JEREMIAH 52

Jerusalem ni waer

1 Zedekiah e rliw’ nge ta’reb e duw rok me pilung u Judah, me par u Jerusalem ngi i gagiyeg ni ragag nge ta’reb e duw. Ma fithingan e chitiningin e Hamutal, ni be’ ni bpin ni fak fa binem e Jeremiah ni i par u lan e binaw nu Libnah. 2 Mi Zedekiah ni Pilung e i denen nib togopluw ngak SOMOL, ni bod ni i rin’ Jehoyakim ni Pilung. 3 I SOMOL e ri damumuw ngak piyu Jerusalem ngu Judah, me tharbegrad ngar chuwgad u p’eowchen.

Zedekiah e togopluw ngak Nebukadnezzar ni Pilung nu Babylon, 4 ma aram me yib Nebukadnezzar nge fa raba’ i salthaw rok ngar cham gad nga Jerusalem ko rofen ni ragag ko pul ni ragag ko bin mereb e duw nap’an nike gagiyeg Zedekiah. Miyad n’uf e pi tent rorad u wuru’ e re binaw nem, miyad ngongliy e yoror ni nge aywegrad ko mael nge liyeg fare binaw. 5 Me par fare binaw ni kanin’ nga longob nge mada’ ko re duw ni gaman e ragag nge ta’reb e duw ngay ni pilung Zedekiah. 6 Rofen ni gaman e mereb ngay ko pul ni aningeg ko re duw i n’em, me gel e uyongol u lan fare binaw ndakuriy ban’en ni nge kay e girdi’, 7 mi ni kuruf bang ko rungrung ko re binaw nem. Yug aram rogon nike yin’ yu Babylon fare binaw nga longob, me mil oren fapi salthaw nnep’. Ra milgad u bang ni ba chugur ko kanawo’ ni yan ko milay’ rok e en pilung, ngranod riy nga barba’ fare garog ni bay u thilin fa gal rungrung, miyad mil i yan ko loway nu Jordan. 8 Machane me lol’oeg e salthaw nu Babylon Zedekiah ni Pilung ngar koled u daken e tafel’fel’ nib chugur nga Jeriko. Ma urngin fapi salthaw rok nra milgad ngar paged. 9 Tomuren ni ka ni kol Zedekiah kan tay ni reb e kalbus, mi ni fek i yan ngak Nebukadnezzar ni Pilung ni bay u lan e binaw nu Riblah ko nug nu Hamath, me turguy Nebukadnezzar u rom e gechig ni ngan tay ngak. 10 U Riblah e yog e pilung nu Babylon riy ni ngan li’ e pi pumo’on ni fak Zedekiah ngarm’ad, u p’eowchen Zedekiah. Miki yog ni ngan li’ e pi tolang nu Judah ngarm’ad. 11 Me yog ni ngan luf lan mit Zedekiah, mi nin’ e chen ngak nga ni fek nga Babylon. Me par Zedekiah u lan e kalbus u Babylon nge mada’ ko rofen ni yim’.

Fare Tempel nni kirebnag

12 Chirofen ni gaman e ragag ngay ko bin lal e pul ko ragag nge mereb e duw nike pilung Nebukadnezzar u Babylon, e yan Nebuzaradan nga Jerusalem ni be’ ni yow ma puruy’ Nebukadnezzar ni Pilung, ma ku ir e pilung ko salthaw rok Nebukadnezzar. 13 Me urfiy fare Tempel, nge tafen e pilung, nge pi naun rok urngin e pi tolang u Jerusalem; 14 me buthug e salthaw rok e yoror ko re binaw nem. 15 Me fek Nebuzaradan e girdi’ nni pagrad u lan e re binaw nem nga Babylon, nge tin ni magach e girdi’ ni yad ba salap ko maruwel, nge pi’in n’agrad nga pa’ e pi Babylonian. 16 Me pag u Judah boch e pi’in nth’abi gafgow, ndariy e binaw ni taferad ngar pired u rom ngu’ur maruwelgad u fithik’ yungi woldug ni grape nge lan e pi flang.

