Arca da aliança
A Arca da Aliança era o símbolo mais sagrado de Israel — representava a presença de Deus no meio do seu povo. Sobre ela brilhava a glória do Senhor entre os querubins.
लोका खे एड़ा बोलो कि बबूल नाओं रे डाल़ो रिया लकड़िया रा एक सन्दूक बणाया, तिजी री लम्बाई टाई आथ, चौड़ाई डेढ़ आथ ओर ऊचाई डेढी आथो री थी। ओर तिदे पीतरा-बारा ते शुद्ध सूईने री परत चढ़ाणी ओर सन्दूको पाँदे चऊँ कनारेया ते सूईने री पट्टी लगाणी। ओर तैं तिजी रे चऊँ पावेया पाँदे सूईने रे चार कड़े बणवाई की दो कड़े एकी कनारे ओर दो कड़े दूजे कनारे लगाणे। तेबे बबूलो रिया लकड़िया रे डण्डे बनवाणे ओर सेयो बी सूईने साथे मढ़ने। ओर डण्डे सन्दूको रे दुँईं कनारेया रे कड़ेया रे पाणे ताकि तिना रे साअरे साथे सन्दूक चकेया जाओ। सेयो डण्डे सन्दूको रे कड़ेया रे लगे रे रओ ओर तिजी ते लग नि करने। फेर जो आज्ञा रिया पात्थरो रिया तख़्तिया मां ताखे देणियां से तिजी ई गवाईया रे सन्दूको दे राखणिया।
फेर शुद्ध सूईने रा एक दया रा आसण बनाणा तिजी री लम्बाई टाई आथ ओर चौड़ाई डेढ़ आथ ओ। ओर सूईना कअड़ी की दो करूब बणाई की दया रे आसणो रे दुँईं कनारेया रे लगाणे। एक करूब एकी कनारे पाँदे ओर दूजा करूब दूजे कनारे पाँदे लगाणा मतलब एकी ई टुकड़ेया ते तिना करूबा खे दया रे आसणो रे दुँईं कनारेया पाँदे लगवाई की बनाणा। ओर तिना करूबा रे पंख पाँदा ते एड़े फैले रे बणो कि दया रा आसण तिना साथे टखेया रा रओ ओर तिना रे मूँ आमणे-सामणे ओर दया रे आसणो रे कनारो खे रओ ओर दया रा आसण सन्दूको पाँदे लगाणा ओर जो आज्ञा रिया पात्थरो रिया तख़्तिया मां ताखे देणियां से गवाईया रे सन्दूको रे पीतरे राखणिया।
ओर मां तेस पाँदे रई की ताखे मिलेया करना ओर इस्राएलिया खे जितणी आज्ञा मां ताखे देणियां ऊगिया तिना सबी रे बारे दे मां दया रे आसणो पाँदे ओर तिना करूबा बीचा ते जो आज्ञा रिया पात्थरो रिया तख़्तिया रे गवाईया रे सन्दूको पाँदे ऊणे, तां साथे गल्ला करेया करूँगा।
तेबे बसलेल ओर तेस साथे काम करने वाल़ेया बबूलो री लकड़िया रा एक सन्दूक बणाया, तिजी री लम्बाई टाई आथ, चौड़ाई डेढ़ आथ ओर ऊचाई डेढी आथो री थी।
तेबे यहोवे मूसे खे बोलेया, "नए सालो रे पईले मीन्ने रे पईले दिने तैं मिलणे वाल़ा तम्बू खड़ा करी देणा। तिदे वाचा रा सन्दूक राखी की बीचले पड़दे पीछे राखी देणा।
मूसे गवाईया री चिट्ठी लई की वाचा रे सन्दूको रे राखिया ओर सन्दूको रे डण्डे लगाई की तिजी पाँदे दया आसण राखी ता; फेर तेबे मूसे वाचा रा सन्दूक मिलणे वाल़े तम्बूए रे पऊँचाया ओर बीचला पड़दा लटकवाई की गवाईया रा सन्दूक तेतेरे पीतरे राखेया, जिंयाँ यहोवे मूसे खे आज्ञा दित्ती थी।
