1 यहोवे रे वादे रा सन्दूक पलिश्तिया रे देशो दे सात मीन्ने रया। 2 तेबे पलिश्ती लोके पुजारी ओर भविष्यबाणी बोलणे वाल़ेया खे बुलाई की पूछेया, "यहोवे रा सन्दूक जो आसा गे आ तेतेरा आसे क्या करिए? आसा गे बताओ कि आसे तेसखे तेसरिया जगा दे किंयाँ पेजिये?" 3 तिने ज्वाब दित्तेया, "जे तुसे इस्राएलो रे देवते रा सन्दूक तेती पेजो, तो से ईंयाँ ई नि पेजणा, तेतेरा प्राश्चित करने खे जरूर दोषबलि देणी। तेबे तुसे ठीक ऊई जाणे ओर तुसा जाणी लणा कि ये सब तेसरिया ई तरफा ते था जेसरिया बजा ते ये मुसीबत आई थी।" 4 पलिश्ती लोके पूछेया, "आसे तेतेरा नुकशाण परने खे कुण जा दोषबलि देऊँ?" तिने ज्वाब दित्तेया, "पलिश्ती सरदारा री गिणतिया रे मुताबिक हर एकी रिया तरफा ते सूईने रिया बणी रिया पाँज गिलटिया ओर सूईने रे बणे दे पाँज चूए चढ़ाणे चाईयो, कऊँकि तुसा पाँदे ओर तुसा रे सरदारा पाँदे एक जेड़ी ई मुसीबत आई री। 5 तो तेबे तुसे आपणी गिलटिया ओर आपणे देशो खे नाश करने वाल़े चूएया री बी मूर्तिया बणाई की इस्राएलो रे देवते री महिमा करो, तेबे क्या पता से मुसीबता तुसा पाँदा ते ओर तुसा रे देवते ओर देशो पाँदा ते चकी देयो। 6 तुसे आपणे मन एड़े टीठ नि करो जेड़ा कि मिस्र देशो रे लोके ओर फिरौने आपणे मन टीठ कित्ते थे। पर जेबे तिना रे देवते तिना बीचे अचम्बे रे काम कित्ते, तेबे तिने इस्राएली लोक जाणे दित्ते। 7 तो एबे तुसे एक नवीं गड्डी बणाओ ओर एड़िया दो दूद देणे वाल़िया गायी लओ जो ताजा ई सुई रिया ओ जिना रिया कांदा पाँदे एबुए तक जूँगड़ा नि राखी राखेया ओ, ओर तिना गायी खे तेते गडिया दे जोड़ी की तिना रे बच्चेया खे तेथा ते लई की कअरो खे वापस करी देयो। 8 तेबे यहोवे रा सन्दूक लई की तेते गडिया पाँदे राखी देयो ओर जो सूईने रिया चीजा तुसा प्राश्चित करने खे दोषबलिया रे रूपो दे देणियां, सेयो दूजे सन्दूको दे राखी की तेते साथे राखी देयो, तेबे तिना खे पेजी देयो ताकि सेयो चली जाओ। 9 ओर देखदे रएयो जे सेयो गायी म्हारे देशो रिया बाटा खे छाडी की इस्राएलो रे शईर बेतशेमेशो खे जाओ, तो समजी लणा कि आसा रा इतणा बड़ा नुकशाण तेसरिया बजा ते ई ऊआ ओर जे नि, तो आसा खे पक्का ऊई जाणा कि आसा पाँदे ये मुसीबत तेसरिया तरफा ते नि, बल्कि कुदरती ते ई पड़ी री।"

10 तेबे पलिश्ती लोके तेड़ा ई कित्तेया, मतलब दो दूद देणे वाल़िया गायी लई की तेते गडिया दे जोड़िया ओर तिना रे बच्चे गवाईणी दे बन्द करीते। 11 तेबे यहोवे रा सन्दूक ओर दूजा सन्दूक बी जिदे सूईने रे चूए ओर गिलटिया रिया मूर्तिया थिया गडिया पाँदे राखी तिया। 12 तेबे गायी ओरे-पोरे मुड़े बिना सीदे बेतशेमेश शईरो रिया बाटा दे गईया, सेयो सड़के ई सड़के रांबदिया ऊईया चली गिया ओर पलिश्तिया रे सरदार तिना पीछे-पीछे बेतशेमेश शईरो रे बन्ने तक गये। 13 तेस बखते बेतशेमेश शईरो रे लोक काट्टिया दे कणक बाडणे लगी रे थे ओर जेबे तिने सन्दूक देखेया, तेबे तिजी खे देखी की सेयो बऊत खुश ऊए। 14 से गड्डी यहोशू नाओं रे बेतशेमेशो दे रणे वाल़े माणूंए रे डोरूए दे जाई की रूकी गी, जेती एक बड़ा पात्थर था। तिने लोके गडिया री लकड़ी चीरी ओर गायी होमबलि करी की यहोवे खे चढ़ाईया। 15 ये सब करने ते पईले लेवी गोत्रो रे लोके यहोवे रे वादे रा सन्दूक तेस सन्दूको समेत जिदे सूईने रिया चीजा थिया, गडिया ते उतारी की तेती बड़े पात्थरो पाँदे राखी तिया। बेतशेमेशो रे लोके तेस ई दिने यहोवे खे होमबलि ओर मेलबलि चढ़ाए। 16 ये देखी की पलिश्तिया रे पाँजो सरदार तेस ई दिने एक्रोन शईरो खे वापस ऊईगे।

17 सूईने रिया गिलटिया जो पलिश्ती लोके यहोवे रा सन्दूक छीनी की लई जाणे रा प्राश्चित करने खे दोषबलि करी की दित्तिया थिया। पलिश्तिया रे इने सरदारे आपणे शईरा रे मुताबिक अशदोद, गाजा, अश्कलोन, गत ओर एक्रोनो रिया तरफा एक-एक देई राखिया थिया। 18 ओर सेयो सूईने रे चूए गिणी की, पलिश्तिया रे सरदारा रे कब्जे दे आऊणे वाल़े दवाला वाल़े शईर ओर बिना दवाला वाल़े गाँवो ओर बस्तिया रे मुताबिक दित्ते। से बड़ा पात्थर जेते पाँदे यहोवे रा सन्दूक राखी राखेया था आज बी बेतशेमेशो दे रणे वाल़े यहोशूए रे डोरूए दे आ। 19 तेबे बेतशेमेशो रे लोक यहोवे रे सन्दूको रे पीतरे चाँकेया जेतेरिया बजा ते यहोवे तिना बीचा ते सत्तर माणूं ओर तेबे 50,000 माणूं काईते ओर तेथो रे लोके इजी खे दु:ख कित्तेया कि यहोवे लोका रा बड़ा संहार कित्तेया था।

20 तेबे बेतशेमेशो रे लोक बोलणे लगे, "एस पवित्र परमेशर यहोवे रे सामणे कुण खड़ा रई सकोआ? ओर आसे एस सन्दूको खे केसगे पेजिये?" 21 किर्यत्यारीम शईरो दे पुरोईत रओ था इजी री खातर तिने तेस शईरो दे रणे वाल़ेया लोका गे ये बोलणे के दूत पेजे, "पलिश्तिये यहोवे रे वादे रा सन्दूक वापस करिता रा, इजी री खातर तुसे आई की तिजी खे आपू गे लई जाओ।"