JEREMIAH 46

Egypt ni waer u Karkemish

1 I non SOMOL ngog u murung’agen e pi nam, 2 ni tabab u Egypt. Irera’ e n’en ni yog ni murung’agen e salthaw rok Neko ni Pilung nu Egypt, ni ba’aram ni gel Nebukadnezzar ni Pilung nu Babylon ngorad u Karkemish u che ren fare lul’ ni Eufrates u lan e bin aninged e duw nike pilung Jehoyakim u Judah:

3 "I tolul e pi tolang ko salthaw nu Egypt ni be lungrad,

‘Falfal’eged rogon e shield romed

ngam marod i yan ko mael!

4 Mu flaged gafan e os romed mi gimed af nga daken!

Mu k’afgad mi gimed tay e urwach romed nga lolugenmed!

Mu uthumed e sarey romed!

Mun’ed fare madan e salthaw ni wasay nga dakenmed!’"

5 SOMOL e fithrad ni ga’ar, "Mang e gu be guy?

Miyad sul nga tomur u fithik’ e marus.

Pi salthaw rorad e yibe pi’ i yan nga tomur;

nike li’rad e marus, yad be mil ni kari mus macharnginrad

ni darir sapgad nga tomur.

6 Pi’in kemus payingrad ko mil e dariy e gin yad ra yan ngay;

fapi salthaw e dab kiyag e mil rorad.

U lan lel’och u charen e lul’ nu Eufrates,

me tun ayrad ngar dol’gad.

7 Mini’ e cha’ney ni be yib ngalang ni bod e Nile,

ni bod e lul’ nike sugbur?

8 Irera’ yu Egypt, ni be yib ngalang ni bod e Nile,

ni bod e lul’ nike sugbur.

Egypt e ga’ar, ‘Bay gub ngalang nggu tharay e fayleng;

bay ggathay e pi binaw nge girdi’ nma par riy.

9 Mu non ko pi’ os rom ni ngranod

nge pi chariot ngar mithmithgad!

Mu pi’ e salthaw rom ngranod:

ni pumo’on nu Ethiopia ngu Libya, ni ngar feked e shield rorad

nge pumo’on nu Lydia ni cheag ko mun gat’ing.’"

10 Irera’ e rran rok SOMOL ni Th’abi Tolang ma Gubin ma Rayag Rok:

daba’ e nge fulweg taban e kireb;

daba’ e nge gechignag e pi to’ogor rok.

Saydon rok e nge longuyrad nge taw ko ngiyal’ nike fos,

me unum e racha’ rorad nge taw ko ngiyal’ nike chum’er.

Daba’ e En Gubin ma Rayag Rok e nge pi’ ni maligach gubin e pi’in ke gel ngorad

u lan e lel’och u charen e lul’ ni Eufrates.

11 Gimed e girdi’ nu Egypt, marod nga Gilead

ngam gayed e falay!

Gubin e falay romed ni keyib i m’ug ni dariy angin;

dariy ban’en nrayag ni nge gol nagem.

12 Ke rung’ag e pi nam e tamra’ ni kam ted;

ke rung’ag gubin e girdi’ e meyor romed.

Be paraw reb e salthaw rom nga daken reb,

kar aw gow nga but’ ni yow l’agruw.

Wub ni tay Nebukadnezzar

13 Nap’an ni yib pilung Nebukadnezzar nu Babylon ni nge cham nga Egypt, me non SOMOL ngog ni ga’ar,

14 "Mu weliy u lan e yochi binaw nu Egypt,

ngu lan yu Migdol, ngu Memfis, ngu Tahpanhes:

‘Mu fal’eged rogomed ngam ayuwegned gimed;

ya gubin e tiromed ban’en ni bay ni gathay u fithik’ e mael!

15 Ke di’in fare got romed nib gel gelngin i Apis nike thay pa’?

I SOMOL e ke pirdi’iy nga but’!’

16 Pi salthaw romed e ke tun ayrad ka ra awgad nga but’;

ra bagyad me be ga’ar ngak bagyad,

‘Mu gur nagem! Darod nga tabnaw ngak e girdi’ rodad

ma gadad mil ko saydon ko pi to’ogor rodad!’

17 "Mu pi’ reb e ngachal nib be’ech ngak fare pilung nu Egypt —

‘Ma Tay E Thin Rok NgaLang Me Chuw U Tanggin.’

18 I Gag fare SOMOL ni Gubin ma Rayag Rok, e gub pilung.

I Gag fare Got nib fos.

Bod rogon e Burey ni Tabor nib tolang ko pi burey

nge fare Burey ni Karmel nib sak’iy ngalang u daken e day,

e aram feni gel e cha’ nra cham ngomed.

19 Ngam fal’egned rogomed ni ngan fekmed ni kalbus,

gimed e girdi’ nu Egypt!

Memfis e bayi par nike daken e ted,

nike kireb ni dakriy be’ nma par riy.

20 Yu Egypt e bod ba garbaw ni bfel’usun,

nike m’ud e lal nu lel’och ngak yad be k’ad.

21 Ni mus ko pi salthaw ni yad ma maruwel rok

nike m’ay gelingrad ni bod e garbaw ni kab bitir.

De yag nra sak’iy gad ngar cham gad.

Miyad cheal ni yad gubin ngar milgad.

Ke taw nga t’olrad,

ni aram e ngilan’ e riya’ ni nge aw ngorad.

22 Egypt e mil nge chuw, ni be yan laman ni bod ba parchoyog,

ko ngiyal nike m’ug e pi salthaw ni to’ogor.

Ra chamgad ngak ko tow,

ni bod e girdi’ ni be dumow gek’iy nga but’

23 ngar gathayed e loway nib dub’ag e gek’iy riy.

Pi salthaw rorad e kaygi yo’or ni dabyag i the’eg;

ke pag urungrad ko asamn’ing

24 Girdi’ nu Egypt e kan tamra’ nagrad;

ya ke kolrad e girdi’ ko lel’och.

I Gag SOMOL e kugog e pi thin ney."

25 I SOMOL ni Gubin ma Rayag Rok, ni fare Got rok yu Israel e be ga’ar, "Nggu wan nggu gechignag Amon, ni fare got nu Thebes, nib mu’un yu Egypt nge pi got nge pi pilung riy ngay. Nggu wan gu fek e pilung nu Egypt nge gubin e pi’in kar ted e pagan’ rorad nga daken, 26 nggu pi’rad nga pa’ e pi’in yad ba’adag ni ngar thanged e pogofan rorad, ni aram i Nebukadnezzar ni Pilung nu Babylon nge fa raba’ i salthaw rok. Machane ra munmun ma ku ra yan i par e girdi’ nga Egypt bayay, ni bod kafram. I Gag SOMOL e kugog e pi thin ney.

Bayi ayuweg SOMOL e girdi’ rok

27 "Girdi’ rog, dab mu tamdag gad,

girdi’ nu Israel, dab mu rusgad.

Bay gu chuwegmed ko fare nam nib orel,

ni aram fare nam ni um kalbusgad riy.

Bay mu sulod nga tafenmed ngam pired u fithik’ e gapas;

dabki buch ban’en romed, ma dakriy be’ ni re k’ar dugow ngomed.

28 Bay gub ngomed nggu ayuwegmed.

Bay gu thirif gubin e nam u but’

ko yungi n’en ni gu weregmed riy i yan,

machane dab gu thang owchamed.

Ma dab gu pagmed ngam marod ni dab ni gechig nagmed;

machane gu ra gechig nagmed, mab mat’aw rogon ni gu ra rin’.

I Gag SOMOL e kugog e pi thin ney."