JEREMIAH 2

Feni ma t’ufeg Got yu Israel

1 I yog SOMOL ngog 2 ni nggu wan nggu weliy e thin rok ngak urngin e girdi’ nu Jerusalem ni nge lungug:

"Ku gu manang fanam yul’yul’ ko fa ngiyal’nem ni ka ga ba rugod,

nge rogon fanag t’uf rom ko fa ngiyal’ ni ba’aram ni ka fin da mabgolgow;

um lekeg u daken e ted ni desert,

ngu daken e but’ ni dawor ni wolduguy bi’id.

3 Israel, kemus ni gag e mmil suwom ngog,

I gur e ga ba thothup nib milfam ngog.

Gu pi e gafgow nge riya’,

nga daken gubin e pi’in u ra gafgow niged gur.

I Gag SOMOL e kugog e pi thin ney."

Denen rok pi chitamngin piyu Israel kakrom

4 Gimed e pi’in owchen Jakob, ni gimed e pi ganong nu Israel, mmotoyilgad ko thin nike yog SOMOL. 5 Be ga’ar SOMOL:

"Be mang e ren’en nib kireb ni pir’eg e pi chitamangimed rog,

nike gagiyeg nagrad ka ra pi’ed keru’rad ngog?

Ur meybilgad ngak bogi liyos nib m’ay fan

mranod ra pired nike m’ayfarad.

6 I m’ay fag u wun’rad,

ni yugu aram rogon ni gu chuwegrad u tan pa’ yu Egypt

nggu pow’iyrad i yan u daken e ted,

u lan ba nam nib sug yungi desert riy nge bogi low,

nib fengfeng ma ba sug ko maad’ad

ndariy be’ nma par riy,

ma der milekag be’ riy.

7 Mu gu fekrad i yib nga ba nam nib yong’ol e but’ riy;

ni ngar felan’gad ko woldug riy nge tin ni bfel’ ban’en ni bay riy.

Machane fa’an rabad miyad kirebnag e nam rog;

ya ka ra sonogor niged fare nam ni gu pi’ ngorad.

8 Pi prist e dar fithed ni nge lungurad, ‘Bu uw SOMOL?’

Pi prist rog e dar nanged gag.

Ma pi’in ma gagiyeg e kar togopluwgad ngog;

ma pi profet e ur welthingad u fithingan Baal

mu ur ted fan bogi liyos nib m’ay fan."

N’en ni bay u wan’ SOMOL nib togopluw ngak e tirok e girdi’

9 "Ere Gag SOMOL e bay gog bayay e tin gu be togopluwnag ngak e girdi’ rog.

Bay gu fek i yib e pin’en ni nggu togopluwnag ngak e pi’in owcharad.

10 Mmarod ko ngal ko fare donguch nu Cyprus ngam guyed;

mpi’ed e girdi’ ngranod ko ngek nga Kedar ngar fal’eged i yaliy:

gur bay ban’en ni ara’ rogon ni ka’a yib i m’ug kafaram?

11 Dariy yug reb e nam ni ka’a thilyeg e pi got rok,

ni yug aram rogon ni gathi bogi got nib riyul’,

machane girdi’ rog e ka ra thiliyeged gag

nga yug boch e got ni dariy ban’en nrayag ni ngar rin’ed ngorad

ni yug aram rogon ni gag fare Got ni gu tay farad.

12 Ere gag e ku gu non nga lanelang ni nge rur ko marus nib gel,

me gin nge balyangan’,

13 girdi’ rog e ke ngongliy l’agruw i denen:

ka ra pi’ed keru’rad ngog,

ni gag fare alublub nib machalbog e ran riy;

ma ka ra kired boch e low,

ni low nike yaba’al yu yang riy ndabiyag ni nge mit e ran riy."

Piyu Israel ndakur yul’yul’gad ngak Got nge wenegan ni yib

14 "I Israel e gathi ba sib;

ya da ni gargelnag nib sib.

Ere pi to’ogor rok e mangfan ni yad be gay ni ngar li’ed?

15 Ka ra tolulgad ngak ni bod bogi layon;

ka ra ted fare nam rok nike daken e ted ni desert,

pi yochi binaw rok e ka ni kirebnag ma dakuriy be’ ni be par riy.

16 Pumo’on nu Memfis ngu Tahpanhes

e ka ra biliged e lo’ u lolugen.

17 Israel, i gur e kam girengiy e biney e pa’ nga dakenam!

Ya mu pi’ keru’um ngog, I Gag SOMOL ni Got rom,

fa ngiyal’ ni gu be pow’iyem i yan u daken e kanawo’.

18 Mang e ga be finey ni ngam man nga Egypt nge yag ngom?

Ga be finey ni ngam unum e ran ko lul’ ni Nile?

Mang e ga be finey ni ngam man nga Assyria nge yag ngom?

Ga be finey ni ngam unum e ran ko lul’ ni Eufrates?

19 Kireb rom e bayi gechig nigem,

ma rogon ni ka mu pi’ keru’um ngog e bayi turguy e gechig rom.

Bay mu nang rogon feni gel e mo’oy nge kireb riy

ni ngan pi’ keru’uy ngog, fare SOMOL ni Got rom,

min par ndakunir yul’yul’ ngog.