ओर जेबे मूसा यहोवे ते गल्ला करने खे मिलणे वाल़े तम्बूए दे गया, तेबे तिने दया रे आसणो पाँदा ते, जो गवाईया री चिट्ठिया रे सन्दूको पाँदे था, दुँईं करूबो बीचा ते तेसरी आवाज सुणी जो तेस साथे गल्ला करने लगी रा था; ईंयाँ यहोवा तेसते गल्ला करो था।
तेबे इस्राएलिए यहोवे रे पाह्ड़ो पाँदा ते निकल़ी की तिऊँ दिना रा सफर कित्तेया ओर तिना तिऊँ दिना री बाटा रे यहोवे री वाचा रा सन्दूक तिना खे रामो री जगा टोल़दा ऊआ तिना रे आगे-आगे चलदा रया। जेबे से डेरे री जगा छाडी की तेथा ते चलो थे तेबे हर रोज यहोवे रा बादल़ तिना पाँदे छांए करदा रओ था। ओर जेबे-जेबे लोक वाचा रा सन्दूक लई की चलो थे तेबे-तेबे मूसा ये बोलेया करो था,
"ओ यहोवा उठ ओर तेरे दुश्मण चऊँ कनारे बिखरी जाओ
ओर तेरे बैरी तेरे सामणे ते नठी जाओ।"
ओर जेबे-जेबे से रूकी जाओ था तेबे-तेबे मूसा बोलेया करो था,
"ओ यहोवा, ह्जारो-ह्जार इस्राएलिया गे
वापस आईजा।"
तेबे यहोवे मूसे खे बोलेया, "इस्राएलिया ते गल्ला करी की तिना रे बुजुर्गा रे कराने रे मुताबिक, तिना रे सबी परदाना गे ते एक-एक गोत्रो री एक-एक छाटी लई लो ओर तिना 12 छाटिया बीचा ते एकी-एकी पाँदे एकी-एकी रे मुखिया रा नाओं लिख, ओर लेविया री छाटिया पाँदे हारूणो रा नाओं लिखणा। कऊँकि इस्राएलिया रे बुजुर्गा रे कराने रे एकी-एकी मुखिया री एक-एक छाटी ऊणी। ओर तिना छाटिया खे मिलणे वाल़े तम्बूए रे वाचा रे सन्दूको रे आगे, जेती आँऊ तुसा खे मिलेया करूँआ, तेती राखी दे। ओर जो मर्द मां चुणना तेसरी छाटिया रे कलिया निकल़निया ओर इस्राएली लोका रा तुसा पाँदे बड़बड़ाणा मां दूर करी देणा।"
तेबे मूसे इस्राएलिया ते यो गल्ला कित्तिया ओर तिना रे सबी परदाने आपू-आपू खे, आपणे-आपणे बुजुर्गा रे कराने रे मुताबिक, एक-एक छाटी मूसे खे दित्ती ओर से 12 छाटिया ऊईया ओर तिना छाटिया रे हारूणो री बी एक छाटी थी। सेयो छाटिया मूसे वाचा रे सन्दूको रे सामणे तम्बूए रे यहोवे रे सामणे राखी तिया। दूजे दिने मूसा मिलणे वाल़े तम्बूए रे गया; तो तिने देखेया कि हारूणो री छाटी जो लेवी गोत्रो रे कराने खे थी तिदे कलिया निकल़ी गी थिया, तिदे कलिया लगिया ओर फूल बी फूले ओर पाक्के बदाम बी लगी रे थे। तेबे मूसा तिना सबी छाटिया खे यहोवे रे सामणे ते निकयाल़ी कि सबी इस्राएलिया गे लई आया ओर तिने आपणी-आपणी छाटी पछयाणी की लई ली।