17 Me t’ar e girdi’ nu Babylon fapi duga’ ni bronze nge ay e pin’en ni bay u Tempel, nge fare teng ko ran nni ngongliy ko bronze, miyad fek urngin fapi wasey ni bronze nga Babylon. 18 Mu ku yad fek fapi sebel ni yima klinnag e altar ngay nge fapi tafen e awat, nge pi talin e maruwel ni fan ko magal, nge yu raba’ i dabiy ni yima tay nge map’ racha’en e gamanman ni maligach ngalan, nge fa yu raba’ i dabiy ni yima urfiy e incense u langgin, nge urngin e pin’en nni ngongliy ko wasey ni bronze ni yima maruwel ngay u Tempel. 19 Miyad fek urngin e pin’en nni ngongliy ko gol ara silber: ni yu raba’ i dabiy nib achig, nge yu raba’ i ban’en ni yima fek e achaffin u langgin ni be yik’, nge yu raba’ i dabiy ni yima tay nge map’ racha’en e gamanman ni maligach ngay, nge tafen e awat, nge yu ley i tagil’ e magal, nge fa yu raba’ i dabiy ni yima urfiy e incense u langgin, nge yu raba’ i dabiy ni yima pu’og e wayin nga langgin nga ni pi’ ni maligach. 20 Ma pin’en nni ngongliy ko bronze, ni Solomon ni Pilung e yog ni nga ni ngongliy ni fan ko Tempel, ni aram fa gali duga’, nge ay e pin’en ni bay u Tempel, nge fare teng ko ran nib ga’, nge fa ragag nge l’agruw i garbaw ni ir e ke gif fare teng nga daken ya ke pag feni tomal ndabiyag i thabthabelnag. 21,22 Fa gali duga’ e ta’reb rogon ya’an, ra reb ma rliw’nge medlip e fit tolngin, ma ragag nge meruk e fit ga’ngin lukngun. Bay faran, ma wasey riy e dalip e inch dib’agin. Mu daken p’ebugul e gal duga’ nem e bay bang riy nni ngongliy ko bronze ni medlip nge baley e fit tolngin, ma downgin e ka ni yoloy bogi ban’en ngay ni ka ni kurkuruf ni bay ya’an e pomegranate riy, ni wom’ngin mmit e gek’iy, ni urngin nni ngongliy ko bronze. 23 Ma fa yungi n’en ni ka ni kurkuruf u daken ba ley fa gal duga’ e ra’ay ya’an wom’ngin e gek’iy ni pomegranate ni bay riy, me mereb i ragag nge nel’ riy e yira par u but’ ma yira guy.

Piyu Israel nni fekrad nga Babylon

24 Nebuzaradan, ni pilungen e salthaw e ki fek Serayah ni fare Prist ni Th’abi Ga’, nge Zefaniah, ni fare prist ni ir e mmigid ngak, nge ku dalip i tolang u Tempel ngar kalbusgad. 25 Me fek be’ nib mo’on u lan e re binaw nem ni ir pilungen e salthaw, nge medlip i pumo’on ni yad ma puruy’ e en ni pilung ni ka yad bay u lan e re binaw nem, nge en nma ayuweg e en ni pilungen e salthaw, ni ir e mmil suwon babyoren e maruwel ko salthaw ngak nge nel’ i ragag i pumo’on ni tolang. 26 Me fekrad Nebuzaradan ngak e en ni pilung nu Babylon, ni bay u lan e binaw nu Riblah. 27 Mu rom u Riblah ko nug nu Hamath e yog e pilung nu Babylon riy ni nga ni toyrad nge mu’ min li’rad ngarm’ad.

Ara’ rogon nni fek e girdi’ nu Judah ni kar manged kalbus ngan chuwegrad ko nam rorad. 28 Ba’aray babyoren e girdi’ ni fekrad Nebukadnezzar ni aram e kar kalbusgad: re medlip i duw ni ba’aram ni par ni ir e pilung e fek 3,023 e girdi’; 29 ma fa’ani taw ko ragag nge meruk e duw nike pilung me fek 832 e girdi’ nge chuwegrad u Jerusalem; 30 me taw ko rliw’ nge dalip e duw nike pilung me fek Nebuzaradan 745 e girdi’. Oren u gubin e 4,600 e girdi’ ni chuwegrad ko nam rorad.

31 Re duw i n’en ni pilung Evil-merodak nu Babylon e runguy Jehoyakin ni Pilung nu Judah, nge chuweg u kalbus. I rin’ ni ara’ rogon ko rofen ni rliw nge lal ko re pul i n’en ni ragag nge l’agruw ko fare guyey nge medlip e duw u n’umngin nap’an nike kalbus Jehoyakin ni Pilung nu Judah u Babylon. 32 I ayuweg Evil-merodak Jehoyakin ni bfel’ me tay nga reb e liw ni ba ga’ ngak yugu boch e pilung ni yad Jehoyakin ni ur kalbusgad u Babylon. 33 Ma aram mi ni pag Jehoyakin nge chuweg madan e kalbus u daken mi i un ngak e en ni pilung ko abich u tebel u n’umngin nap’an e yafos rok. 34 Ma yu rran u n’umngin nap’an e yafos rok ni un pi’ ngak e tin ni nge yag ngak.