu Eufrates ni sugbur nge tharey e binaw. 8 Bayi walguy daken yu Judah ni bod e lul’ ni bod tolngin lik’ipoy nike tharey urngin ban’en."

Got e bay rodad! Pon nike pithig e ke mang yoror ko nam.

9 Gimed e pi nam, mu’ulunggad nga ta’bang u fithik’ e marus! Gimed e pi nam nu fayleng ni gimed ba orel, mu telmed! Mu fal’eged rogomed ni ngam marod ko mael, machane ngam rusgad! Mu fal’eged rogomed, machane ngam rusgad! 10 Mu tanom niged rogon ni ngam gelgad, machane dabi fel’. Mu feked gubin e tin gimed ba’adag! Machane rib m’ayfan, ya Got e bay romad.

SOMOL ni ginaeng fare profet

11 U gelngin SOMOL nib gel e yog ngog ni dab gu lek fare wo’ ni be lek e girdi’. I ga’ar, 12 "Dab mu’un ko tin be puruy’nag e girdi’ ni ngar rin’ed ma dab mu rus ko pin’en ni yad be rus ngay.✝8:12 8:12, 13 1 Pe 3:14–15 13 Dab mpag talin ni Gag fare SOMOL ni Gubin ma Rayag Rok e gub thothup; kemus ni gag e ngam rus ngog. 14 Bochan e ri gu ba thothup ma aram fan ni gu bod ba malang ni nge tun ay e girdi’ ngay; gu bod ba wup ni bayi aw e girdi’ nu Judah ngu Israel ngay nge girdi’ nu Jerusalem.✝8:14 Rom 9:32–33; 1 Pe 2:8 15 Boor i yad e bayi tun ay ngar dol’gad. Bay ra dol’gad ngar masengsenggad. Bay ra pired ni kar awgad ko wup."

Ngan kol ayuw ni dab u ni fith lanyan’ e thagith

16 Pi gachalpeg e thingar ur ayuweged fapi thin ni Got e ke pi’ ngog. 17 I SOMOL e ke mith ko girdi’ rok, machane gu be par nib pagan’ug ngak me ir e ke lagan’ug ngak.✝8:17 Heb 2:13 18 Gu ba’aray nge pi bitir ni SOMOL e ke pi’ ngog. I SOMOL ni Gubin ma Rayag Rok ni bay tagil’ ko Burey ni Zion e ke l’oegmad ni nggu manged tamal’og rok nib fos ngak e girdi’ nu Israel.

19 Machane bayi yog e girdi’ ngomed ni ngam marod ngak e pi tamanbey nge pi sothiw nge tapong thagith ni yad ma sakathkath ma yad ma sononnon nga but’. Bayi lungurad, "Susun e nge de’eriy e girdi’ e pi kan nge pi thagith ko tin ngrogned ni fan ko girdi’."

20 Thingar mu fulweged ngorad ni nge lungumed, "Mu telmed ko machib rok SOMOL ngomed! Dab mu telmed ko thin ni be yog e pi sothiw — ya n’en ni yad ra weliy ngomed e dabi tay e gafgow u orel."

Ngal’an e gafgow

21 Girdi’ e bay uranod u lan e re nam ney nike mulan’rad ma karm’ad ko bilig. Ere bay ra damumuwgad ngu u rogned e thin nib kireb ngak e pilung rorad nge ngak e Got rorad. Yad ra sap ngalang, 22 ara ra lik’athgad nga but’ ma kemus ni gafgow nge rumug e yad ra guy, nib rumug nib gel e marus riy ni ir e yibe tulufrad nga fithik’.