तेबे यहोवे मूसे खे बोलेया, "हारूणो री छाटिया खे वाचा रे सन्दूको रे सामणे फेर राखी दे, कि ये तिना तोखा करने वाल़ेया खे एक नशाण बणी की राखी री रओ, कि तिना रा बड़बड़ाणा जो मेरे खलाफ ऊँदा रओआ आगो खे बन्द ऊई जाओ, एड़ा नि ओ कि सेयो मरी जाओ।" ओर मूसे यहोवे री एसा आज्ञा रे मुताबिक ई कित्तेया।
तेबे जेबे लोक आपणे डेरे ते यरदन नदिया ते पार जाणे लगे ओर पुरोईत वादे रा सन्दूक चकी की लोका ते आगे-आगे चलणे लगे। यरदन नदिया रा पाणी तो फसला री बडाईया रे बखते सबी दिना दे कनारेया ते बी ऊबे बह्ईंदा रओ था, पर जिंयाँ ई सन्दूको खे चकणे वाल़े पुरोईत यरदन नदिया रे कनारे पऊँचे ओर तिना रे पैर यरदन नदिया रे कनारे पाणिए दे डूबी गे। तेबे यरदन नदिया रा जो पाणी ऊबा ते आऊणे लगी रा था से बऊत दूर, मतलब आदाम शईरो रे नेड़े जो सारतान जगा रे नेड़े मैदानो दे ए रूकी की एक टेर ऊई गा ओर दवाला जेड़ा खड़ा रया ओर यरदन नदिया रा जो पाणी अराबा रे सागरो दे, जेतेखे मृत सागर बी बोलोए, तेथो रिया तरफा खे बह्ईणे लगी रा था, से पूरा सूकीगा ओर सेयो लोक नदिया ते चलदे ऊए यरीहो सामणे पार पऊँची गे। तेबे पुरोईत यहोवे रे वादे रा सन्दूक चकी की यरदन नदिया दे बीचे चली की सुकी जमीना दे खड़े दे रये ओर सारे इस्राएली लोक पैदल पार उतरदे रये, ईंयाँ सेयो सारे इस्राएली लोक यरदन नदिया ते पार चलीगे जेड़े की सेयो सूकिया जमीना दे चले ओ।
ओर जिंयाँ ई परमेशरो रे वादे रा सन्दूक चकणे वाल़े पुरोईत यरदन नदिया बीचा ते निकल़ी की आए ओर तिना रे पैर जमीना दे पड़े, तिंयाँ ई यरदन नदिया रा पाणी आपणी जगा दे आया ओर पईले जेड़ा कनारे पाँदे बह्ईणे लगेया।
तेबे यरीहो शईरो रे सारे द्वार इस्राएली लोका रे डरो रे मारे लगातार बन्द रये ओर कोई बी बारे-पीतरे नि जाई सको था। फेर यहोवे यहोशूए खे बोलेया, "सुण, आऊँ यरीहो शईरो खे तेथो रे राजा ओर तेसरी सेना समेत तेरे वशो दे करी देऊँआ। तो तुसा बीचे जितणे योद्धा ए, शईरो खे केरी लो ओर तेस शईरो रे चऊँ कनारे एक बार कूमी आओ। छे दिन तक एड़ा ई करना। तेबे सात पुरोईत सन्दूको ते आगे-आगे खाड्डुआ रे सींगा रे सात रड़सिंगे लई की चलो, फेर सातुए दिने तुसे शईरो रे चऊँ कनारे सात बार कूमणा ओर पुरोईत बी रड़सिंगे बजांदे ऊए चलो। जेबे सेयो रड़सिंगे देरा तक बजांदे रओ, तेबे सब लोक रड़सिंगे री आवाज सुणी की जोरे की जयजयकार करो, तेबे तेसी बखते शईरो री दवाल निऊँआ ते टल़ी जाणी ओर सारे लोक आपणे-आपणे सामणे ऊबे चढ़ी जाओ।" तेबे नूनो रे पाऊ यहोशूए पुरोईता खे बुलाई की बोलेया, "वादे रा सन्दूक चकी लो ओर सात पुरोईत सन्दूको ते आगे-आगे खाड्डुआ रे सींगा रे सात रड़सिंगे लई की चलो।" तेबे तिने लोका खे बोलेया, "आगे जाई की शईरो रे चऊँ कनारे कूमी की आओ ओर जिना गे अथियार ए सेयो सैनिक यहोवे रे सन्दूको ते आगे-आगे चलो।"
