JEREMIAH 16

Rogon ni tanmeg Got e yafos rok Jeremiah

1 Kubyay niki non SOMOL ngog ni ga’ar, 2 "Dab mmabgol fa mu fakay e bitir u bang ni aray rogon. 3 Bay gu weliy ngom ko mang e ra buch ko bitir niyi ra gargaleg u roy nge gal labthir rorad. 4 Yad ra yim’ ko m’ar ni ubchiya’, ma dariy be’ nra yor nagrad fa k’eyegrad. Dagur rorad e ra aw u but’ ni bod yu ulung i t’ay e gamanman. Ma yira li’rad u tan e mael fa ram’ad ko bilig, ma downgirad e bayi mang ggan ko arche’ nge gamanman ni malboch.

5 "Dab mman ngalan ba naun ni yibe mowaw riy. Ma dabi kireban’um ngak be’. Arme dab kug tow’athnag e girdi’ rog ko gapas fa gu dag e t’ufeg nge runguy ngorad. 6 Pi’in yo’or ban’en rorad nge pi’in dariy ban’en rorad e yad ra yim’ u daken e re but’ ney, machane dariy be’ nra k’eyagrad fa yor nagrad. Ma dariy be’ nra th’ab downgin fa puy piyan lolgen ni nge dag nike kirban’. 7 Dariy be’ nra’ un ngak be’ nike yim’ be’ nib t’uf rok ko abich fa garbad ni bochan e nge fal’eg lanyan fa’anem. Mus ngak be’ nike yim’ e chitamngin fa chitiningin ma dariy be’ nra dag e magfan’ rok ngak.

8 "Dab mu thum’ ngalan ba naun ni yibe mur riy. Dab mu sabal ngorad ngam un ngorad ko abich fa garbad. 9 Mmotoyil ko mang e nggu weliy, I Gag fare SOMOL ni Gubin ma Rayag Rok, ni fare Got nu Israel. Bay ggapaseg lungun e uf uf nge felfelan’ ko madnom ko mabgol. Girdi’ u roy e yad ra par ni yad bafos ngar guyed e ran’ey ni nge yodro’.

10 "Nap’an ni ga ra yog urngin e pin’ey ngorad, ma bay ra fithed gur ko mangfan ni nggu gechig nagrad ni ermirin. Ma kiyad ra fith ko mang e re oloboch nib buch e rorad riy fa mang denen e ka ra rin’ed nib togopluw ngak SOMOL ni Got rorad. 11 Ma aram e ngamog ngorad ni SOMOL e ke ga’ar, ‘Pi chitamangimed e ra pi’ed keru’rad ngog ng’ur ted fan ma yad be pigpig nga yug boch e got. Ra n’iged gag ni da ku ra folgad ko tin gu machib nag. 12 Machane kireb ni ka mu rin’ed e ke thum’ ngaru’ ko tin i rin’ e pi chitamangimed. Gimed gubin nib gelan’med ma ba kireb e leam romed, ma damur folgad rog. 13 Ere aram e bay gon’med nga wuru’ ere binaw ney nga daken reb e but’ ndariy bigmed ara pi chitamangimed ni manang murung’agen. Nu rom e bay um tedfan boch e got riy ni rran nge nnep, me gag dab ku gu dag e runguy rog ngomed.’"

Pi’in kalbus nra sulod

14 I ga’ar SOMOL, "Bayi taw nga bangiyal’ dabki mow e girdi’ nga fithingag ni gag fare Got nma par nib fos ni gag e gu chuweg e girdi’ nu Israel u lan yu Egypt. 15 N’en ni bay rin’ed, e bay ur mow gad nga fithingag ni fare Got nib fos ni fek e girdi nu Israel nga wuru’ ba nam ko lel’och nge nga wuru’ gubin e nam ni gu werweregrad riy. Bay gu fulwegrad ko nam rorad, ni fare binaw ni gu pi’ ko pi chitamangirad. I gag SOMOL e gu be non."

Ba gechig ni bayib

16 SOMOL e ga’ar, "Ku gu mol’og ni nge yib e pi tafita’ ni yad ba yo’or ni ngar koled e pi girdi’ ney. Ma bay gu l’oeg girdi’en e mun gamanman ni yad ba yo’or ngar gawegedyad ngan kolrad u daken gubin e pi burey nge yochi burey nge lan e yiy ngu fithik’ e war. 17 Urngin ban’en ni yad be rin’ ma gu be guy. Ya dariy ban’en nib mith u p’eowcheg; denen rorad e de ling u p’eowcheg. 18 Bay gu ruw yay nag taban e denen rorad ni nge aw ngorad nge farad kireb, ni bochan e ka ra ta’ay niged e nam rog ko pi liyos ni dariy e yafos riy ni bod e yam’, ni ka ra sugyed ko pi got rorad ni go’ bogi ban’en."

Meybil rok Jeremiah nib pagan’ ngak SOMOL

19 SOMOL gur e cha’ ni gama yoror rog ma gama pi’ gelngig; gama aywegneg u fithik’ e gafgow. Pi nam e bay rabad ngom u gubin yang u fayleng ngar ga’ar gad, "Pi chitamangimad e dariy ban’en rorad machane got ni go’ bogi ban’en e bay, ni bogi liyos nib m’ay fan. 20 Rayag ko girdi’ ni ngar ngongliyed e pi got rorad? Dabiyag, ma fa’anra yag, ma aram e got ni go’ bogi ban’en."

21 Me ga’ar SOMOL, "Ri aram e bay gu gagiyegnag e pi nam ngar nanged gelngig nge fanag gel; miyad nang ni gag SOMOL."