1 तेबे बसलेल ओर तेस साथे काम करने वाल़ेया बबूलो री लकड़िया रा एक सन्दूक बणाया, तिजी री लम्बाई टाई आथ, चौड़ाई डेढ़ आथ ओर ऊचाई डेढी आथो री थी। 2 तिने से बारे पीतरे शुद्ध सूईने साथे मढ़ेया ओर तिदे चऊँ कनारे सूईने री बाड़ बणाई। 3 ओर तिजी रे चऊँ पावेया पाँदे सूईने रे चार कड़े बणवाई की दो कड़े एकी कनारे ओर दो कड़े दूजे कनारे लगाए। 4 तेबे तिने बबूलो री लकड़िया रे डण्डे बणाए ओर सेयो सूईने साथे मढ़े। 5 तिने सेयो सन्दूको रे दुँईं कनारेया रे कड़ेया रे पाए ताकि तिना रे साअरे साथे सन्दूक चकेया जाओ। 6 तेबे तिने शुद्ध सूईने रा दया रा आसण बणाया, तिजी री लम्बाई टाई आथ ओर चौड़ाई डेढी आथो री थी। 7 तिने सूईना कअड़ी की दो करूब दया रे आसणो रे दुँईं सिरेया पाँदे बणाए; 8 तिने एक करूब एकी कनारे पाँदे ओर दूजा करूब दूजे कनारे पाँदे बणाया, तिने सेयो दया आसणो रे टकणे साथे एक ई टुकड़े रे दुँईं सिरेया पाँदे बणाए। 9 ओर तिना करूबा रे पंख पाँदा ते एड़े फैले रे बणो कि दया रा आसण तिना साथे टखेया रा रओ ओर तिना रे मूँ आमणे-सामणे ओर दया रे आसणो रे कनारो खे कित्ते रे बणाए।

10 तेबे तिने बबूलो रिया लकड़िया रा एक मेज बणाया, तिजी री लम्बाई दो आथ, चौड़ाई एक आथ ओर ऊचाई डेढ़ आथ थी। 11 फेर तिने से शुद्ध सूईने साथे मढ़ेया ओर तिदे चऊँ कनारे सूईने री पट्टी बणाई। 12 ओर तिने तिजी खे चार आऊँगल़ चौड़ी एक चौखट ओर इजी चौखटा खे चऊँ कनारे सूईने री एक पट्टी बणाई। 13 ओर तिने मेजो खे सूईने रे चार कड़े कअड़ी की तिना चऊँ कूणेया रे लगाए, जो तिजी रे चऊँ पावेया रे थे। 14 सेयो कड़े चौखटा रे लगाए ताकि तिना कड़ेया रे डण्डे पाई की मेज सानिया रे चखी जाओ। 15 तिने मेज चकणे खे बबूलो री लकड़िया रे डण्डे बणाए ओर फेर सेयो सूईने साथे मढ़े। 16 ओर तिने मेजो पाँदला समान, मतलब परात ओर तूपदान, चमचे, लटणे रे कटोरे सब शुद्ध सूईने रे बणाए।

17 तेबे तिने शुद्ध सूईना कअड़ी की डण्डिया समेत दिऊए राखणे री फट्टी बणाई; तिजी रे फूल राखणे री कऊली, गाठ ओर फूल सारे एक ई टुकड़े रे बणे। 18 ओर तिजी रे कनारेया ते छे डाल़िया निकल़ी री बणिया। तीन डाल़िया तो दिऊए राखणे री फट्टिया रे एकी कनारे ते ओर तीन डाल़िया दूजे कनारे ते निकल़ी रिया बणिया। 19 एकी-एकी डाल़िया रे बदामो रे फूला जेड़े तीन-तीन फूल राखणे रिया कऊलिया, एक-एक गाठ ओर एक-एक फूल बणेया, दिऊए राखणे री फट्टिया ते निकल़ी री इना छे डाल़िया रे एड़ा ई सब कुछ था। 20 ओर फट्टिया री डण्डिया पाँदे बदामो रे फूलो जेड़ी गाठ ओर फूलो समेत चार फूल राखणे रिया कऊलिया जेड़िया बणी री थिया।

21 ओर फट्टिया ते निकल़ी रिया छे डाल़िया बीचा ते दो-दो डाल़िया निठे एक-एक गाठ फट्टिया साथे एक ई टुकड़े रिया बणिया। 22 गाठी ओर डाल़िया, सब दिऊए राखणे री फट्टिया समेत शुद्ध सूईना कअड़ी की पूरी दिऊए राखणे री फट्टी एकी टुकड़े कअड़ी की बणिया।

23 ओर तिने शुद्ध सूईने री फट्टिया रे सातो दिऊए, चिमटे ओर आग चकणे रे पांडे बणाए। 24 तिने पैंती किलो शुद्ध सूईने री दिऊए राखणे री फट्टी सारे समानो समेत बणाई।

25 फेर बसलेल ओर तेस साथे काम करने वाल़ेया बबूलो री लकड़िया री तूपबेदी बी बणाई, तिजी री लम्बाई एक आथ ओर चौड़ाई एक आथ थी, से चौरस बणी ओर तिजी री ऊचाई दो आथ थी ओर तेतेरे सींग तिजी साथे एकी टुकड़े रे बणे थे। 26 तिने तिजी रे पाँदले पल्ले, चऊँ तरफा रे कुणे ओर सींगो समेत से बेदी शुद्ध सूईने साथे मढ़ी ओर तिजी रे चऊँ कनारे सूईने री एक बाड़ बणाई। 27 ओर तेते बाड़ा निठे तिजी रे दुँईं पल्लेया पाँदे तिने सूईने रे दो-दो कड़े बणाई की लगाए ताकि तिना कड़ेया रे डण्डे लगाई की बेदिया खे चकी सको। 28 ओर तिने डण्डे बबूलो री लकड़िया रे बणाए ओर सेयो सूईने साथे मढ़े।

29 ओर तिने अभिषेको रा पवित्र तेल ओर खुशबूदार चीजा रा तूप गन्धो री रीतिया रे मुताबिक बणाया।