जेबे लोके रड़सिंगे री आवाज सुणी, तेबे तिने जोरे की जयजयकार कित्ती, तेबे यरीहो शईरो री दवाल निऊँआ ते टल़ीगी ओर इस्राएली लोक आपणे-आपणे सामणे तेते शईरो दे कूसी गे ओर शईर आपणे कब्जे दे लई ला।
तेबे पलिश्तिये इस्राएली लोका रिया सेना पाँदे अमला कित्तेया ओर सेयो अराईते, तिने कोई 4,000 इस्राएली सिपाई लड़ाईया दे मैदानो देई काईते। जेबे इस्राएली सिपाई छावणिया दे वापस आए, तेबे इस्राएलो रे स्याणे लोक बोलणे लगे, "यहोवे आज आसे पलिश्तिया रे आथो ते कऊँ अराए? एबे आओ, आसे यहोवे रे वादे रा सन्दूक शीलो जगा ते मांगी की लई आऊँए, ताकि से आसा बीचे आई की आसा खे दुश्मणा रे आथो ते बचाओ।" तेबे तिने कुछ लोक शीलो दे पेजी की तेथा ते यहोवे रे वादे रा सन्दूक मुंगाईता जेते पाँदे करूब ए ओर जेती यहोवे री उपस्थिती बणी दी रओ थी ओर यहोवे रे वादे रे सन्दूको साथे एलीए रे दोनो पाऊ, होप्नी ओर पीनहास बी तेती आए।
जेबे इस्राएली लोक यहोवे रे वादे रा सन्दूक डेरे दे लई की आए, तेबे सारे इस्राएली इतणे जोरे की ललकारने लगे कि तेथो री जमीन इल्ली गी। एते ललकारा री आवाज सुणी की पलिश्तिये पूछेया, "इब्री लोक इतणे जोरे की कऊँ ललकारने लगी रे?" तेबे तिना खे पता लगी गा कि इस्राएली लोका रे डेरे दे यहोवे रे वादे रा सन्दूक आई रा। तेबे पलिश्ती डरी की बोलणे लगे, "तेती डेरे दे तिना रा देवता आई गा रा।" तेबे तिने बोलेया, "हाय! आसा साथे एड़ी गल्ल पईले कदी नि ऊई थी। हाय! एड़े तागतबर देवते रे आथो ते आसे केस बचाणे? ये तो सेई देवता ए जिने मिस्री लोका पाँदे उजाड़ जगा दे सबी प्रकारा रिया मुसीबता पाईया थिया। इजी री खातर ओ पलिश्तियो, मजबूत ऊई जाओ ओर एक योद्धा जेड़े लड़ो, जे तुसे आज इना ते नि लड़े तो आसे इब्री लोका रे गुलाम ऊई जाणे जेड़े सेयो पईले म्हारी सेवा करो थे। एबे डरो नि पर उठो ओर लड़ो।" तेबे पलिश्ती पूरे जोरे की लड़े ओर इस्राएली फेर अरीगे। ओर इतणा जादा खून खराबा ऊआ कि 30,000 इस्राएली सैनिक मरीगे। ओर बचे दे इस्राएली लोक मुड़ी की आपणेया डेरेया खे नठीगे। तेबे पलिश्तिए यहोवे रे वादे रा सन्दूक इस्राएली लोका ते छीनी ला ओर एलीए रे दोनो पाऊ होप्नी ओर पीनहास बी काईते।