I Gag fare SOMOL ni Th’abi Tolang ma Gubin ma Rayag Rok, e kugog e pi thin ney."

Israel ni siyeg ni nge liyor ngak SOMOL

20 I SOMOL ni Th abi Tolang e ga’ar,

"Israel, ka ba kakrom ni mu n’ag e thin rog;

ma ga siyeg ni ngam folwok rog ara mu liyor ngog.

U daken urngin e burey nib tolang

ngu tan urngin e yu ke gek’iy

e u mu tay fan riy bogi got ko yong’ol.

21 Gu yungem ni bod rogon ba ke grape nib mal’eag,

ni yib ko bin th’abi fel’ e awoch.

Machane a mu sap ko n’en ni ka mu rin’.

Gur e kambod ba kenggin ba ke grapes nike wod ni dabki fel’.

22 Ni mus ni ga ra maluk ko sop nib gel,

ma kug be guy e alit u dowam, ni alit ko kireb rom.

23 Ra di’in ma gog ndawor mu alit nigem,

ni dariy bi’id ni kam tayfan Baal?

Mu sap nga rogon ni kam denen u lan e loway;

a mu sap ko n’en ni ka mu rin’.

Ga bod ba kamel ni malboch nike puw e darngal rok,

ni dariy gufan ni be burtel,

24 i yan ngalan e desert.

Nap’an nra puw e darngal rok fare dongki ni bpin, me mini’ e rayag ni taleg?

Dariy reb nib pumo’on nra finey ni nge gafgow ko mogow,

ya mmom rok ni nge pir’eg.

25 Israel, mu ayuw, ya ri par e rifrif u em ndakuriy e sus riy,

fa mlik’ k’angam

ni bochan e ga be lol’oeg yug boch e got.

Ma ga be ga’ar, ‘Danga’! Dabkiyag ni nggu sul!

Kafram i yib nib t’uf e pi got nu bang rog

ma nggu lekrad.’"

Israel e bay tapgin ni nga ni gechignag

26 "Bod rogon ba moro’ro’ ni yira kol’, ere gimed e girdi’ nu Israel e bay mu tamra’gad; ni gimed gubin, ni pilung romed nge pi tolang romed, nge pi prist romed nge pi profet. 27 Bay mu tamra’gad ni gimed gubin e pi’in bayi n’en me lungumed ngak ba ke gek’iy, ‘I gur e chitamag,’ ara lungumed ngak ba war, ‘I gur e chitinag.’ Bayi yodoroy ni bochan e ka mu pi’ed keru’med ngog, ma da mpig i chealgad ngam sapgad ngog. Machane fa’an bay mu gafgowgad, mi gimed wenig ngog ni nggu ayuwegmed.

28 "Bu uw fapi got ni mu ngongliyed ni fan ngomed? Fa’an bay mu gafgowgad, me ere mu nonod ngorad ngar ayuweged gimed — ni fa’an gomang e rayag rorad. Judah, pire’ e got rom ni bod feni yo’or e binaw ni bay rom. 29 Mang e gimed be gun’gun’nag? Mangfan ni gimed be togopluw ngog? 30 Ggechig nagmed, ma da mu lowgad; ya dabumed ni ngam pagedgag nggu yal’uwegmed. Ni gimed bod e gamanman ni layon nike damumuw be burtel, ngu’um thanged e pogofan rok e pi profet romed. 31 Gimed e girdi’ nu Israel, mu telmed ko mang e gu be yog. Gur ka’a gu bod bangi desert ngomed, ara ba nam nib lumor ma ba yo’or e maad’ad riy? Ere mangfan ni gimed be yog ni ngu’um rin’ed e n’en ni gimed ba’adag, ma gimed e dab ku mu sulod ngog? 32 Gur rayag rok be’ ni bpin ni kab rugod ni nge pag talin e churwa’ rok nib tolang puluwon, ara pag be’ ni bpin ni nge mabgol talin e mad rok ko m’agpa’? Machane girdi’ rog e ka ra paged talig nike yo’or i yo’or e rran ndabiyag i the’eg. 33 Ri ga manang rogon i t’ar liyben e pi’in ga ba’adag. Mus ngak e tin th’abi kireb e ppin ma ku yad ra fil ban’en rom. 34 Mad rom e ke mada’ e racha’en e pi’in gafgow nge pi’in ndawor ra bucheged ban’en riy, ma gathi racha’en e girdi’ nma sabthiy e naun.

"Yugu ara’ rogon e pin’ey ni gubin, 35 machane be lungum, ‘Dawor gu bucheg ban’en; mmudugil ni gathi ka be damumuw SOMOL ngog.’ Machane Gag SOMOL e bay gu gechig nigem ni bochan e ke lungum e dawor mu denen. 36 Kam mom nigem ko pi got u boch e nam. Bayi kirebnag piyu Egypt lanin’um, ni bod ni rin’ yu Assyria ngom. 37 Bay kum pi’ keru’um ngak piyu Egypt, ni ka mup’ owchem nga but’ ni fan e kam tamra’. I Gag, SOMOL e kug n’ag e pi’in ke pagan’um ngorad; ere dariy ban’en nra fel’ rogom riy u puluwrad."