तेबे यहोवे अशदोद ओर तिना रे नेड़े रणे वाल़ेया लोका खे बऊत पारी सजा दित्ती ओर तिने तिना लोका रे गिलटिया निकयाल़ी तिया। एड़ा आल देखी की अशदोदो रे लोके बोलेया, "इस्राएलो रे देवते रा सन्दूक आसा बीचे नि रयी सकदा, कऊँकि तेसरा गुस्सा आसा पाँदे ओर म्हारे देवता दागोनो पाँदे बुरिया तरआ ते पड़की रा।" तेबे तिने पलिश्तिया रे सारे सरदार बुलवाए ओर तिना ते पूछेया, "आसे इस्राएलो रे देवते रे सन्दूको साथे क्या करिए?" तिने बोलेया, "इस्राएलो रे देवते रा सन्दूक कुमायी की गत शईरो दे पऊँचाई देयो।" तेबे सेयो इस्राएलो रे देवते रा सन्दूक गत शईरो खे लई चले। जेबे सेयो इस्राएलो रे देवते रे सन्दूको खे लई की गत शईरो दे पऊँचे, तेबे एड़ा ऊआ कि यहोवे तेस शईरो रे लोका रे खलाफ मुसीबत पेजी। तेबे सेयो लोक बऊत डरीगे ओर यहोवे तेस शईरो रे सबी लोका खे दु:ख दित्तेया ओर जवाना ते लई की स्याणेया तक सबी रे शरीरो दे गिलटिया निकल़ने लगिया। तेबे तिने यहोवे रा सन्दूक एक्रोन शईरो दे पेजेया ओर जिंयाँ ई यहोवे रा सन्दूक एक्रोन शईरो दे पऊँचेया तिंयाँ ई एक्रोन शईरो रे लोक ये बोली की चींगणे लगे, "इस्राएलो रे देवते रा सन्दूक इजी खे आसा गे पऊँचाया, ताकि आसा खे ओर म्हारे लोका खे मरवाओ!" तेबे तिने पलिश्तिया रे सारे सरदार कट्ठे कित्ते ओर तिना खे बोलेया, "इस्राएलो रे देवते रा सन्दूक एथा ते बारे लई जाओ, ताकि से आपणिया जगा दे वापस ऊई जाओ, ताकि आसे ओर म्हारे लोक मरने ते बची जाओ।" कऊँकि तेस शईरो दे यहोवे रिया तरफा ते पारी मुसीबत पड़ने लगी री थी।
यहोवे रे वादे रा सन्दूक पलिश्तिया रे देशो दे सात मीन्ने रया। तेबे पलिश्ती लोके पुजारी ओर भविष्यबाणी बोलणे वाल़ेया खे बुलाई की पूछेया, "यहोवे रा सन्दूक जो आसा गे आ तेतेरा आसे क्या करिए? आसा गे बताओ कि आसे तेसखे तेसरिया जगा दे किंयाँ पेजिये?" तिने ज्वाब दित्तेया, "जे तुसे इस्राएलो रे देवते रा सन्दूक तेती पेजो, तो से ईंयाँ ई नि पेजणा, तेतेरा प्राश्चित करने खे जरूर दोषबलि देणी। तेबे तुसे ठीक ऊई जाणे ओर तुसा जाणी लणा कि ये सब तेसरिया ई तरफा ते था जेसरिया बजा ते ये मुसीबत आई थी।"
तेबे पलिश्ती लोके तेड़ा ई कित्तेया, मतलब दो दूद देणे वाल़िया गायी लई की तेते गडिया दे जोड़िया ओर तिना रे बच्चे गवाईणी दे बन्द करीते। तेबे यहोवे रा सन्दूक ओर दूजा सन्दूक बी जिदे सूईने रे चूए ओर गिलटिया रिया मूर्तिया थिया गडिया पाँदे राखी तिया। तेबे गायी ओरे-पोरे मुड़े बिना सीदे बेतशेमेश शईरो रिया बाटा दे गईया, सेयो सड़के ई सड़के रांबदिया ऊईया चली गिया ओर पलिश्तिया रे सरदार तिना पीछे-पीछे बेतशेमेश शईरो रे बन्ने तक गये। तेस बखते बेतशेमेश शईरो रे लोक काट्टिया दे कणक बाडणे लगी रे थे ओर जेबे तिने सन्दूक देखेया, तेबे तिजी खे देखी की सेयो बऊत खुश ऊए। से गड्डी यहोशू नाओं रे बेतशेमेशो दे रणे वाल़े माणूंए रे डोरूए दे जाई की रूकी गी, जेती एक बड़ा पात्थर था। तिने लोके गडिया री लकड़ी चीरी ओर गायी होमबलि करी की यहोवे खे चढ़ाईया। ये सब करने ते पईले लेवी गोत्रो रे लोके यहोवे रे वादे रा सन्दूक तेस सन्दूको समेत जिदे सूईने रिया चीजा थिया, गडिया ते उतारी की तेती बड़े पात्थरो पाँदे राखी तिया। बेतशेमेशो रे लोके तेस ई दिने यहोवे खे होमबलि ओर मेलबलि चढ़ाए।
तेबे किर्यत्यारीम शईरो रे लोके जाई की सन्दूक चकेया। सेयो तेसखे अबीनादाबो रे कअरे लई की गये जो टीले पाँदे था। तिने यहोवे रे सन्दूको री सेवा करने खे अबीनादाबो रे पाऊ एलीआजारो खे पवित्र कित्तेया।
किर्यत्यारीमो दे सन्दूक राखे दे कोई बीइ साल ऊईगे थे। इना साला दे इस्राएलो रा सारा कराना दु:ख करदा ऊआ यहोवे पीछे चलणे लगेया।
तेबे किने दाऊद राजे गे जाई की ये दशेया कि यहोवे ओबेदेदोमो रे कराने पाँदे ओर जो कुछ तेसरा ए, तिजी पाँदे बी पवित्र सन्दूको रिया बजअ ते आशीष देई राखी। तेबे दाऊदे जाई की परमेशरो रा सन्दूक ओबेदेदोमो रे कअरो ते दाऊदो रे शईरो दे खुशिया साथे ल्याया। तेस बखते यहोवे रा सन्दूक चकणे वाल़े लेवी गोत्रो रे लोक सन्दूक चकी की छे कदम चली चुके, तेबे दाऊदे एक बल़द ओर एक पाल़ेया-पोषेया रा बाच्छू बलि कराया। ओर दाऊद रेशमो रा एपोद लको दे गूड़ी की यहोवे रे सामणे तनो-मनो ते नाचदा रया। ईंयाँ दाऊद ओर इस्राएलो रा सारा कराना यहोवे रे सन्दूको खे जयजयकार करदे ओर नरसिंगा बजांदे ऊए यरूशलेम शईरो खे लई चले।
तेबे राजा सुलैमाने इस्राएली लोका रे बुजुर्ग लोक ओर गोत्रा रे सारे खास मर्द जो इस्राएली लोका रे बुजुर्गा रे करानेया रे परदान थे, सेयो बी यरूशलेम शईरो दे आपू गे एते इच्छा ते कट्ठे कित्ते, ताकि सेयो यहोवे री वाचा रा सन्दूक दाऊदो रे शईरो ते मतलब सिय्योनो ते ऊबे लई आओ। तेबे सारे इस्राएली लोक एतानीम सातुए मीन्ने दे त्योआरो रे बखते सुलैमान राजे गे कट्ठे ऊए। जेबे सारे इस्राएली बुजुर्ग आए, तेबे पुरोईते सन्दूक चकी ता। ओर यहोवे री वाचा रा सन्दूक, ओर मिलणे वाल़ा तम्बू ओर जितणे पवित्र पांडे तेते शईरो दे थे, तिना सारेया खे लेवी ओर पुरोईत लोक ऊबे लईगे। ओर सुलैमान राजा ओर सारी इस्राएली मण्डल़ी, जो तेसगे कट्ठी ऊई थी, सेयो सारे सन्दूको सामणे इतणिया पेडा ओर बल़द बलि करने लगी रे थे, जिना री गिणती किंयाँ पनि ऊई सको थी। तेबे पुरोईते यहोवे री वाचा रा सन्दूक तेसरी जगा खे मतलब मन्दरो दे पवित्र जगा दे, जो परम पवित्र जगा ए, पऊँचाई की करूबा निठे राखी ता। करूबे तो सन्दूको री जगा पाँदे पंख एड़े फैलाई राखे थे कि तिने पाँदा ते सन्दूक ओर तेतेरे डण्डे टकी राखे थे। सेयो डण्डे तो इतणे लाम्बे थे कि तिना रे सिरे तेसा परम पवित्र जगा रे सामणे ते दिशी जाओ थे, पर ओर केथा ते नि दिशो थे। ओर तदुए ते सेयो तेथी ए। सन्दूको दे कुछ नि था, तिना दुँईं पात्थरो रिया पट्टिया खे छाडी की जो मूसे होरेबो दे तेतेरे पीतरे तेस बखते राखिया, जेबे यहोवे इस्राएली लोका रे मिस्रो ते निकल़ने रे बखते तिना साथे वाचा बानी थी।
जेबे पुरोईत पवित्र जगा ते निकल़े, तेबे यहोवे रा मन्दर बादल़ो साथे परीगा था। ओर बादल़ो रिया बजअ ते पुरोईत सेवा-टईल करने खे खड़े नि रयी सके, कऊँकि यहोवे री महिमा रा तेज यहोवे रे मन्दरो दे परी गा था।
ओ पटकणे वाल़े लोको मांगे वापस आओ, आऊँ तुसा रा स्वामी ए, यहोवे री येई बाणी ए। जे तुसे वापस आओगे, तो तुसा रे हर शईरो बीचा ते एक ओर हर कुलो बीचा ते दूई खे लई की मां सिय्योनो रे पऊँचाई देणे। मां तुसा खे आपणे मनो साथे मेल खाणे वाल़े गवाल़े देणे, जिना ज्ञान ओर बुद्धिया साथे तुसे चराणे। तिना दिना रे जेबे तुसे एस देशो रे बढ़ोगे ओर फलो-फूलोगे, तेबे तुसा रे लोका फेर एड़ा नि बोलणा कि यहोवे री वाचा रा सन्दूक। यहोवे री ये बी बाणी ए। तिना रा विचार बी तेसरे मनो रे नि आऊणा, ना लोका तिजी रे ना रणे ते फिकर करनी ओर ना तिजी री मरम्मत ऊणी।
तेसा पईली वाचा रे परमेशरो री आराधना करने रे नियम थे और एसा तरतिया पाँदे परमेशरो री आराधना करने खे एक जगा बी बणाई राखी थी। एक तम्बू बणाया जेतेरे दो इस्से थे। पईला, तम्बूओ रे बारले इस्से रे दिऊए, एक मेज और तेसा मेजा पाँदे पेंटा रिया पवित्र रोटिया राखी जाओ थिया। तम्बूओ रे एते इस्से खे पवित्र जगा बोलो थे। दूजा, तम्बूओ रा पितरला इस्सा पड़दे रे पीछे था। तेस पितरले इस्से खे परम पवित्र जगा बोलो थे। तेस पितरले इस्से रे सूईने री तूपदानी और चऊँ कनारे ते सूईने की मड़े रा वाचा रा सन्दूक था। सन्दूको रे पीतरे मन्ने की परे रा सूईने रा ब्याम और हारूणो री सोठी, जिदे कूँल़े पत्ते आईगे थे और वाचा रिया पट्टिया राखी री थिया। सन्दूको पाँदे तेजोमय पंखो वाल़े करूब बणाई राखे थे। जो प्राश्चितो रे टकणे पाँदे छांएं कित्ते रे थे। पर एबु आसे इना गल्ला खे एक-एक करी की समजयाई नि सकदे।
और परमेशरो रा मन्दर, जो स्वर्गो रे ए, से खोलेया और तेसरे मन्दरो रे तेसरी वाचा रा सन्दूक दिशेया। और तेती बिजल़िया, आवाज, गर्जण और ईल्लण ऊणे लगे और बड़े-बड़े ओल़े पड़े।